Bivhili I Shandula Vhutshilo

NDI mini zwo itaho uri muthu ane a betsha na u tswa a zwi litshe na u shandula nḓila ine a tshila ngayo? Vhalani zwe a zwi amba.

“Ndo vha ndi tshi funa nga maanḓa dzibere na mbambe yadzo.”​—RICHARD STEWART

ṄWAHA WA MABEBO: 1965

SHANGO: JAMAICA

ZWE A VHA A TSHI ZWI ITA: O VHA A TSHI BETSHA, E TSHIGEVHENGA

VHUTSHILO HANGA HA TSHIFHINGANI TSHO FHIRAHO: Ndo alutshela fhethu hune ha tambuliwa, hu re na vhathu vhanzhi kha ḽa Kingston, musanda wa Jamaica. Vhunzhi ha vhathu vho vha vhe si na mishumo nahone hu na vhugevhenga. Vhathu vho vha vha tshi dzula vho tshuwa zwigwada zwa magevhenga. Ho vha hu tshi lila tshigidi hu ṱoḓaho u vha ḓuvha ḽiṅwe na ḽiṅwe.

Mme anga vha re mushumi wa biko vho ita zwoṱhe zwine vha nga kona vha tshi itela nṋe, murathu wanga na khaladzi anga. Vho ita vhungoho ha uri ri wane pfunzo yavhuḓi. Ndo vha ndi si muthu-vho wa tshikolo, fhedzi ndo vha ndi tshi funa nga maanḓa dzibere na mbambe yadzo. Ndo vha ndi tshi lova tshikolo, nda ya dzibereni. Ndo ita na u ṋamela dzibere.

Nga u ṱavhanya, nda thoma u ita zwa u betsha dzibereni. Ndo vha ndi tshi ḓifara luvhi, ndi tshi ita zwa vhudzekani na vhafumakadzi vhanzhi. Ndi tshi daha mbanzhe na u tswa u itela uri ndi kone u bvela phanḓa ndi tshi tshila nga nḓila ine nda tshila ngayo. Ndo vha ndi na zwigidi zwinzhi, fhedzi zwino ndi livhuwa uri a tho ngo vhulaya muthu musi ndi tshi ya u tswa.

Ndo fheleledza ndo farwa nga mapholisa nga nṱhani ha vhugevhenga hanga, nda ya dzhele. Musi ndi tshi bva dzhele, ndo bvela phanḓa ndi tshi ita zwa vhugevhenga. Zwavhuḓi-vhuḓi, zwo tou ṋaṋa. Naho ndo vha ndi tshi vhonala ndi muthu a sa dini, ndo vha ndi na swili, ndi tshi ṱavhanya u dinalea nahone ndi na tshiṱuhu. Ndo vha ndi si na ndavha na vhaṅwe vhathu.

NḒILA YE BIVHILI YA SHANDULA NGAYO VHUTSHILO HANGA: Nga tshenetshi tshifhinga tsha musi ndi na dzithaidzo, mme anga vho thoma u guda Bivhili nahone vha vha Ṱhanzi ya Yehova. Ndo vhona nḓila ye vha shanduka ngayo nga nḓila yavhuḓi, nda thoma u ḓivhudzisa. Ndo mbo ḓi ri ndi khwine ndi tshi wana uri ndi mini zwo itaho uri mme anga vha shanduke, nda thoma u haseledza Bivhili na Dziṱhanzi.

Ndo wana uri zwine Ṱhanzi dza Yehova vha zwi funza zwo fhambana na zwine zwa funzwa kha dziṅwe kereke na uri zwine vha zwi funza zwi bva Bivhilini. Ho vha hu vhone fhedzi vhane nda ḓivha vha tshi huwelela nnḓu nga nnḓu, u fana na Vhakriste vha u thoma. (Mateo 28:19; Mishumo 20:20) Ndo mbo ḓi zwi vhona uri ndo wana vhurereli ha ngoho musi ndi tshi vhona nḓila ine vha funana ngayo.​—Yohane 13:35.

