Ndima Ya 96

Yesu na Muvhusi Muswa o Pfumaho

MUSI Yesu a tshi tshimbila nga vhukati ha tshiṱiriki tsha Perea o livha Yerusalema, muṅwe muṱhannga a mu gidimela a ḓa a gwadama phanḓa hawe. Onoyo munna u vhidzwa muvhusi, khamusi zwi tshi amba uri u na vhuimo ha nṱha tshikoloni tsha henefho kana uri ndi muraḓo wa Gota. Zwiṅwe hafhu, o pfuma vhukuma. U a vhudzisa: “Mufunzi wavhuḓi! Ndi ḓo ita mini uri ndi ḽe ifa ḽa vhutshilo vhu sa fheli?”

Yesu u a fhindula: “Ndi mini U tshi ṋyamba, wa ri: wavhuḓi? A huna wavhuḓi arali e si Mudzimu fhedzi.” Zwi vhonala uri onoyo muṱhannga u shumisa “wavhuḓi” sa mutupo, nga zwenezwo Yesu u mu ḓivhisa uri wonoyo mutupo ndi wa Mudzimu fhedzi.

Yesu u bvela phanḓa: “Hone arali U tshi funa u dzhena vhutshiloni, ita zwiné milayo ya amba.”

Onoyo munna u a vhudzisa: “Ifhio?”

A tshi redza u bva kha Milayo ya Fumi, Yesu u a fhindula: “U songo vhulaha; U songo vha phombwe; U songo tswa; U songo amba vhuṱanzi ha u zwifha; hulisa khotsi-au na mme-au.” Nahone a tshi engedza ndaela i re khulwane vhukuma, Yesu u ri: “U fune wa haṋu vhunga U tshi ḓi-funa.”

Onoyo munna a fhindula nga u fushea tshoṱhe: “Izwo ndo zwi londa zwoṱhe u bva hanani hanga; ndo ṱahelelwa nga’ni?”

A tshi thetshelesa mbudziso yo khwaṱhaho na i bvaho mbiluni ya onoyo munna, Yesu a mu funa. Fhedzi Yesu u vhona u farelela ha onoyo munna kha zwithu zwi vhonalaho nahone nga zwenezwo a mu sumbedza zwine a zwi shaya: “Wo salelwa nga tshithihi. Tshimbila U yo rengisa zwoṱhe zwiné wa vha nazwo’, U fhe vhatshinyali; ndi hone U tshi ḓo vha na lupfumo ngei ṱaḓulu; U kone u ḓa U ntevhele.”

Yesu u sedza onoyo munna nga u mu pfela vhuṱungu, musi a tshi mu vhona a tshi takuwa a ṱuwa o ṱungufhala vhukuma. Lupfumo lwawe lwo mu swingisa uri a si vhone ndeme ya lupfumo lwa vhukuma. Yesu u amba nga u pfa vhuṱungu: “Kha mupfumi u dzhena muvhusoni wa Mudzimu a si u konḓa hazwo!”

Maipfi a Yesu a kanukisa vhafunziwa. Fhedzi vha kanuka vhukuma musi a tshi bvela phanḓa u amba haya maitele a angaredzaho: “Mupfumi, u dzhena muvhusoni wa Mudzimu zwi a konḓa; zwi fhira gamela i tshi ri ndi dzhena nga lubuli lwa luunzhi.”

Vhafunziwa vha ṱoḓa u ḓivha uri: “Hu kha ḓi ḓo tshidzwa nnyi-ha?”

O vha lavhelesa, Yesu u a fhindula: “Kha vhathu a zwi konei; hu kona Mudzimu; ngauri Mudzimu u kona zwoṱhe.”

A tshi ṱhogomela uri vho ita khetho yo fhambanaho vhukuma na ya muvhusi muswa o pfumaho, Petro u ri: “Khezwi, riṋe ro ṱutshela zwoṱhe, ra U tevhela.” Nga zwenezwo u a vhudzisa: “Tshiné ra ḓo tshi wana ndi mini?”

