Ndima Ya 128

Yesu U A Tshila!

MUSI vhafumakadzi vha tshi wana tshalo tsha Yesu tshi si na tshithu, Maria Magdalena u a gidimela u vhudza Petro na Yohane. Naho zwo ralo, zwi tou vha khagala uri vhaṅwe vhafumakadzi vha a sala tshaloni. Zwenezwo, muruṅwa u a bvelela nahone u vha vhidzela nga ngomu.

Hanefho vhafumakadzi vha vhona na muṅwe muruṅwa, nahone muṅwe wa vhenevho vharuṅwa u amba navho u ri: “Inwi ni songo ofha! Ndi ḓivha zwauri ni ṱoḓa Yesu we a vha o vhambiwa. . . . Haho’ fhano; o vuwa vhunga ó amba. Iḓani ni vhone fhethu he a vha o ladzwa hone, ni kone u ṱavhanya u ya, ni yo vhudza vhafunziwa vhawe zwauri o vuwa vhafuni.” Ngauralo nga nyofho na nga dakalo ḽihulu, vhenevho vhafumakadzi vha a ṱuwa-vho.

Nga tshenetshi tshifhinga, Maria o wana Petro na Yohane, nahone u a vha vhigela: “Vho bvisa Murena tshaloni, a ri ḓivhi he vha mu vhea.” Nga u ṱavhanya vhaapostola vhavhili vha a ṱuwa nga u gidima. Yohane ndi mugidimi—​zwi tou vha khagala uri ndi muṱuku​—nahone u swika u thoma tshaloni. Nga hetshi tshifhinga vhafumakadzi vho no ṱuwa, ngauralo a huna a re tsini. A tshi kotamela fhasi, Yohane u ṱolela ngomu tshaloni nahone u vhona miṅwenda, fhedzi u ḓi ima nnḓa.

Musi Petro a tshi swika, ha timatimi, fhedzi u dzhena nga ngomu. U vhona miṅwenda i henefho fhasi nahone na labi ḽe ḽa shumiswa u putela ṱhoho ya Yesu. Zwo putelwa fhethu huthihi. Zwino na Yohane u a dzhena tshaloni, nahone u tenda muvhigo wa Maria. Fhedzi naho e Petro kana Yohane a vha humbuli uri Yesu o vuswa, naho O vha a tshi anzela u vha vhudza uri U ḓo vuswa. Vho akhamala, vhuvhili havho vha a humela hayani, fhedzi Maria, we a vhuyelela tshaloni, u a sala.

Nga tshenetsho tshifhinga, vhaṅwe vhafumakadzi vha khou gidimela u ya u vhudza vhafunziwa uri Yesu o vuswa, samusi vharuṅwa vho vha laedza u ita nga u ralo. Musi vha tshi khou gidima nga hune vha nga kona ngaho, Yesu u ṱangana navho nahone u ri: “Ndi masiari!” Vha tshi wela milenzheni yawe, vha a mu losha. Nga zwenezwo Yesu u ri: “Ni songo ofha; tshimbilani ni yo vhudza vharathu vhanga, vha ye Galilea; vha ḓo mbona henengei.”

Mathomoni, musi hu tshi vha na mudzinginyo nahone vharuṅwa vha tshi bvelela, maswole e a vha a tshi khou linda o tshenuwa nahone a nga vhafu. Musi o no dzivhuluwa, nga u ṱavhanya a ya muḓini nahone a vhudza vhotshifhe vhahulu zwe zwa bvelela. Musi o no vhonana na “vhahulwane” vha Vhayuda, vho phetha nga u lingedza u ṱavhanyisa mafhungo nga u renga maswole. O vha o laiwa uri: “Ambani ni ri: Vhafunziwa vhawe vho ḓa vhusiku vha mu tswa, riṋe ró eḓela!”

