Ndima Ya 133

Yesu U Fhedza Zwoṱhe Zwine Mudzimu A Mu Humbela

MUSI Yesu Kristo Khosi i re Mudziammbi a tshi fhelisa Sathane na shango ḽawe ḽi songo lugaho, hu ḓo vha na dakalo ḽihulu! Mafheleloni U Vhusa ha Miṅwaha ya Tshigidi ha Yesu hu a thoma!

Nga fhasi ha vhulivhisi ha Yesu na mahosi ngae, vhane vha ḓo ponyoka Haramagedo vha ḓo bvisa marubi e a siiwa nga nndwa yo lugaho. Zwi vhonala uri vhaponyoki vha re kha ḽifhasi na vhone vha ḓo beba vhana lwa tshifhinganyana, nahone havha vha ḓo ṱanganela kha mushumo u takadzaho wa u lima ḽifhasi ḽa vha tsimu i ngaho phakha yo nakaho.

Nga u ya ha tshifhinga Yesu u ḓo vusa vha dzimilioni dzi sa vhalei mavhiḓani avho u itela uri vha ḓiphine nga heyi Paradiso yo nakaho. U ḓo ita hezwi a tshi ḓadzisa zwe a khwaṱhisa: ‘Hu ḓa tshikhathi, tshine vhoṱhe vha re zwaloni vha ḓo pfa ipfi ḽawe ngatsho vha vuwa.’

Vhukati ha vhane Yesu a vha vusa hu ḓo vha hu na uḽa we a vha e muitazwivhi we a fa thungo hawe kha danda ḽa tshengedzo. Humbulani uri Yesu o mu fulufhedzisa uri: “Ngoho ndi a U vhudza ṋamusi, U ḓo vha na nṋe Paradisoni.” Hai, hoyo munna ha nga iswi ṱaḓulu u vhusa sa khosi na Yesu, na uri Yesu ha nga ḓo dovha a vha muthu a tshila Paradisoni nae kha ḽifhasi. Nṱhani hazwo, Yesu u ḓo vha na onoyo muitazwivhi nga muhumbulo wa uri U ḓo mu vusa a tshila Paradisoni nahone a ita uri zwishaiwa zwawe zwa ṋama khathihi na zwa muya, zwi ṱhogomelwe, samusi zwo sumbedzwa kha siaṱari ḽi tevhelaho.

Humbulani nga hazwo! Nga fhasi ha ṱhogomelo ya Yesu ya lufuno, muṱa woṱhe wa vhathu​—vhaponyoki vha Haramagedo, vhana vhavho, na zwigidi zwa dzimilioni zwa vho vuswaho vhafuni vhane vha mu thetshelesa—vha ḓo alutshela u fhelelani. Yehova, a tshi shumisa Murwa wawe a re khosi, Yesu Kristo, u ḓo dzula na vhathu nga lwa muya. Samusi ipfi ḽe Yohane a ḽi pfa ḽi bvaho ṱaḓulu ḽi tshi ri: “U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.” A huna muthu kha ḽifhasi ane a ḓo shengela kana u lwala.

Vhufheloni ha U Vhusa ha Yesu ha Miṅwaha ya Tshigidi, vhuimo vhu ḓo vha vhu tshi fana na he Mudzimu a vha o livha hone musi a tshi vhudza vhathu vhavhili vha u thoma, Adamu na Eva, uri vha ande nahone vha ḓadze ḽifhasi. Ee, ḽifhasi ḽi ḓo ḓadzwa nga murafho wo lugaho wa vhathu vho fhelelaho. Hezwi ndi nga ṅwambo wa uri zwivhuya zwa tshiṱhavhelo tsha tshirengululi tsha Yesu tshi ḓo vha tsho shumiswa kha muṅwe na muṅwe. Lufu nga ṅwambo wa tshivhi tsha Adamu lu ḓo vha lu si tsheeho!

Nga zwenezwo, Yesu u ḓo vha o vuledza zwoṱhe zwe Yehova a mu humbela uri a zwi ite. Ngauralo, vhufheloni ha miṅwaha ya tshigidi, u ḓo vhuisela Muvhuso na muṱa wa vhathu vho fhelelaho kha Khotsi awe. Zwenezwo Mudzimu u ḓo vhofholola Sathane na madimoni awe mugodini wa u nga vho fa vha sa iti tshithu. A tshi itela mini?

Ee, vhufheloni ha miṅwaha ya tshigidi, vhunzhi ha vhane vha khou tshila Paradisoni vha ḓo vha vhe vho vuswaho vhafuni vhe vha si vhuye vha lingwa lutendo lwavho. Musi vha sa athu u fa, a vho ngo vhuya vha ḓivha nga ha mafulufhedziso a Mudzimu nahone ngauralo vha si sumbedze lutendo khao. Nga zwenezwo, musi vho no vuswa vhafuni na u funzwa mafhungo-ngoho a Bivhili, zwo vha zwi tshi vha lelutshela Paradisoni vha tshi shumela Mudzimu, vha sa hanedzwi na zwiṱukuṱuku. Fhedzi arali Sathane a vhe o ṋewa tshibuli tsha u lingedza u vha litshisa u shumela Mudzimu, naa vho vha vha tshi ḓo fulufhedzea nga fhasi ha mulingo? U itela u pirungulula heyi mbudziso, Sathane u ḓo vhofhololwa.

