Ndima Ya 37

Yesu u Fhelisa Vhuṱungu ha Tshilikadzi

NGA u ṱavhanya musi Yesu o no fhodza muḓinḓa wa nduna ya mmbi, u ya Naini, muḓi u re vhukule ha khilomithara dzi ṱoḓaho u vha 32 u ya tshipembe-vhukovhela ha Kapernaume. Vhafunziwa vhawe na vha gogo ḽihulu vha nae. Khamusi ḽi vho ṱoḓa u kovhela musi vha tshi swika nnḓa ha Naini. Hafha vha wana vhathu vha tshi ya mavhiḓani. Tshitumbu tsha muṱhannga tshi khou bviselwa nnḓa ha muḓi u itela u vhulungwa.

Vhuimo ha mme vhu khaula mbilu vhukuma, samusi e tshilikadzi nahone uyu e murwa wawe muthihi fhedzi. Musi munna wawe a tshi fa, o khuthadzea nge a ḓivha uri u na murwa wawe. Mafulufhelo awe, madzangalelo awe, na vhuhovheleli hawe zwo vha zwi kha vhumatshelo ha onoyo murwa. Fhedzi zwino a hu na ane a mu khuthadza. U vhuṱunguni vhuhulu musi vhathu vha muḓini vha tshi mu fhelekedza mavhiḓani.

Musi Yesu a tshi vhona onoyo mufumakadzi, mbilu yawe ya khathuwa a tshi vhona vhuṱungu hawe. Ngauralo nga vhulenda, fhedzi na nga maanḓa ane a ṋea fulufhelo, u ri khae: “U songo lila!” Nḓila ye a ita ngayo i kokodza ṱhogomelo ya gogo. Nga zwenezwo musi a tshi sendela nahone a tshi kwama hingo ḽe ḽa vha ḽo hwala tshitumbu, vhe vha vha vho ḽi hwala vha ima. Vhoṱhe vha fanela u vha vho ḓivhudzisa uri u ḓo ita mini.

Ndi ngoho uri vhe vha vha vhe na Yesu vho mu vhona a tshi fhodza lwa vhuṱolo vhathu vhanzhi vha lwalaho. Fhedzi zwi vhonala uri a vha athu u vhona a tshi vusa naho e nnyi vhafuni. Naa a nga ita tshithu tsho raloho? A tshi amba na tshitumbu, Yesu u a laedza: “Muṱhanngana, ndi a U vhudza ndi ri: Vuwa!” Huno uyo muṱhannga a vuwa! U thoma u amba, nahone Yesu u mu ṋea mme awe.

Musi vhathu vha tshi vhona uri onoyo muṱhannga u a tshila zwa vhukuma, vha thoma uri: “Ho vuswa muporofita muhulu kha riṋe.” Vhaṅwe vha ri: “Mudzimu o dalela vhathu vhawe.” Nga u ṱavhanya mafhungo malugana na hetshi tshiitea tshi kanukisaho a phaḓalala kha ḽa Yudea ḽoṱhe na mashangoni o ṋekanaho masakha naḽo.

Yohane Mulovhedzi u tshee khothoni, nahone u ṱoḓa u ḓivha zwinzhi nga ha mishumo ya Yesu ine a khou i ita. Vhafunziwa vha Yohane vha mu vhudza nga ha hovhu vhuṱolo. U aravha hani? Luka 7:11-18.

▪ Hu khou itea mini musi Yesu a tshi sendela Naini?

▪ Yesu u kwamea hani nga zwine a zwi vhona, nahone u ita mini?

▪ Vhathu vha aravha hani kha vhuṱolo ha Yesu?