Ndima Ya 11

Yohane U Lugisa Nḓila

MIṄWAHA ya fumisumbe yo no fhira u bva Yesu a tshee ṅwana wa miṅwaha ya 12 a tshi khou vhudzisa vhafunzi nḓuni khethwa. Ndi tshimedzi tsha ṅwaha wa 29 C.E., nahone hu tou nga vhathu vhoṱhe, vha khou amba nga ha Yohane muzwala wa Yesu, ane a khou huwelela shangoni ḽoṱhe u mona na Mulambo wa Yorodane.

I ngoho Yohane ndi muthu a mangadzaho, nga mbonalo khathihi na nga maambele. Tshiambaro tshawe ndi tsha vhukuse ha gamela, nahone u ḓivhofha khundu nga luzwa. Zwiḽiwa zwawe ndi nzie na ṋotshi dza ḓaka. Nahone mulaedza wawe ndi ufhio? “Shandukani, ngauri muvhuso wa ṱaḓulu u tsini!”

Hoyu mulaedza u nyanyula vhathetshelesi vhawe. Vhanzhi vha ṱhogomela ṱhoḓea ya uri vha shanduke, ndi uri u shandukisa mavhonele avho na u laṱa matshilele avho a kale sa a sa takadziho. Ngauralo kha mivhundu yoṱhe u mona na Yorodane, na u bva Yerusalema, vhathu vha ḓa nga vhunzhi ha Yohane, nahone a vha lovhedza, a tshi vha mbwandamedza maḓini a Yorodane. Ndi ngani?

Yohane u lovhedza vhathu u tendelana na u shanduka havho zwi tshi bva mbiluni kha zwivhi zwa u vunḓa Mulayo wa mulanga wa Mudzimu. Nga zwenezwo, musi vhaṅwe vha Vhafarisei na Vhasadukei vha tshi ḓa Yorodane, Yohane u a vha sasaladza. U ri: “Inwi maḓána a mavuluvulu! Aṋwani-ha zwino mitshelo yo fanelaho vhane vha shanduka. Ni songo vhuya na linga u ri: Ri na Abrahamu khotsi-ashu! ngauri ndi a ni vhudza ndi ri: Mudzimu a nga kona u vusela Abrahamu vhana kha haya matombo. Iṱali mbaḓo yó no ḓi vhewa tsindeni ḽa miri. Zwino miri yoṱhe i sa aṋwiho mitshelo yavhuḓi i ḓo remiwa ya kudzwa muliloni.”

Nga ṅwambo wa ṱhogomelo yoṱhe ine Yohane a khou i wana, Vhayuda vha ruma vhafunzi na Vhalevi khae. Vhenevha vha a vhudzisa: “Ndi’we nnyi?”

Yohane a ḓiamba a ri: “Nṋe a si nṋe Kristo.”

Vha a vhudzisa: “Mini-ha, U Elia naa?”

U a fhindula: “A si nṋe.”

“U ene Muporofita naa?”

“Aiwa!”

Ngauralo vha thoma u vhudzisesa: “U nnyi-ha? uri ri ḓo fhindula vho ri rumaho; U tshi ḓi-amba U ri mini?”

Yohane u a ṱalutshedza: “Nṋe ndi ipfi ḽa muhuweleli sogani: Lugisani nḓila ya Murena, vhunga Yesaya muporofita ó amba.”

Vha tshi ṱoḓa u ḓivha vha ri: “U lovhedzela’ni-ha, arali Ú si Kristo, Ú si Elia, Ú si ene Muporofita?”

U a fhindula: “Nṋe ndi lovhedzela maḓini; huno o no dzhena vhukati haṋu, ané inwi ni si mu ḓivhe. Ndi ene ané a ḓo ntsala murahu.”

Yohane u khou lugisa nḓila nga u ita uri vhathu vha vhe na vhuimo ho fanelaho ha mbilu u itela u ṱanganedza Messia, ane a ḓo vha Khosi. Nga ha Onoyu, Yohane u ri: “Uyo o ntsalaho murahu, u na maanḓa a fhiraho anga; a tho ngo fanela na u mu hwalela zwienda zwawe.” Zwi re zwone ndi uri Yohane u ita na uri: “A ntsalaho murahu ndi we a vha o nthanga phanḓa, ngauri o vha o no vha hone, nṋe ndí sathu u vha hone.”

Nga zwenezwo, mulaedza wa Yohane wa uri, “muvhuso wa ṱaḓulu u tsini,” u shuma sa u ṱanziela hu re khagala ha uri vhuḓinḓa ha Khosi yo ḓodzwaho ya Yehova, Yesu Kristo, hu vho ṱoḓa u thoma. Yohane 1:6-8, 15-28; Mateo 3:1-12; Luka 3:1-18; Mishumo 19:4.

▪ Yohane ndi muthu wa mufuda-ḓe?

▪ Ndi ngani Yohane a tshi lovhedza vhathu?

▪ Ndi ngani Yohane a tshi nga ri Muvhuso wa ṱaḓulu u tsini?