Nzumbululo ye ya ṋewa Yohane i dzumbulula uri nga murahu ha U Vhusa ha Miṅwaha ya Tshigidi ha Yesu, Sathane u ḓo bvelela kha u shandukisa vhathu vhanzhi-vhanzhi vha sa vhalei kha nḓila ya u shumela Mudzimu. Fhedzi nga zwenezwo, musi mulingo wa u fhedza wo no fhela, Sathane, na madimoni awe, na vhoṱhe vhane a kona u vha fhura vha ḓo fheliswa tshoṱhe. Kha ḽiṅwe sia, vhaponyoki vho lingiwaho nga vhuḓalo, vha fulufhedzeaho, vha ḓo tshila vha tshi ḓiphina nga phaṱutshedzo dza Khotsi avho wa ṱaḓulu u ya nga hu sa fheli.

Zwi tou vha khagala uri Yesu o ita mushumo muhulwane nahone u kha ḓi ḓo bvela phanḓa u u ita, wa u vuledza ndivho khulwane dza Mudzimu. Ri nga ḓiphina nga vhumatshelo havhuḓi lungafhani nga ṅwambo wa zwe a zwi khunyeledza sa Khosi khulwane ya ṱaḓulu ya Mudzimu. Naho zwo ralo, ri nga si hangwe zwoṱhe zwe a zwi ita musi a tshi kha ḓi vha muthu.

Nga u tou ḓifunela Yesu o ḓa kha ḽifhasi nahone a ri funza nga ha Khotsi awe. Zwi fhiraho zwenezwi o sumbedza pfaneleo dza ndeme dza Mudzimu. Mbilu dzashu dzi sudzuluswa musi ri tshi ṱhogomela tshivhindi tshihulwane na u khwaṱha hawe, vhuṱali hawe vhu sa vhambedzwi na tshithu, vhukoni hawe vhuhulwane sa mufunzi, vhurangaphanḓa hawe ha tshivhindi, na u pfela hawe vhuṱungu na u pfesesa. Musi ri tshi humbula nḓila i sa ṱalusei ye a shengela ngayo musi a tshi ṋekedza tshiṱhavhelo, tshine ngatsho ra nga wana vhutshilo, vhukuma mbilu dzashu dzi sudzuluselwa u mu livhuha!

I ngoho, ndi muthu-ḓe we ra mu vhona kha ino ngudo ya vhutshilo ha Yesu! Bvumo ḽawe ḽi khagala nahone ndi ḽihulwane. Ri sudzuluselwa u dovholola maipfi a Pontio Pilato muvhusi wa Muroma: “Vhonani, muthu-ḓe!” Ee, i ngoho, “Muthu-ḓe,” muthu wa bvumo we a vhuya a tshila!

Nga u ṱanganedza hashu ndugiselelo yawe ya tshiṱhavhelo tshi rengululaho, muhwalo wa tshivhi na lufu zwo mamelwaho kha Adamu u nga bviswa kha riṋe, nahone Yesu a nga vha “Randalamo” washu. Vhoṱhe vhane vha ḓo wana vhutshilo vhu sa fheli vha fanela u vha na nḓivho hu si nga ha Mudzimu fhedzi, fhedzi na nga ha Murwa wawe, Yesu Kristo. U nga ri u vhala na u guda haṋu heyi bugu zwi nga ni thusa u vha na yeneyo nḓivho i ṋeaho vhutshilo! 1 Yohane 2:17; 1:7; Yohane 5:28, 29; 3:16; 17:3; 19:5; Luka 23:43; Genesi 1:28; 1 Vha-Korinta 15:24-28; Ndzumbululo 20:1-3, 6-10; 21:3, 4; Yesaya 9:5.

▪ Vhaponyoki vha Haramagedo na vhana vhavho vha ḓo vha na ndugelo ifhio i takadzaho?

▪ Ndi nnyi ane a ḓo ḓiphina nga Paradiso khathihi na vhaponyoki vha Haramagedo na vhana vhavho, nahone Yesu u ḓo vha navho nga muhumbulo ufhio?

▪ Vhuimo vhu ḓo vha vhufhio vhufheloni ha miṅwaha ya tshigidi, nahone nga tshenetsho tshifhinga Yesu u ḓo ita mini?

▪ Ndi ngani Sathane a tshi ḓo vhofhololwa mugodini, nahone mafheleloni hu ḓo itea mini nga hae na vhoṱhe vhane vha mu tevhela?

▪ Yesu a nga vha hani “Randalamo” washu?