Ndima Ya 82

Yesu u Livha Yerusalema Hafhu

YESU u nḓilani hafhu nga u ṱavhanya, u khou funza miḓini na miḓanani. Zwi vhonala uri u tshiṱirikini tsha Perea, vhukati ha Mulambo wa Yorodane u bva Yudea. Fhedzi hune a khou ya hone ndi Yerusalema.

Pfunzo ya maṱali ya Vhayuda ya uri ndi vha si gathi fhedzi vhane vha ḓo tshidzwa khamusi ndi yone ine ya ṱuṱuwedzela muṅwe munna u vhudzisa: “Murena, vhane vha ḓo tshidzwa a si vhanzhi nangoho?” Nga phindulo yawe, Yesu u kombetshedza vhathu u humbula zwine zwa ṱoḓea u itela u tshidzwa: “Itani maanḓa [ndi uri, u ombana nazwo, kana u pfa vhuṱungu] uri ni dzhene nga muṋango muṱuku.”

Vhuḓidini vhuhulwane nga u rali ho ṱavhanyiswa “ngauri . . . vhanzhi,” Yesu u a bvela phanḓa, “vha ḓo linga u dzhena, vha kundwa.” Ndi ngani vha tshi ḓo kundwa? U a ṱalutshedza uri “musi muṋe wa nnḓu o no takuwa a hoṋa muṋango, ndi hone vha tshi ḓo ḓa vha ima nnḓa vha omba-omba vothi vha ri: Murena, Murena, ri vulele! Ene a ḓo fhindula a ri: A thi ni ḓivhi hune na bva hone! nṱutsheleni inwi vha-ita-zwivhi!”

Vhe vha hoṋelwa nnḓa zwi vhonala uri vha ḓa nga tshifhinga tshine vha tshi funa. Fhedzi nga tshenetsho tshifhinga muṋango wa tshibuli wo valiwa nahone wa hoṋiwa. Uri vha dzhene, vho vha vho fanela u ṱavhanya u ḓa, naho hu uri nga tshenetsho tshifhinga zwo vha zwi tshi nga vha zwi songo tea u ita nga u ralo. Vhukuma, mvelelo i ṱungufhadzaho i ḓo wela vhane vha litsha u ita vhurabeli ha Yehova ndivho yavho khulwane vhutshiloni!

Vhayuda vhe Yesu a rumiwa u vha shumela, vhunzhi havho, vho kundwa u shumisa tshibuli tshavho tshi mangadzaho tsha u ṱanganedza ndugiselelo ya Mudzimu ya u tshidzwa. Nga zwenezwo Yesu u ri vha ḓo lila na u shenganya maṋo musi vha tshi poselwa nnḓa. Kha ḽiṅwe sia, vhathu vha bvaho “thungo ya Vhubvaḓuvha na thungo ya Vhukovhela, na vha thungo ya nṱha na thungo ya ḓasi,” ee, vha bvaho kha tshaka dzoṱhe, “vha ḓo ḓa vha dzula zwiḽiwani muvhusoni wa Mudzimu.”

Yesu u a bvela phanḓa: “Hu’ na vha re ma–ranga-phanḓa [Vhayuda vha thakhiwaho kha zwithu zwi vhonalaho na kha zwa vhurereli] vhane vha ḓo vha tsalela; hu’ na tsalela [vha si Vhayuda vha nyadziwaho, u katela na Vhayuda vha tsikeledzwaho] dzine dza ḓo vha ma-ranga-phanḓa.” U vha havho tsalela zwi amba uri vhenevho vhadzia-u-bvafha, vha sa livhuhi a vha nga vhi Muvhusoni wa Mudzimu na kathihi.

Zwino Vhafarisei vha ḓa kha Yesu nahone vha ri: “Ṱuwa fhano U ye huṅwe; ngauri Herode [Antipas] u ṱoḓa u U vhulaha.” Hu nga vha hu uri Herode nga dzawe o thoma heyi phungo u itela uri Yesu a shavhe henefho fhethu. Herode a nga vha o ofha u ṱanganela kha lufu lwa muṅwe muporofita wa Mudzimu samusi o ṱanganela kha u vhulahwa ha Yohane Mulovhedzi. Fhedzi Yesu u vhudza Vhafarisei uri: “Tshimbilani ni yo vhudza iyo phunguhwe ni ri: Vhona, ndi pandela mimuya mivhi, ndi fhodza vhathu ṋamusi na matshelo; mbamatshelo ndi ḓo vuledza.”

Musi o no fhedza mushumo wawe henefho, Yesu u bvela phanḓa na lwendo lwawe o livha Yerusalema ngauri, samusi a tshi ṱalutshedza, “muporofita tshawe ndi u vhulahwa Yerusalema, a si huṅwe.” Ndi ngani zwi tshi fanela u lavhelelwa uri Yesu o vha a tshi ḓo vhulahwa Yerusalema? Ngauri Yerusalema ndi wone musanda, hune khothe khulwane ya miraḓo ya 71 ya Gota ya vha hone na hune zwiṱhavhelo zwa zwifuwo zwa ṋekedzwa hone. Nga zwenezwo, zwo vha zwi sa ḓo tendelwa uri “Ngwana ya Mudzimu” i vhulahwe naho hu ngafhi, fhedzi Yerusalema.

Yesu u a lila, “Hee Yerusalema, Yerusalema! iwe U vhulahaho vhaporofita, iwe U kanḓaho nga matombo vho rumiwaho ha iwe; ndi ka-nzhi ndi tshi linga u kuvhanganya vhana vhau sa tshiṋoni tshi tshi fukedza tshiṱaha tshatsho nga phapha, inwi na hana. Vhonani, nnḓu yaṋu i ḓo sala í shubi ḽaṋu.” Nga u landula Murwa wa Mudzimu, lwonolwo lushaka lu a haṱulwa!

Musi Yesu a tshi bvela phanḓa o livha Yerusalema, u rambiwa nḓuni ya muvhusi wa Vhafarisei. Ndi Sabatha, nahone vhathu vha khou mu sedzesa nga maanḓa, samusi hu na muthu o kukumuwaho muvhili, o kuvhanganaho maḓi zwanḓani na milenzheni. Yesu u amba na Vhafarisei na vhaḓivhi vha Mulayo vha re hone, a tshi vhudzisa: “Naa u fhodza muthu nga Sabatha ndi zwavhuḓi naa, kana a si zwavhuḓi?”

Vha fhumula. Nga zwenezwo Yesu a fhodza onoyo munna nahone a ri a ṱuwe. Nga zwenezwo u a vhudzisa: “Ndi nnyi kha inwi ané murwa wawe, namusi i phulu zwayo, yo’ wela khunḓani, ané a si ṱavhanye a i bvisa nga ḓuvha ḽa Sabatha?” Ha dovha ha si fhindule muthu. Luka 13:22–14:6; Yohane 1:29.

▪ Ndi mini tshine Yesu a sumbedza uri tshi a ṱoḓea u itela u tshidzwa, nahone ndi ngani vhanzhi vho valelwa nnḓa?

▪ Ndi dzifhio “tsalela” dzine dza vha ma-ranga-phanḓa, na “ma-ranga-phanḓa” ane a vha tsalela?

▪ Ndi ngani ho ambiwa uri Herode u ṱoḓa u vhulaha Yesu?

▪ Ndi ngani zwi sa tendelwi uri muporofita a vhulahwe nnḓa ha Yerusalema?