Yesu u a fulufhedzisa: “Ngoho ndi a ni vhudza ndi ri: inwi no ntevhelaho, musi wa u bebwa-hafhu, musi Murwa-muthu a tshi ḓo dzula kha khuluṋoni ya vhurena hawe, na inwi ni ḓo dzula kha khuluṋoni fumi na mbili na sengisa tshakha fumi na mbili dza Isiraele.” Ee, Yesu u khou sumbedza uri hu ḓo vha na u sikwa hafhu ha zwiimo kha ḽifhasi u itela uri zwithu zwi nge samusi zwo vha zwo ralo tsimuni ya Edeni. Nahone Petro na vhaṅwe vhafunziwa vha ḓo ṱanganedza malamba a u vhusa na Kristo ḽino ḽifhasi ḽa Paradiso. Vhukuma, malamba mahulwane nga u ralo o fanelwa nga u ṅala naho tshi tshini!

Naho zwo ralo, na zwino malamba a hone, samusi Yesu a tshi amba nga u tou khwaṱhisa: “Ané a ṱutshela muṱa, na vharathu, na khaladzi, na khotsi-awe na mme-awe, na musadzi na vhana, na masimu, a zwi ṱutshela a tshi itela nṋe na mafhungo-maḓifha. Haho’ ané tshithihi tshazwo tshi sa ḓo vhumbiwa nga ḓana; zwino vhutshiloni vhuno u ḓo wana dzinnḓu, na vharathu, na khaladzi, na vho-mme, na vhana, na one maṱhupho; tshifhingani tshi ḓaho u ḓo wana vhutshilo vhu sá fheli.”

Samusi Yesu a tshi fulufhedzisa, naho hu ngafhi he vhafunziwa vhawe vha ya hone, vha ḓiphina nga vhushaka na Vhakriste ngavho vhune ha vha ha tsini na vhu re ha ndeme u fhirisa vhune vha ḓiphina ngaho na miraḓo ya ṋama ya miṱa yavho. Zwi vhonala uri muvhusi muswa o pfumaho u xelelwa nga haya malamba khathihi na a vhutshilo vhu sa fheli Muvhusoni wa Mudzimu wa ṱaḓulu.

Nga murahu Yesu u a engedza: “Vhanzhi vha re ma-ranga-phanḓa vha ḓo vha dzitsalela; dzitsalela dzi ḓo vha ma-ranga-phanḓa.” U amba mini?

U amba uri vhathu vhanzhi vha re “ma-ranga-phanḓa” kha u ḓiphina nga ndugelo dza vhurereli, sa muvhusi muswa o pfumaho, a vha nga dzheni Muvhusoni. Vha ḓo vha “dzitsalela.” Fhedzi vhanzhi, u katela na vhafunziwa vha Yesu vha ḓiṱukufhadzaho, vhane vha sedzelwa fhasi nga Vhafarisei vhane vha ḓiita vho lugaho vha tshi vha ita “dzitsalela”​—sa vhathu vha ḽifhasi, kana ‛am ha·’aʹrets—​vha ḓo vha “ma-ranga-phanḓa.” U vha havho “ma-ranga-phanḓa” zwi amba uri vha ḓo ṱanganedza ndugelo ya u vha vhavhusi na Kristo Muvhusoni. Marko 10:17-31; Mateo 19:16-30; Luka 18:18-30.

▪ Nga hu re khagala, uyu muṱhannga o pfumaho ndi mufuda-ḓe wa muvhusi?

▪ Ndi ngani Yesu a tshi hana u vhidzwa uri ndi wavhuḓi?

▪ Tshenzhelo ya muvhusi ane a kha ḓi vha muswa i sumbedza hani khombo ya u pfuma?

▪ Ndi malamba afhio ane Yesu a a fulufhedzisa vhatevheli vhawe?

▪ Vha re marangaphanḓa vha vha hani tsalela, nahone tsalela dza vha hani marangaphanḓa?