Ndima Ya 109

Yesu U Sasaladza Vhapikisi Vhawe

YESU o kunda vhapikisi vhawe vha vhurereli lune vha vho ofha u dovha u mu vhudzisa naho tshi tshini. Ngauralo u thoma u bvukulula u sa londa havho. U a vhudzisa: “Ni ri’ni nga Kristo? ndi murwa wa nnyi?”

Vhafarisei vha a fhindula: “Wa Davida.”

Naho Yesu a sa hanedzi uri Davida ndi makhulu wa vhukuma wa Kristo, kana Messia, u a vhudzisa: “Davida a nga ri hani é Muyani [Psalme ya 110] a tshi rédza ene a mu ita Murena, a tshi ri: Murena o amba na Murena wanga a ri: Dzula thungo ya tshanḓa tshihulu, ndi vhee maswina au tsini ha milenzhe yau! Arali zwino Davida a tshi rédza ene, a mu ita Murena wawe, a nga vha murwa wawe hani?”

Vhafarisei vha a fhumula, ngauri a vha ḓivhi zwine Kristo, kana muḓodzwa, a ḓo vhonala ngazwo zwa vhukuma. Messia ha sokou vha muḓuhulu zwawe wa muthu wa Davida, samusi zwi tshi vhonala Vhafarisei vha tshi tenda nga u ralo, fhedzi o tshila ṱaḓulu nahone o vha e muhulwane, kana Murena wa Davida.

Zwino a tshi amba na vha magogo na vhafunziwa vhawe, Yesu u sevha nga ha vha maṅwalo na Vhafarisei. Samusi vhenevha vha tshi funza Mulayo wa Mudzimu, ‘vho dzula kha tshidzulo tsha Mushe,’ Yesu u a khadeledza: “Zwoṱhe zwiné vha ni vhudza ni zwi ite, ni vha pfe.” Fhedzi u a engedza: “Hone, ni songo edza mishumo yavho; ndi vhadzia-u-amba, vha fhedza vha si ite.”

Ndi vhadzia muhoyo, nahone Yesu u vha sasaladza nga nḓila i fanaho na ye a ita ngayo musi e nḓuni ya vhuḽelo ya muṅwe Mufarisei miṅwedzini yo fhiraho. U ri: “Mishumo yavho yoṱhe vha i itela u vhonwa nga vhathu.” Nahone u ṋea tsumbo, a tshi swaya hezwi:

“Vha rabela vho fara maṅwalo mahulu.” Hezwi zwikwama zwiṱuku, zwine zwa vhofhelelwa kha phanḓa kana kha tshanḓa, zwi na zwipiḓa zwiṋa zwa Mulayo: Ekisodo 13:1-10, 11-16; na Doiteronomio 6:4-9; 11:13-21. Fhedzi Vhafarisei vha hulisa hezwi zwikwama u itela u sumbedza uri vha fhisetshela Mulayo.

Yesu u bvela phanḓa nga uri vha “ṱongisa dziphendelo dza nguvho.” Kha Numeri 15:38-40 Vhaisiraele vha laedzwa uri vha ite dziṱhodzi kha nguvho dzavho, fhedzi Vhafarisei vha ita dzavho dza vha khulwanesa u fhira dza vhaṅwe. Tshiṅwe na tshiṅwe tshi itelwa mmboneni! Yesu u a ḓivhadza: “Vha tama u dzudzwa bvungwi.”

Zwi pfisaho vhuṱungu ndi uri vhafunziwa vhawe vho kwamiwa nga holu lutamo lwa u vha vhahulwane. Ngauralo u a eletshedza: “Inwi ni songo tenda u pfi Rabi, ngauri mufunzi waṋu ndi muthihi, inwi noṱhe ni vharathu na vhakomana. Ni songo tenda u pfi Khotsi fhano shangoni, ngauri khotsi-aṋu ndi muthihi a re ngei ṱaḓulu. Ni songo tenda u pfi Vha-ranga-phanḓa, ngauri mu-ranga-phanḓa waṋu ndi muthihi, ndi Kristo.” Vhafunziwa vha fanela u litsha muya wa u tama u vha vha u thoma! Yesu u a khuthadza: “Muhulwane kha inwi nga a vhe mushumeli waṋu.”

Lu tevhelaho u ḓivhadza mutevhe wa dzikhombo kha vha maṅwalo na Vhafarisei, a tshi vha vhidza lunzhi-lunzhi uri ndi vhadzia u ḓifhura. Vha ‘hoṋela vhathu muvhuso wa ṱaḓulu’ u ri, nahone “vha ḽa dzinnḓu dza dzitshilikadzi vha kanganyedza nga thabelo ndapfu.”

Yesu u ri: “Khombo, inwi vhasumbedzi vha nḓila ni re mabofu.” U sasaladza u sa vha na ndeme dza muya ha Vhafarisei, hune ha vhonala nga u ḓiṱongisa hune vha hu ita. Sa tsumbo, vha ri, ‘Muthu a tshi ana nga nnḓu khethwa, a huna mulandu, fhedzi ndi a anaho nga musuku wa nnḓu khethwa a re na mulandu.’ Nga u ombedzelesa havho musuku wa nnḓu khethwa u fhirisa ndeme ya muya ya henefho fhethu ha vhurereli, vha khou dzumbulula vhupofu havho ha vhuḓilisi.

Nga zwenezwo, samusi o zwi ita u thomani, Yesu u sasaladza Vhafarisei nge vha litshelela “zwihulwane kha mulayo zwi ngaho: khaṱhulo na khathutshelo na lutendo” vha tshi ṱhogomela nga maanḓa u bvisa tsha fumi, kha miroho miṱukuṱuku.

Yesu u vhidza Vhafarisei uri ndi ‘vhasumbedzi vha nḓila vha ré mabofu! vha miṋaho vhunyunyu vha mila gamela.’ Vha miṋa vhunyunyu kha veine yavho hu si nga ṅwambo wa uri ndi tshikhokhonono, fhedzi ngauri a ho ngo kuna nga lwa mulayo. Nga zwenezwo, u sa ṱhogomela havho zwithu zwihulwane zwa Mulayo zwi fanyiswa na u mila gamela, ine na yone ya vha tshipuka tshi songo kunaho nga lwa mulayo. Mateo 22:41–23:24; Marko 12:35-40; Luka 20:41-47; Levitiko 11:4, 21-24.

▪ Ndi ngani Vhafarisei vha tshi fhumula musi Yesu a tshi vha vhudzisa nga ha zwe Davida a amba kha Psalme ya 110?

▪ Ndi ngani Vhafarisei vha tshi hudza zwikwama zwavho zwa Maṅwalo na phendelo dza nguvho dzavho?

▪ Ndi nyeletshedzo ifhio ine Yesu a i ṋea vhafunziwa vhawe?

▪ Vhafarisei vha ḓiṱongisa nga mini, nahone Yesu u vha sasaladza hani nge vha si londe zwithu zwa ndeme?