Zwe nda zwi guda Bivhilini zwo ita uri ndi vhone ndeme ya u ita tshanduko khulwane. Ndo guda uri Yehova Mudzimu u vhenga vhupombwe na uri arali ndi tshi ṱoḓa u mu takadza, ndi tea u litsha u ita zwithu zwine zwa tshikafhadza muvhili wanga. (2 Vhakorinta 7:1; Vhahevheru 13:4) Ndo guda uri Yehova u a kwamea nga zwine nda zwi ita na uri zwine nda ita zwi nga mu takadza kana u mu vhaisa. (Mirero 27:11) Ndo mbo ḓi litsha u daha mbanzhe, ndo ṱuwisa zwigidi zwanga na u lingedza u shandula zwine nda vha zwone. Zwe zwa nkonḓelesa ndi u litsha u ḓifara luvhi na u betsha.

Mathomoni, ndo vha ndi sa ṱoḓi khonani dzanga dzi tshi zwi ḓivha uri ndi khou guda Bivhili na Ṱhanzi dza Yehova. Fhedzi zwithu zwo shanduka nga murahu ha u vhala Mateo 10:33, hune Yesu a ri: “Ane a nndandula phanḓa ha vhathu, na nṋe ndi ḓo mu landula phanḓa ha Khotsi anga wa ṱaḓulu.” Enea maipfi o ita uri ndi vhudze khonani dzanga uri ndi khou guda Bivhili na Dziṱhanzi. Zwo vha mangadza. Vho vha vha sa kholwi uri muthu a ngaho nṋe a nga vha Mukriste. Fhedzi ndo vha vhudza uri a thi tsha ṱoḓa u tshila nga nḓila ye nda vha ndi tshi tshila ngayo kale.

NḒILA YE NDA VHUYELWA NGAYO: Mme anga vho takala vhukuma musi vha tshi vhona ndi tshi thoma u shumisa zwine nda khou zwi guda Bivhilini. A vha tsha ḽa mbilu nga u humbula uri ndi nga vha ndi tshi khou ita zwithu zwo khakheaho. Ri amba nga zwithu zwine zwa ri ita vhathihi, ri amba nga ha nḓila ine ra funa ngayo Yehova. Nga zwiṅwe zwifhinga, ndi a humbula nga ha zwe nda vha ndi zwone kale nahone nda mangadzwa nga tshanduko dze nda dzi ita ndi tshi thuswa nga Mudzimu. A thi tsha tama nḓila ye nda ndi tshi tshila ngayo kale, ya u ḓifara luvhi na u funesa tshelede.

Arali ndo vha ndo hana u guda Bivhili, ndo vha ndi tshi ḓo vha ndi si tsheeho kana ndi dzhele zwino. Fhedzi zwino ndi na muṱa wavhuḓi wo takalaho. Zwi a ntakadza vhukuma u shumela Yehova na mufumakadzi wanga a ntikedzaho na ṅwana washu wa musidzana a sa remisiho ṱhoho. Ndi livhuwa Yehova nge a ntendela ndi tshi vha vhukati ha vhahashu vha re na lufuno. Ndi livhuwa na uri muṅwe muthu o ḓidina a ngudisa ngoho i re Bivhilini. Nahone ndi dzhiela nṱha zwibuli zwine nda vha nazwo zwa u thusa vhaṅwe u guda zwine Bivhili ya zwi funza. Ndi livhuwa zwihulu Yehova Mudzimu nge a ntsumbedza vhuthu vhuhulu nga u nkokodzela khae.

[Maipfi o ṱumbulwaho]

“Ndo guda uri Yehova u a kwamea nga zwine nda zwi ita na uri zwine nda ita zwi nga mu takadza kana u mu vhaisa”

[Tshifanyiso]

Ndo vhona nḓila ye mme anga vha shanduka ngayo nga nḓila yavhuḓi

[Tshifanyiso]

Ndi na mufumakadzi wanga na ṅwana washu