Ndima Ya 72

Yesu U Ruma vha 70

NDI tshilimo tsha 32 C.E., miṅwaha miraru yo ḓalaho u bva tshee Yesu a lovhedzwa. Ene na vhafunziwa vhawe vha kha ḓi bva Vhuṱamboni ha Mishasha ngei Yerusalema, nahone zwi vhonala vha tshee henefho tsini. Zwi re zwone ndi uri Yesu u fhedza vhunzhi ha miṅwedzi yo salaho ya rathi ya vhuḓinḓa hawe khamusi e Yudea kana seli ha Mulambo wa Yorodane tshiṱirikini tsha Perea. Heyi tsimu na yone i fanela u shuṅwa.

I ngoho, nga murahu ha Paseka ya 30 C.E., Yesu o fhedza miṅwedzi i ṱoḓaho u vha ya malo a tshi khou funza kha ḽa Yudea. Fhedzi musi Vhayuda vho no lingedza u mu vhulaha henengei nga Paseka ya 31 C.E., a fhedza ṅwaha u tevhelaho na tshipiḓa a tshi khou funza kha ḽa Galilea fhedzi. Vhukatini ha tshenetsho tshifhinga, o bveledza ndangulo khulwane ya vhahuweleli vho funzwaho zwavhuḓi, ye a vha a si nayo nga phanḓa. Zwino a thoma fulo ḽo khwaṱhaho ḽa u ṱanziela kha ḽa Yudea.

Yesu a thoma heḽi fulo nga u nanga vhafunziwa vha 70 nahone a vha ruma nga vhavhili nga vhavhili. Nga zwenezwo, hu na zwipano zwa 35 zwo ṱangana zwa vhahuweleli vha Muvhuso vhane vha ḓo shuma yeneyo tsimu. Havha vha ya hu tshee nga phanḓa muḓini muṅwe na muṅwe na fhethu hoṱhe, hune nga hu re khagala Yesu na vhaapostola vhawe vha khou lugiselela u ya hone.

Nṱhani ha u ruma vha 70 uri vha ye zwikoloni, Yesu u vha vhudza uri vha ye mahayani a vhathu, a tshi ṱalutshedza: “Musi ni tshi dzhena nḓuni, ni thome u ri: Kha hu vhe na mulalo kha iyi nnḓu. Arali henefho hú na mudzia-mulalo, mulalo waṋu u ḓo rathela kha ene.” Mulaedza wavho u fanela u vha ufhio? Yesu u ri: “Muvhuso wa Mudzimu wo ḓa tsini haṋu.” Malugana na mushumo wa vha 70, Matthew Henry’s Commentary i a vhiga: “U fana na Muṋe wavho, huṅwe na huṅwe he vha dala hone, vho funza nnḓu nga nnḓu.”

Ndaela dze Yesu a dzi ṋea vha 70 dzi ḓi fana na dze a dzi ṋea vha 12 musi a tshi vha ruma uri vha ye u funza ngei Galilea hu ṱoḓaho u vha nga ṅwaha wo fhiraho. Ha sokou sevha fhedzi nga ha u pikiswa hune vha 70 vha ḓo ṱangana naho, a tshi vha lugisela uri vha ambe hani na vhaṋe vha miḓi, fhedzi u vha ṋea maanḓa a u fhodza vha lwalaho. Nga zwenezwo, musi Yesu a tshi ḓo swika nga murahu, vhanzhi vha ḓo vha vho ḓiimisela u ṱanganedza Muṋe ane vhafunziwa vhawe vha kona u ita mishumo i mangadzaho nga u ralo.

U funza ha vha 70 na mushumo we Yesu a sala a tshi u ita zwo dzhia tshifhinga tshipfufhi. Nga u ṱavhanya zwipano zwa vha 35 zwa vhahuweleli vha Muvhuso vha thoma u vhuya ha Yesu. Vha amba nga dakalo vha ri: “Murena, na mimuya mivhi ri a i vhusa nga dzina ḽau.” Muvhigo wa tshumelo wavhuḓi nga u ralo vhukuma u takadza Yesu, ngauri u a aravha: “Iṱali ndó zwi vhona Sathane a tshi wa vhunga nḓadzi i tshi rwa i tshi bva ṱaḓulu. Vhonani, ndo ni ṋea maanḓa a u kanda kha maṋowa na kha dziphame.”

Yesu u a zwi ḓivha uri musi hu tshi bebwa Muvhuso wa Mudzimu nga tshifhinga tsha vhufhelo, Sathane na madimoni awe vha ḓo pandelwa ṱaḓulu. Fhedzi zwino hohu u pandelwa ha mimuya mivhi nga vhathu zwavho zwi khwaṱhisela vhukuma nga ha tshenetsho tshiitea tshine tsha khou ḓa. Nga zwenezwo, Yesu u amba nga ha u wa ha Sathane a tshi bva ṱaḓulu nga tshifhinga tshi ḓaho sa tshithu tshine tsha ḓo itea zwa vhukuma. Nga zwenezwo, ndi nga lwa pfanyisedzo uri vha 70 vho ṋewa maanḓa a u kandekanya maṋowa na dziphame. Naho zwo ralo, Yesu u ri: “Ni songo takalela zwiné mimuya mivhi ya vhuswa nga inwi, khwine takalelani zwe madzina aṋu a ṅwalwa ngei ṱaḓulu.”

Yesu o takala vhukuma nahone u renda khagala Khotsi awe nge a shumisa havha vhashumeli vhawe vha fhasi nga nḓila ya maanḓa nga u ralo. A tshi rembulutshela kha vhafunziwa vhawe, u ri: “Mashudu! maṱo ané a vhona zwiné na zwi vhona. Ngauri ndi a ni vhudza ndi ri: Vhaporofita vhanzhi na mahosi vho tama u vhona zwiné na zwi vhona, vha si zwi vhone. Vha tama u pfa zwiné na zwi pfa, vha si zwi pfe.” Luka 10:1-24; Mateo 10:1-42; Ndzumbululo 12:7-12.

▪ Ndi ngafhi he Yesu a funza hone vhukatini ha miṅwaha miraru ya u thoma ya vhuḓinḓa hawe, nahone ndi tsimu ifhio ine a i shuma miṅwedzini yawe ya rathi ya u fhedza?

▪ Yesu u ruma vha 70 u ya ngafhi u itela u wana vhathu?

▪ Ndi ngani Yesu a tshi ri o vhona Sathane o no wa a tshi bva ṱaḓulu?

▪ Vha 70 vha kandekanya maṋowa na dziphame nga muhumbulo-ḓe?