Ndima Ya 99

Yesu U Funza Yeriko

NGA u ṱavhanya Yesu na magogo ane a khou tshimbila nae vha swika Yeriko, une wa vha muḓi une wa dzhia lwendo lwa ḓuvha ḽoṱhe u bva Yerusalema. Zwi vhonala uri Yeriko ndi miḓi mivhili, muḓi wa kale wa Tshiyuda ndi khilomithara na tshipiḓa u bva muḓini muswa wa Roma. Musi magogo a tshi lwela u wana nḓila ya u bva muḓini wa kale a tshi dzhena kha muswa, vhahumbeli vhavhili vha mabofu vha pfa phosho. Muṅwe wavho u pfi Baratimeo.

Musi vha tshi pfa uri ndi Yesu ane a khou fhira henefho, Baratimeo na khonani yawe vha thoma u vhidzelela: “Murena, Murwa-Davida, ri khathutshele!” Musi gogo ḽi tshi vha kaidza uri vha fhumule, vhone vha ḓi simesa u vhidzelela vha ri: “Murena, Murwa-Davida, ri khathutshele!”

A tshi pfa u thithiswa honoho, Yesu u a ima. A humbela vhane vha vha nae uri vha vhidze vhenevho vhane vha khou vhidzelela. Vhone vha ya kha havha vhahumbeli vha mabofu nahone vha amba na muṅwe wavho vha ri: “Takala, takuwa, u khou U vhidza.” O takala vhukuma, onoyo munna wa bofu a laṱa nguvho yawe, a takuwa, a ya ha Yesu.

Yesu u a vhudzisa: “Ni funa ndi tshi ni ita’ni?”

Mabofu mavhili a humbela a ri: “U bonyololwa maṱo ashu, Murena.”

A tshi vha pfela vhuṱungu, Yesu u kwama maṱo avho. U ya nga mafhungo a Marko, Yesu u amba na muṅwe wavho a ri: “Tshimbila zwau lutendo lwau lwo U tshidza.” Nga u ṱavhanya vhahumbeli vha mabofu vha dovha vha vhona, nahone lu sa timatimisi vhuvhili havho vha thoma u renda Mudzimu. Musi vhathu vhoṱhe vha tshi vhona zwe zwa itea, na vhone vha renda Mudzimu. Nga u ṱavhanya, Baratimeo na khonani yawe vha thoma u tevhela Yesu.

Musi Yesu a tshi fhira nga Yeriko, magogo ndi manzhi. Muṅwe na muṅwe u ṱoḓa u vhona we a fhodza vhanna vha mabofu. Vhathu vha pwanyeledza Yesu vha tshi bva kha masia oṱhe, nahone nga nṱhani ha zwenezwo, vhaṅwe a vha koni na u mu vhona na zwiṱukuṱuku. Muṅwe wavho ndi Saxeo, nduna ya vha lutho ngomu na nnḓa ha Yeriko. Ndi mupfufhisa lune a si kone u vhona zwine zwa khou itea.

Ngauralo Saxeo u gidimela phanḓa nahone a gonya kha muhuyu u re nḓilani ine Yesu a khou ḓa ngayo. Musi e hafha nṱha, u a kona u vhona zwavhuḓi tshiṅwe na tshiṅwe. Musi gogo ḽi tshi sendela tsini, Yesu a huwelela o sedza murini a ri: “Saxeo, ṱavhanya u tsa; ngauri ṋamusi ndi ri ndi dzhena nḓuni yau.” Saxeo a tsa nga u ṱavhanya o takala nahone a ṱavhanya a ya hayani u itela u lugiselela mueni wawe a re na bvumo.

Naho zwo ralo, musi vhathu vha tshi vhona zwine zwa khou itea, vhoṱhe vha thoma u gungula. Vha zwi dzhia zwi songo tea uri Yesu a vhe mueni wa munna o raloho. Ni a ḓivha, Saxeo o pfuma nga u kuvhanganya tshelede nga nḓila i songo fanelaho kha bindu ḽawe ḽa u thelisa.

Vhathu vhanzhi vha a tevhela, nahone musi Yesu a tshi dzhena nḓuni ya Saxeo, vha a gungula: “[U] dzhena nḓuni ya mu-ita-zwivhi.” Naho zwo ralo Yesu u vhona zwi tshi nga kha ḓi itea uri Saxeo a rembuluwe. Nahone Yesu ha nyabwi, ngauri Saxeo u a ima nahone a ḓivhadza: “Murena, vhona, thundu yanga ndi i khetha yoṱhe nga vhukati nda ṋea vhatshinyali; huno arali ndó fhura muthu ndi mu lifhela ka-ṋa.”

Saxeo u sumbedza uri u rembuluwa hawe ndi ha vhukuma nga u ṋea vhatshinyali iṅwe ya thundu yawe nahone iṅwe thundu a tshi lifhela vhe a vha fhura. Zwi vhonala uri a nga kona u vhalela u bva kha rekhodo dzawe dza muthelo uri u koloda avha vhathu mini. Ngauralo u a ana uri u ḓo i lifha ka-ṋa, a tshi vhulunga mulayo wa Mudzimu une wa ri: ‘Arali muthu a tshi nga tswa nngu nthihi, u fanela u i lifha nga nṋa dzi bvaho sambini ḽa nngu dzawe.’

Yesu u takadzwa nga nḓila ine Saxeo a fulufhedzisa u shumisa thundu yawe ngayo, ngauri U ri: “Ṋamusi nnḓu iyi yo shudufhala, ngauri na ene ndi ṅwana wa Abrahamu. Ngauri Murwa-muthu o ḓa u ṱoḓa na u tshidza vho xelaho.”

Zwenezwino, Yesu o fanyisa vhuimo ha “vho xelaho” na mafhungo awe a murwa o xelaho. Zwino ri na tsumbo ya vhukuma ya o xelaho o wanalaho. Naho vharangaphanḓa vha vhurereli na vhane vha vha tevhela vha tshi sasaladza nahone vha tshi gungula musi Yesu a tshi ṱhogomela vhathu vha ngaho Saxeo, Yesu u bvela phanḓa u ṱoḓa na u vhuyedzedza havha vharwa vha Abrahamu vho xelaho. Mateo 20:29-34; Marko 10:46-52; Luka 18:35–19:10; Ekisodo 22:1.

▪ Zwi vhonala uri ndi ngafhi hune Yesu a ṱangana na vhahumbeli vha mabofu, nahone u vha itela mini?

▪ Saxeo ndi nnyi, nahone ndi ngani a tshi gonya muri?

▪ Saxeo u sumbedza hani uri o rembuluwa?

▪ Ri nga guda mini kha nḓila ine Yesu a fara ngayo Saxeo?