Ndima Ya 58

Zwinnkwa na Dini

MAGOGO manzhi o ḓa ha Yesu a tshi bva Miḓini ya Fumi. Vhanzhi vho vha vha tshi bva kule-kule vha tshi ḓa hafha dzinguni ḽo ḓalaho nga Vhannḓa u itela u mu thetshelesa na u fhodzwa malwadze avho. Vho ḓa na zwirundu zwavho zwihulwane, kana mimanngi, zwine u ya nga mukhuvha wavho vha zwi shumisela u hwala mbuvha musi vha tshi tshimbila vhukati ha mashango a Vhannḓa.

Naho zwo ralo, Yesu u vhidza vhafunziwa vhawe a ri: “Ndi khathuwa mbilu nga vhathu, ngauri vho no dzula maḓuvha mararu na nṋe vhá si na zwa u ḽa. Na hone ndá vha ṋea nḓila ya u ya mahayani avho vhe na nḓala vha nga ṋoka nḓilani; na hone vhaṅwe vhavho vha bva kule.”

Vhafunziwa vha vhudzisa: “Vhuswa ha u kona u fusha vhenevha vhangafha-ngafha muthu u vhu wana vhu tshi bva’fhi fhano sogani?”

Yesu u a vhudzisa: “Ni na zwinnkwa zwingana?”

Vha a fhindula: “Zwiṱanu-na-zwivhili na khovhenyana dzi si gathi.”

A tshi laedza vhathu uri vha dzule fhasi, Yesu u dzhia zwinnkwa na dzikhovhe, u rabela Mudzimu, u a zwi ṅwatakanya, a thoma u zwi ṋea vhafunziwa vhawe. Vhone, vha zwi ṋea vhathu, vhoṱhe vha ḽa vha  fura. Nga murahu, musi hu tshi kuvhanganyiwa matshakatshaka, ha vha na zwitundwana zwa sumbe zwo ḓalaho, naho vhanna vha ṱoḓaho u vha 4 000, khathihi na vhasadzi na vhana, vho no ḽa!

Yesu u ṱuwisa magogo, u dzhena gungwani na vhafunziwa vhawe, nahone a pfukela vhugabeloni ha vhukovhela ha Lwanzhe lwa Galilea. Hafha Vhafarisei, zwino vhe na miraḓo ya tshigwada tsha vhurereli ha Vhasadukei, vha lingedza u linga Yesu nga u mu humbela uri a vha itele vhuṱolo vhu bvaho ṱaḓulu.

A tshi vhona ndingedzo dzavho dza u mu linga, Yesu u a fhindula: “Nga madekwana ni ri: Ḽi ḓo vuwa ḽi tshi tsha! ngauri lukole ndi lutswuku. Nga matsheloni ni ri: Ṋamusi i ḓo na! ngauri hu na makole na hone ndi matswuku. Inwi vhadzia-u-ḓi-fhura, huufha ni tshi kona u laula nga kudzulele kwa makole, khefha ni tshi kundwa u laula nga maṱula a tshino tshifhinga.”

Nga zwenezwo, Yesu u vha vhidza lushaka luvhi lwa dziphaṱhi nahone u a vha sevha, samusi o vhudza Vhafarisei u thomani, uri a vha nga ṋewi vhuṱolo nga nnḓa ha vhuṱolo ha Yona. A tshi vho ṱuwa, ene na vhafunziwa vhawe vha dzhena gungwani vha livha thungo ya Betsaida devhula-vhubvaḓuvha vhugabeloni ha Lwanzhe lwa Galilea. Vhe nḓilani vhafunziwa vha ṱhogomela uri vho hangwa mbuvha, vhe na tshinnkwa tshithihi fhedzi.

A tshi kha ḓi humbula zwi kha ḓi bvaho u itea vhukati hawe na Vhafarisei na Vhasadukei vhatikedzi vha Herode, Yesu u a sevha: “Ni vhone uri ni thanyele dini ḽa Vhafarisei na dini ḽa Herode.” Zwi tou vha khagala uri musi a tshi amba nga ha dini vhafunziwa vha humbula uri Yesu u khou amba nga ha u hangwa havho tshinnkwa, zwenezwo vha thoma u hanedzana nga enea mafhungo. A tshi ṱhogomela u sa pfesesa havho, Yesu u ri: “Ndi mini ni tshi ri ndi amba mbuvha ye na sia?”

Zwenezwino, Yesu o vha o ṋea vhathu vha zwigidi zwinnkwa nga lwa vhuṱolo, o ita hovhu vhuṱolo ha u fhedza khamusi ḓuvha ḽithihi kana mavhili o fhiraho. Vha fanela u ḓivha uri ha khou vhilaedziswa nga u ṱahela ha zwinnkwa zwa vhukuma. U a vha eletshedza: “A ni tsha elelwa zwiḽa zwinnkwa zwiṱanu zwe nda kovhela vha maḓana a mahumi maṱanu? Matshakatshaka no doba na ḓadza zwirundu zwingana?”

Vha fhindula: “Fumi na zwivhili.”

“Musi uḽa we nda kovhela vha maḓana na mahumi maṋa zwinnkwa zwiṱanu-na-zwivhili no doba matshakatshaka na ḓadza zwitundwana zwingana?”

Vha ri: “Zwiṱanu-na-zwivhili.”

“Ndi mini-ha ní sathu u ṱalifha?” Yesu u a vhudzisa. “Zwino ndi mini ni sa ṱalukanyi zwauri ndo vha ndi sa ambi vhuswa, ndi tshi ri: Thanyelani dini ḽa Vhafarisei na Vhasadukei?”

Mafheleloni vhafunziwa vha pfesesa. Dini, tshithu tshi vhilisaho tshi itaho uri tshinnkwa tshi kukumuwe, ḽo vha ḽi ipfi ḽe ḽa shumiselwa u ṱalusa u tshinyala. Zwino vhafunziwa vha a pfesesa uri Yesu u khou shumisa tshifanyiso, uri u khou vha sevha uri vha thanyele “pfunzo ya Vhafarisei na Vhasadukei,” pfunzo ine ya vha na mvelelo i tshinyadzaho. Marko 8:1-21; Mateo 15:32–16:12.

▪ Ndi ngani vhathu vhe na zwirundu zwihulwane zwa mbuvha?

▪ Musi a tshi ṱutshela Miḓi ya Fumi, Yesu u fara nyendo dzifhio nga gungwa?

▪ Ndi u sa pfesesa hufhio hune vhafunziwa vha vha naho malugana na ṱhaluso ya Yesu nga ha dini?

▪ Yesu u amba mini nga ha mubulo u no ri “dini ḽa Vhafarisei na Vhasadukei”?