Ndima Ya 18

Yohane u a Ṱukufhala, Yesu u a Hudzwa

ZWI tevhelaho Paseka nga tshimedzi tsha 30 C.E., Yesu na vhafunziwa vhawe vha ṱutshela Yerusalema. Naho zwo ralo, a vho ngo humela mahayani avho Galilea, fhedzi vha ya kha shango ḽa Yudea, hune vha ita hone zwa u lovhedza. Yohane Mulovhedzi o vha a tshi khou ita mushumo u fanaho hune zwino ha nga vha ṅwaha, nahone vhafunziwa vha kha ḓi vha nae.

Vhukuma, Yesu ene muṋe ha iti ndovhedzo naho i ifhio, fhedzi vhafunziwa vhawe vha a zwi ita nga fhasi ha vhulivhisi hawe. Ndovhedzo yavho i na pfaneleo dzi fanaho sa dze dza itwa nga Yohane, yone ndi pfanyisedzo ya u rembuluwa ha Muyuda kha zwivhi zwa Mulayo wa mulanga wa Mudzimu. Naho zwo ralo, nga murahu ha mvuwo yawe, Yesu u laya vhafunziwa vhawe uri vha ite ndovhedzo i re na pfaneleo yo fhambanaho. Ndovhedzo ya Vhakriste ṋamusi ndi luswayo lwa u ḓiṋekedza ha muthu kha u shumela Yehova Mudzimu.

Naho zwo ralo, kha tshenetsho tshiimo tsha u thoma tsha vhuḓinḓa ha Yesu, Yohane khathihi na ene, naho vha tshi khou shuma vho fhandekana, vha khou funza na u lovhedza vho rembuluwaho. Fhedzi vhafunziwa vha Yohane vha vha na vivho na u vhilaela khae malugana na Yesu vha ri: “Mufunzi, . . . , u khou lovhedza huno vhathu vhoṱhe vha ḓa ha ene.”

Nṱhani ha uri a vhe na vivho, Yohane u takalela mvelaphanḓa ya Yesu nahone u dovha a ṱoḓa vhafunziwa vhawe vha tshi takala. U a vha humbudza: “Inwi vhaṋe ni dziṱhanzi dza zwe nda ri: Nṋe a si nṋe Kristo! Nda ri: Ndo rumiwa u mu ranga phanḓa!” Nga zwenezwo u shumisa tshifanyiso tshavhuḓi a ri: “A re na muselwa ndi ene muhwe. Khonani ya muhwe yo imaho i tshi mu thetshelesa, i takala lwa u takala i tshi pfa ipfi ḽa muhwe. Dakalo ḽanga ḽine ḽa nga ḽeneḽo ḽo khunyelela.”

Yohane, sa khonani ya Muhwe, o takala nga murahu ha miṅwedzi ya rathi musi a tshi ḓivhadza vhafunziwa vhawe kha Yesu. Vhaṅwe vhavho vho vha miraḓo i bvelaho phanḓa ya tshigwada tsha muselwa wa ṱaḓulu wa Kristo tshine tsha ḓo itwa nga Vhakriste vho ḓodzwaho nga muya. Yohane u ṱoḓa vhafunziwa vhawe vhane a vha navho na vhone vha tshi tevhela Yesu, samusi ndivho yawe i ya u lugisa nḓila ya vhuḓinḓa ha Kristo vhu bvelaho phanḓa. Samusi Yohane Mulovhedzi a tshi ṱalutshedza: “Ene nga a hule, nṋe ndi ṱukufhale.”

Yohane mufunziwa muswa wa Yesu, we mathomoni na ene a vha e mufunziwa wa Yohane Mulovhedzi, u a ṅwala malugana na vhubvo ha Yesu na mushumo Wawe wa ndeme wa u tshidza vhathu, u ri: “A bvaho ṱaḓulu u fhira vhoṱhe . . . Khotsi u funa Murwa; o kumedza zwoṱhe tshanḓani tshawe. A tendaho Murwa u na vhutshilo vhu sá fheli. A sa tendiho Murwa, vhutshilo ha nga vhu vhoni; tshawe ndi uri vhuhali ha Mudzimu vhu dzula vhú khae’.”

Hu sa athu u fhela tshifhinga tshilapfu musi Yohane Mulovhedzi o no amba nga ha u fhungudzea ha mushumo wawe ene muṋe, u farwa nga Khosi Herode. Herode o dzhia Herodia, mufumakadzi wa Filipo murathu wawe, sa musadzi wawe, nahone musi Yohane a tshi bvukulula zwiito zwawe sa zwi songo fanelaho, Herode a ita uri a valelwe dzhele. Musi Yesu a tshi pfa nga ha u farwa ha Yohane, u ṱutshela Yudea na vhafunziwa vhawe a ya Galilea. Yohane 3:22–4:3; Mishumo 19:4; Mateo 28:19; 2 Vha-Korinta 11:2; Marko 1:14; 6:17-20.

▪ Ndi mbonalo ifhio ya ndovhedzo dze dza vha dzi tshi khou itwa nga fhasi ha vhulivhisi ha Yesu nga phanḓa ha mvuwo yawe? Na nga murahu ha mvuwo yawe?

▪ Yohane u zwi sumbedza hani uri mbilaelo ya vhafunziwa vhawe a si i ṱanganedzeaho?

▪ Ndi ngani Yohane a tshi valelwa dzhele?