Ndima Ya 7

Yesu na Vhaḓivhi vha Ṋaledzi

TSHIGWADA tsha vhanna tshi ḓa tshi tshi bva Vhubvaḓuvha. Ndi vhaḓivhi vha ṋaledzi​—vhathu vhane vha ḓiamba uri vha a ṱalutshedza vhuimo ha ṋaledzi. Musi vha kha ḓi vha hayani Vhubvaḓuvha, vha vhona ṋaledzi ntswa, nahone vha i tevhela khilomithara dza maḓana u bva Yerusalema.

Musi vhaḓivhi vha ṋaledzi vha tshi swika Yerusalema, vha a vhudzisa: “Khosi ya Vha-Yuda i tsha ḓi bva u bebwa i ngafhi? Ro vhona ṋaledzi yawe Vhubvaḓuvha; zwino ro ḓa u mu losha.”

Musi Khosi Herode wa Yerusalema a tshi pfa hezwi, u a sinyuwa vhukuma. Ngauralo u vhidza vhotshifhe vhahulu nahone u vha vhudzisa hune Kristo a ḓo bebelwa hone. Vho thea phindulo yavho Maṅwaloni, vha a fhindula: “Betlehema.” Nga zwenezwo, Herode a ita uri vhaḓivhi vha ṋaledzi vha ḓiswe ha ene nahone u vha vhudza uri: “Tshimbilani ni vhudzisese ṅwana huné a vha hone. Arali no mu wana, ni mbudze, na nṋe ndi ḓe-vho ndi mu loshe.” Fhedzi, vhukuma, Herode u ṱoḓa u wana ṅwana uri a mu vhulahe!

Musi vho no ṱuwa, hu itea tshithu tshi akhamadzaho. Ṋaledzi ye vha i vhona musi vha kha ḓi vha Vhubvaḓuvha i tshimbila phanḓa havho. Zwi khagala uri heyi a si ṋaledzi yo ḓoweleaho, fhedzi yo ṋewa nga ho khetheaho u itela u vha endedza. Vhaḓivhi vha ṋaledzi vha bvela phanḓa u i tevhela u swikela i tshi ima nṱha ha nnḓu ine Yosefa na Maria vha khou dzula khayo.

Musi vhaḓivhi vha ṋaledzi vha tshi dzhena nḓuni, vha wana Maria na lushie lwawe, Yesu. Zwenezwo vhoṱhe vha a mu losha. Nahone ngomu zwikwamani zwavho vha bvisa mpho dza misuku, na dza miri ya zwioro, na dza dziṋonzhe dza mishonga. Nga murahu ha zwenezwo, musi vha tshi vho ṱoḓa u humela murahu na u vhudza Herode hune ṅwana a vha hone, vha a sevhiwa nga Mudzimu muloroni uri vha songo ita zwenezwo. Ngauralo vha humela shangoni ḽa havho nga iṅwe nḓila.

Ni humbula uri ndi nnyi we a ṋea ṋaledzi ine ya khou tshimbila makoleni u endedza vhaḓivhi vha ṋaledzi? Humbulani, ṋaledzi a yo ngo vha livhisa nga ho livhaho ha Yesu Betlehema. Nṱhani hazwo, vho iswa Yerusalema he vha vhonana na Khosi Herode, we a ṱoḓa u vhulaha Yesu. Nahone o vha a tshi ḓo ita nga u ralo arali Mudzimu a songo thithisa nahone a sevhela vhaḓivhi vha ṋaledzi uri vha si vhudze Herode he Yesu a vha e hone. Ḽo vha ḽi swina ḽa Mudzimu, Sathane Diabolo, we a vha a tshi ṱoḓa uri Yesu a vhulahwe, nahone o shumisa yeneyo ṋaledzi u itela u lingedza u vuledza ndivho yawe. Mateo 2:1-12; Mixa 5:2.

▪ Ndi mini tshi sumbedzaho uri ṋaledzi ye vhaḓivhi vha ṋaledzi vha i vhona yo vha i si ṋaledzi yo ḓoweleaho?

▪ Yesu u ngafhi musi vhaḓivhi vha ṋaledzi vha tshi mu wana?

▪ Ndi ngani ri tshi zwi ḓivha uri Sathane o bveledza ṋaledzi u itela u endedza avha vhaḓivhi vha ṋaledzi?