Ndima Ya 59

Yesu Ndi Nnyi Zwa Vhukuma?

MUSI gungwa ḽi re na Yesu na vhafunziwa vhawe ḽi tshi swika Betsaida, vhathu vha ḓisa bofu ha ene vha mu humbela uri a kwame onoyo munna a mu fhodze. Yesu a dededza uyo muthu a mu bvisa muḓini, musi o no pfela mare maṱoni, u a vhudzisa: “U vhona’ni?”

Munna u a fhindula: “Ndi vhona vhathu, vha nga miri; ndi vhona vha tshi tshimbila-tshimbila.” A tshi vhea zwanḓa zwawe maṱoni a onoyo munna, Yesu u mu fhodza tshoṱhe u itela uri a vhone zwavhuḓi. Zwenezwo Yesu u a mu litsha a ya hayani o mu laya uri a si dzhene muḓini.

Zwino Yesu u ṱuwa na vhafunziwa vhawe a ya miḓini ya Kesarea Filipi, kule devhula ha Palestine. Ndi tshivhanga tshilapfu, tshi ṱoḓaho u vha khilomithara dza 48, u ya fhethu ho nakaho ha Kesarea Filipi, mithara dza 350 nga nṱha ha ndinganyo ya lwanzhe. Khamusi lwendo lu dzhia maḓuvha manzhinyana.

Nḓilani, Yesu u ṱuwa e eṱhe u yo rabela. Ho sala fhedzi miṅwedzi ya ṱahe kana ya fumi uri a fe, nahone u khou vhilaelela vhafunziwa vhawe. Vhanzhi vho no litsha u mu tevhela. Vhaṅwe vha vhonala vho no hanganea nahone vho shona nge a hana musi vhathu vha tshi ṱoḓa u mu ita khosi na uri musi a tshi lingwa nga maswina awe, o hana u vha ṋea vhuṱolo vhu bvaho ṱaḓulu u itela u sumbedza uri ndi khosi. Vhafunziwa vhawe vha tenda mini nga ha u ḓiṱalusa hawe? Musi vha tshi swika hune a khou rabela hone, Yesu u a vhudzisa: “Vhathu vha tshi ṋyamba vha ri ndi nṋe nnyi?”

Vha a fhindula: “Vhaṅwe vha ri U Yohane Mulóvhedzi; vhaṅwe vha ri U Elia, na vhane vha ri U Yeremia kana muṅwe wa vhaporofita vha hone.” Ee, vhathu vha humbula uri Yesu ndi muṅwe wa havha vhanna o vuswaho vhafuni!

Yesu u a vhudzisa: “Inwi-ha ni ri ndi nṋe nnyi?”

Nga u ṱavhanya Petro u a fhindula: “U Kristo Murwa wa Mudzimu a tshilaho.”

Musi o no tenda phindulo ya Petro, Yesu u ri: “Nṋe-ha zwino ndi a U vhudza ndi ri: Iwe U Petro; kha tombo iḽi ndi ḓo fhaṱa tshivhidzo tshanga, huno khoro dza vhudzula-vhafu a dzi nga tshi koni.” Hafha Yesu u thoma nga u ḓivhadza uri u ḓo fhaṱa tshivhidzo na uri na lufu lu nga si kunde miraḓo yatsho musi vho no fhedza buḓo ḽavho ḽa kha ḽifhasi ḽi fulufhedzeaho. Zwenezwo u vhudza Petro uri: “Ndi ḓo U ṋea khoṋo dza muvhuso wa ṱaḓulu.”

Nga zwenezwo Yesu u dzumbulula uri Petro u ḓo ṱanganedza ndugelo dzo khetheaho. Hai, Petro ha khou ṋewa vhuimo ha u thoma vhukati ha vhaapostola, nahone ha khou itwa mutheo wa tshivhidzo. Yesu nga dzawe ndi Tombo ḽine khaḽo tshivhidzo tshawe tsha ḓo fhaṱwa khaḽo. Fhedzi Petro u ḓo ṋewa khoṋo tharu dzine a ḓo vula ngadzo tshibuli tsha uri zwigwada zwa vhathu zwi dzhene Muvhusoni wa ṱaḓulu.

Petro o vha a tshi ḓo shumisa khoṋo ya u thoma nga Pentekoste ya 33 C.E. u sumbedza Vhayuda vho rembuluwaho zwine vha fanela u ita u itela u tshidzwa. Ya vhuvhili o vha a tshi ḓo i shumisa nga u ṱavhanya nga murahu u itela u vulela Vhasamaria vha tendaho tshibuli tsha u dzhena Muvhusoni wa Mudzimu. Nga zwenezwo, nga 36 C.E. o vha a tshi ḓo shumisa khoṋo ya vhuraru u vulela Vhannḓa vha songo rubaho, Koronelio na khonani dzawe, tshenetsho tshibuli.

Yesu u isa phanḓa nyambedzano yawe na vhaapostola vhawe. U vha kula nungo nga u vha vhudza nga ha u tovholwa na lufu lwe a vha a tshi ḓo sedzana nalwo hu si kale ngei Yerusalema. A tshi kundwa u pfesesa uri Yesu u ḓo vuselwa u tshila ṱaḓulu, Petro u vhidzela Yesu thungo. U ri: “Murena ḓi-londe uri vha si U ite zwe wa amba.” A tshi mu furalela, Yesu u a fhindula: “Ibva murahu hanga, Sathane! U ṱoḓa u nkhakhisa, zwiné wa elelwa a si zwa Mudzimu, ndi zwa vhathu.”​—NW.

Zwi tou vha khagala uri vhaṅwe nga nnḓa ha vhaapostola vha khou tshimbila na Yesu, zwenezwo u a vha vhidza a vha ṱalutshedza uri a zwi nga leluwi u vha mutevheli wawe. U ri: “Arali muthu a tshi funa u ntsala murahu, nga a ḓi-hangwe, a hwale tshifhambano tshawe, a ntevhele. A funaho u tonda vhutshilo hawe, u ḓo vhu lovhisa; a lovhisaho vhutshilo hawe a tshi itela nṋe na mafhungo-maḓifha, u ḓo vhu wana.”

Ee, arali vha tshi ṱoḓa u tondwa ngae, vhatevheli vha Yesu vha fanela u vha na tshivhindi nahone vha ḓihangwe. U ri: “Ngauri a re na ṱhoni u ṋyamba na u amba mafhungo anga lushakani ulu lwa mashandukwa na vha-ita-zwivhi, onoyo na Murwa-muthu u ḓo vha na ṱhoni u mu amba musi a tshi ḓa e vhurenani ha khotsi-awe e na vharuṅwa vhakhethwa.” Marko 8:22-38; Mateo 16:13-28; Luka 9:18-27.

▪ Ndi ngani Yesu a tshi vhilaelela vhafunziwa vhawe?

▪ Ndi mavhonele afhio ane vhathu vha vha nao nga ha uri Yesu ndi nnyi?

▪ Petro u ṋewa khoṋo dzifhio, nahone dzi ḓo shumiswa hani?

▪ Ndi khakhululo ifhio ine Petro a i wana, nahone ndi ngani?