Ndima Ya 52

Yesu u Fusha Vha Zwigidi lwa Vhuṱolo

VHAAPOSTOLA vha 12 vho ḓiphina nga lwendo lwa u funza kha ḽa Galilea ḽoṱhe. Zwino, nga u ṱavhanya musi Yohane o no vhulahwa, vha vhuyelela ha Yesu vha mu anetshela nga ha tshenzhelo dzavho dzi takadzaho. A tshi vhona uri vho neta na uri vhathu vhanzhi vha khou ḓa vha tshi ṱuwa na uri a vha na na tshifhinga tsha u ḽa, Yesu u ri: “Nḓarieni, ri ṱuwe rí roṱhe ri ye sogani uri ri yo awela zwiṱuku.”

Vha tshi dzhena gungwani ḽavho, khamusi tsini na Kapernaume, vha livha fhethu ho itaho soga, zwi vhonala uri ndi vhubvaḓuvha ha Yorodane phanḓa ha Betsaida. Naho zwo ralo, vhathu vhanzhi vha a vha vhona vha tshi ṱuwa, nahone vhaṅwe vha a zwi pfa. Havha vhoṱhe vha gidima phanḓa nga vhugabeloni, nahone musi gungwa ḽi tshi swika, vhathu vho vha vho no swika uri vha vha ṱanganedze.

A tshi tsa gungwani nahone a tshi vhona gogo ḽihulu, Yesu a vha pfela vhuṱungu ngauri vhenevho vhathu vha nga nngu dzi si na mulisa. Ngauralo u fhodza vhalwadze vhavho nahone a thoma u vha funza zwithu zwinzhi.

Tshifhinga tshi ṱavhanya u fhela, nahone vhafunziwa vha Yesu vha ḓa ha ene vha ri: “Fhethu afha ndi sogani; ḓuvha ḽi vho ṱoḓa u kovhela; onesa avha vhathu, vha ye miḓanani na miḓini i re tsini, vha ḓirengele zwiḽiwa.”

Naho zwo ralo, a tshi fhindula Yesu u ri: “Vha fheni zwiḽiwa vho-inwi.” Nga zwenezwo, samusi Yesu o vha a tshi vho ḓivha zwe a vha a tshi ḓo ita, a linga Filipo nga u mu vhudzisa uri: “Vhuswa ri vhu renga’fhi uri avha vhathu vha ḽe?”

U ya nga mavhonele a Filipo zwi vhonala zwi sa konadzei. Ee, hu na vhanna vha ṱoḓaho u vha 5 000, na vhathu vha fhiraho 10-​000 hu tshi vhaliwa vhafumakadzi na vhana! Filipo u fhindula nga uri “zwinnkwa zwa masheleni [denarius ine ya vha muholo wa ḓuvha ḽiṱhihi] a maḓana mavhili vha nga ṱáhela, naho vhó ṋewa kupiḓa-kupiḓa.”

Khamusi u sumbedza uri a zwi konadzei u fusha vhathu vhanzhi nga u ralo, Andrea u ḓifunela u ita zwiṅwe: “Hu na muṱhanngana fhano a re na magaku maṱanu a luvhele na khovhenyana mbili,” a dovha a ri, “huno izwo ndi mini kha vhangafha-ngafha?”

Samusi tshi tshilimo, nga phanḓanyana ha Paseka ya 32 C.E., hu na hatsi vhunzhi vhudala. Ngauralo Yesu u ri vhafunziwa vhawe vha dzudze vhathu hatsini nga zwigwada zwa 50 na zwa 100. U dzhia magaku maṱanu na khovhe mbili, a lilala ṱaḓulu, a livhuha. Zwenezwo a thoma u ṅwatekanya eneo magaku nahone a fhandekanya khovhe dzenedzo. U zwi ṋea vhafunziwa vhawe, vhone vha zwi ṋea vhathu. Zwi mangadzaho ndi uri vhathu vhoṱhe vha a ḽa u swikela vha tshi fushea!

Nga murahu Yesu u vhudza vhafunziwa vhawe uri: “Kuvhanganyani matshakatshaka o salaho, hu si tshinyale tshithu.” Musi vha tshi ralo, vha ḓadza zwirundu zwa 12 nga masalela a zwe vha vha vha tshi khou ḽa! Mateo 14:13-21; Marko 6:30-44; Luka 9:10-17; Yohane 6:1-13.

▪ Ndi ngani Yesu a tshi ṱoḓa uri vhaapostola vhawe vha vhe fhethu ho dzumbamaho?

▪ Yesu u ya na vhafunziwa vhawe ngafhi, fhedzi ndi ngani zwi sa konadzei uri vha awele?

▪ Musi ḽi tshi vho kovhela, vhafunziwa vha kombetshedza mini, fhedzi Yesu u ṱhogomela hani vhenevho vhathu?