Samusi maswole a Vharoma a tshi nga ṱarafiwa nga lufu nga u eḓela mishumoni yao, vhotshifhe vha fulufhedzisa uri: “Arali muvhusi a tshi zwi pfa, [muvhigo wa u eḓela ha vhoinwi] riṋe ri ḓo mu fhembeledza ra ni lamulela.” Samusi mutengo we vha rengwa ngawo wo vha u muhulwane vhukuma, maswole vho ita nga he vha laedzwa ngaho. Nga zwenezwo, muvhigo wa mazwifhi wa u tswiwa ha tshitumbu tsha Yesu wa thoma u phaḓalala vhukuma vhukati ha Vhayuda.

Maria Magdalena, we a sala tshaloni, u farwa nga vhuṱungu vhuhulu. Yesu a nga vha e ngafhi? A tshi kotamela u sedza ngomu tshaloni, u vhona vharuṅwa vhavhili vho ambara nguvho tshena, vho dovha vha bvelela! Muṅwe o dzula ṱhohoni muṅwe u mafheleloni a he tshitumbu tsha Yesu tsha vha tsho eḓedzwa hone. Vha a vhudzisa: “Musadzi, U lila’ni?”

Maria u a fhindula: “Vho dzhia Muṋe wanga, huno a thi ḓivhi he vha mu vhea.” Nga zwenezwo u a rembuluwa nahone u vhona muṅwe muthu ane a dovholola mbudziso i no ri: “Musadzi, U lila’ni?” Nahone onoyo u dovha a vhudzisa: “U ṱoḓa nnyi?”

A tshi humbula uri hoyu muthu ndi mulindi wa tsimu ine tshalo tsha vha khayo, u ri khae: “Murena, arali e iwe wo mu hwalaho, mbudze he wa mu vhea, ndi yo mu dzhia.”

Onoyo muthu u ri: “Maria!” Nahone nga u ṱavhanya u a limuha, nga nḓila yo ḓoweleaho ine a amba ngayo nae, uri ndi Yesu. U a huwelela: “Rabuni!” (zwi ambaho uri “Mufunzi!”) Nga dakalo ḽihulwanesa, u a mu kwambatela. Fhedzi Yesu u ri: “U songo nkwama, ngauri a thi athu u gonya nda ya ha Khotsi-anga. Hone tshimbila u ye ha vharathu vhanga; U vha vhudze U ri: Ndi a gonya, ndi ya ha Khotsi-anga a re Khotsi-aṋu; ndi ya ha Mudzimu wanga a re Mudzimu waṋu.”

Zwino Maria u gidimela he vhaapostola na vhafunziwa ngavho vha kuvhangana hone. U a engedza mafhungo awe kha muvhigo we vhaṅwe vhafumakadzi vha vha vho no u ṋea malugana na u vuswa ha Yesu. Naho zwo ralo, vhenevho vhanna, vhe vha si tende vhafumakadzi vha u thoma, zwi tou vha khagala uri a vha tendi na Maria. Mateo 28:3-15; Marko 16:5-8; Luka 24:4-12; Yohane 20:2-18.

▪ Musi a tshi wana tshalo tshi si na tshithu, Maria Magdalena u ita mini, nahone ndi tshenzhelo ifhio ine vhaṅwe vhafumakadzi vha vha nayo?

▪ Vha tshi wana tshalo tshi si na tshithu Petro na Yohane vha ḓipfa hani?

▪ Ndi mini tshine vhaṅwe vhafumakadzi vha ṱangana natsho musi vhe nḓilani ya u ya u vhiga u vuswa ha Yesu kha vhafunziwa?

▪ Ho itea mini kha vhalindi vha maswole, nahone vho aravhiwa hani kha muvhigo wavho u yaho ha vhotshifhe?

▪ Hu itea mini kha Maria Magdalena musi e eṱhe tshaloni, nahone vhafunziwa vho aravha hani kha mivhigo ya vhafumakadzi?