Ndima Ya 42

Yesu U Kaidza Vhafarisei

ARALI a tshi khou pandela mimuya mivhi nga maanḓa a Sathane, Yesu u amba uri nga zwenezwo Sathane u ḓo vha a tshi ḓihanedza ene muṋe. U bvela phanḓa: “Ṱavhani muri wavhuḓi, huno u ḓo aṋwa mitshelo yavhuḓi. Muri u ḓihwa nga mitshelo.”

Ndi vhutsilu u amba uri mutshelo wavhuḓi une wa vha u pandela mimuya mivhi ndi nga ṅwambo wa uri Yesu u shumela Sathane. Arali mutshelo u wavhuḓi, muri u nga si vhe wo sina. Kha ḽiṅwe sia, mitshelo ya Vhafarisei yo sinaho ya u vhea Yesu milandu ya mazwifhi na u mu hanedza hu si na tshiitisi ndi vhuṱanzi ha uri vhone nga tshavho vho sina. Yesu u ambela nṱha: “Vhana vha dziṋowa ḓinwi! Zwivhuya ni nga zwi amba hani, huufha ni vhavhi? Zwo ḓalaho mbilu ndi zwiné mulomo wa amba.”

Samusi maipfi ashu a tshi sumbedza vhuimo ha mbilu dzashu, zwine ra amba zwi lugiselela mutheo wa khaṱulo. Yesu u ri: “Nga ḓuvha ḽa khaṱhulo vhathu vha ḓo sengiswa mafhungo oṱhe mavhi e vha amba. Mafhungo au ndi one ane a ḓo U landula; mafhungo au ndi one ane a ḓo U ṋea mulandu.”

Hu sa londwi mishumo yoṱhe ya maanḓa ya Yesu, vha maṅwalo na Vhafarisei vha a humbela: “Mufunzi, ri funa u vhona U tshi ita vhuṱolo.” Naho havha vhanna vha bvaho Yerusalema vha songo kona u vhona nga dzavho vhuṱolo hawe, vhuṱanzi vhu sa hanedzei ho vhonalaho malugana naho ho vha vhu hone. Nga zwenezwo Yesu u vhudza vharangaphanḓa vha Vhayuda uri: “Lushaka ulu luvhi lwa dziphaṱhi lu ṱoḓa vhuṱolo. A ni nga fhiwi vhuṱolo vhuṅwe, arali hú si vhuṱolo ha muporofita Yona.”

A tshi ṱalutshedza zwine a amba, Yesu u bvela phanḓa: “Ngauri sa zwiḽa Yona a tshi fhedza maḓuvha mararu na vhusiku hao é thumbuni ya khovhe-ya-vhimbi, na Murwa-muthu u ḓo fhedza maḓuvha mararu na vhusiku hao é mbiluni ya ḽifhasi.” Musi o no milwa nga khovhe, Yona o bvela nnḓa zwa nga o vuwa vhafuni, nga zwenezwo Yesu u khou dzula o amba uri u ḓo fa nahone nga ḓuvha ḽa vhuraru a vuswa a tshi tshila. Naho zwo ralo, vharangaphanḓa vha Vhayuda, naho musi Yesu nga murahu o ḓo vuswa vhafuni, vha hana “vhuṱolo ha muporofita Yona.”

Nga zwenezwo Yesu u amba uri vhathu vha Ninive vhe vha rembuluwa nga u funza ha Yona vha ḓo vuswa nga khaṱulo u itela u rovhedza Vhayuda vhe vha laṱa Yesu. Zwi ngaho zwenezwo, u vhambedza na khosi ya musadzi ya Sheba, we a ḓa a tshi bva kule u itela u pfa vhuṱali ha Salomo nahone a kanukiswa nga zwe a zwi vhona na zwe a zwi pfa. Yesu u ri: “Huno vhonani, a fhiraho Salomo u fhano.”

Zwenezwo Yesu u ṋea tshifanyiso tsha muthu ane mimuya mivhi ya bva khae. Naho zwo ralo, onoyo munna a si ḓadze honoho vhudzulo vhu si na tshithu nga zwithu zwavhuḓi, nga zwenezwo a ḓelwa nga miṅwe mimuya mivhi ya sumbe. Yesu u ri: “Ndi zwone zwine zwa ḓo ḓela lushaka luvhi luno.” Lushaka lwa Isiraele lwo kunakiswa nahone lwo tshenzhela u shandukiswa​—u fana na u ṱuwa ha tshifhinganyana ha muya muvhi. Fhedzi u hana ha lwonolwo lushaka vhaporofita vha Mudzimu, he ha ṋaṋa musi vha tshi hanedza Kristo nga dzawe, hu dzumbulula vhuimo vhuvhi halwo uri ndi vhuvhi u fhira mathomoni aho.

Musi Yesu a tshi khou amba, mme awe na vharathu vhawe vha ḓa vha ima nga thungo ha gogo. Nga zwenezwo muṅwe u ri: “Vhona, mme-au na vharathu vhau vho ima afho nnḓa, vha khou ṱoḓa u amba na iwe.”

Yesu u a vhudzisa: “Mme-anga ndi nnyi? Vharathu vhanga ndi vho-nnyi?” A tshi sumba vhafunziwa vhawe, u ri: “Vhona, mme-anga ngoyu! Vharathu vhanga ngevha! Ngauri vhoṱhe vha itaho zwi funwaho nga khotsi-anga wa ṱaḓulu, ndi vhone vharathu vhanga na khaladzi dzanga na mme-anga.” Nga heyi nḓila Yesu u sumbedza uri hu sa londwi uri vhushaka vhukati hawe na mashaka awe ndi ho khwaṱhaho lungafhani, ho khwaṱhaho u fhirisa ndi vhushaka hawe na vhafunziwa vhawe. Mateo 12:33-50; Marko 3:31-35; Luka 8:19-21.

▪ Ndi nga nḓila ifhio ine Vhafarisei vha kundwa u vha “mitshelo” na “muri” zwavhuḓi?

▪ “Vhuṱolo ha muporofita Yona” ndi vhufhio, nahone nga murahu ho landulwa hani?

▪ Ndi nga nḓila ifhio ine lushaka lwa Isiraele lwa ḓana ḽa u thoma ḽa miṅwaha lwo vha lu tshi nga munna we khae ha bva muya muvhi?

▪ Yesu u ombedzela hani vhushaka hawe ha tsini-tsini na vhafunziwa vhawe?