TSHIṰOHO TSHI RE KHA GWATI | MAZWIFHI ANE A ITA URI ZWI RI KONḒELE U FUNA MUDZIMU

Mazwifhi Ane A Ita Uri Mudzimu A Si Pfesesee

TAMBANI

VHATHU VHANZHI VHA TENDA ZWIFHIO?

Vhurereli “vhuraru vhuhulwane ha Tshikriste vhune ha vha Katolika, Eastern Orthodox na Protestant vhu amba uri Mudzimu ndi vhararu kha muthihi: Mudzimu Khotsi, Mudzimu Murwa na Mudzimu Muya Mukhethwa. Vhathu vho gudelaho zwa vhurereli vha amba uri zwenezwi zwi vha zwi sa khou amba uri ndi vhadzimu vhararu, fhedzi vhenevha vhadzimu vhararu ndi Mudzimu muthihi.”—The New Encyclopædia Britannica.

NGOHO I BVAHO BIVHILINI

Yesu Murwa wa Mudzimu ho ngo vhuya a amba uri ene u lingana na Mudzimu kana uri ene na Mudzimu vha tshithu tshithihi. Nṱhani hazwo, o ri: “Ndi khou ya kha Khotsi, ngauri Khotsi ndi muhulwane kha nṋe.” (Yohane 14:28) O dovha a vhudza muṅwe wa vhatevheli vhawe a ri: “Ndi khou gonya kha Khotsi anga ane a vha Khotsi aṋu na kha Mudzimu wanga ane a vha Mudzimu waṋu.”—Yohane 20:17.

Muya mukhethwa a si muthu. Vhakriste vha u thoma vho “ḓadzwa nga muya mukhethwa” nahone Yehova o ri: “Ndi ḓo shululela muya wanga kha vhathu vhoṱhe.” (Mishumo 2:1-4, 17) Muya mukhethwa a si tshipiḓa tsha Vhuraruthihi. Ndi maanḓa a Mudzimu.

NDI NGANI U ḒIVHA NGOHO ZWI ZWA NDEME?

Vhaṅwe vhaḓivhi vhavhili vha amba uri a zwi konadzei u pfesesa pfunzo ya Vhuraruthihi u songo thuswa nga muya wa Mudzimu na uri naho Mudzimu a nga u thusa, a zwi konadzei u i pfesesa nga vhuḓalo. Naa ni nga kona u funa muthu ane zwi si konadzee u mu ḓivha kana u mu pfesesa? Nga zwenezwo, pfunzo ya Vhuraruthihi i ita uri vhathu vha si kone u ḓivha na u funa Mudzimu.

Marco we ra amba nga hae kha tshipiḓa tsho fhiraho o amba uri o vhona pfunzo ya Vhuraruthihi i tshi mu thivhela u ḓivha Mudzimu. U ri: “Ndo vhona u nga Mudzimu u khou ḓidzumba nahone zwenezwo zwo ita uri ndi vhone u nga u kule, ha pfesesei na uri ri nga si kone u vha tsini nae.” Naho zwo ralo, “Mudzimu a si Mudzimu wa phusuphusu.” (1 Vhakorinta 14:33, Bivhili ya Luvenḓa) Ho ngo ḓidzumba, u ṱoḓa ri tshi mu ḓivha. Yesu o ri: “Ri rabela ane ra mu ḓivha.”—Yohane 4:22.

Marco u ri: “Musi ndi tshi guda uri Mudzimu a si tshipiḓa tsha Vhuraruthihi, zwo nthusa uri ndi kone u vha na vhushaka ha tsini nae.” Arali ra dzhia Yehova sa khonani yashu, nṱhani ha u mu dzhia sa muthu ane ri si mu ḓivhe, zwi ḓo ri lelutshela uri ri mu fune. Bivhili i ri: “A si na lufuno ha ḓivhi Mudzimu, ngauri Mudzimu ndi lufuno.”—1 Yohane 4:8.