“A Vha Tshipiḓa Tsha Shango”

“Shango ḽo vha vhenga, ngauri a vha tshipiḓa tsha shango.”​—YOHANE 17:14.

Zwi Amba Mini?: Yesu o vha e si tshipiḓa tsha shango, nga zwenezwo, o vha a sa dzhii sia kha mafhungo a vhadzulapo na a politiki. O ri: “Arali Muvhuso wanga wo vha u tshipiḓa tsha ḽino shango, vhatevheli vhanga vho vha vha tshi ḓo vha vho ḓa vha lwa uri ndi si kumedzelwe kha Vhayuda. Fhedzi zwi re zwone ndi uri Muvhuso wanga a si wa ḽino shango.” (Yohane 18:36) O dovha a vhudza vhafunziwa vhawe uri vha si ite zwithu, u amba kana u tshila nga nḓila ine ya lwisana na zwine zwa funziwa nga Ipfi ḽa Mudzimu.​—Mateo 20:25-27.

Vhakriste Vha U Thoma Vho Zwi Ita Hani?: Muṅwe muṅwali wa zwa vhurereli ane a pfi Jonathan Dymond o amba uri Vhakriste vha u thoma “vho hana u ya [nndwani] naho vha tshi nga semiwa, u valelwa dzhele kana u vhulawa.” Vho nanga u tambula nṱhani ha uri vha dzhie sia. Na nḓila ye vha vha vha tshi tshila ngayo yo vha i tshi sumbedza uri a vha tshipiḓa tsha ḽino shango. Vhakriste vho vhudzwa uri: “No litsha zwithu zwivhi zwe na vha ni tshi zwi ita navho, ndi ngazwo vha tshi vho ni sasaladza.” (1 Petro 4:4) Muṅwe muḓivhazwakale ane a pfi Will Durant o amba uri Vhakriste “vhe vha vha vha tshi tshila nga nḓila ine ya takadza Mudzimu, vho vha vha tshi sinyusa vhathu vha vhahedeni vhe vha vha vha tshi funesa miḓifho.”

Ndi Vhafhio Vhane Vha Zwi Ita Ṋamusi? New Catholic Encyclopedia yo amba uri: “Zwo khakhea u hana u ya nndwani.” Muṅwe magazini wa Swiss wo amba uri kereke dzoṱhe dzo shela mulenzhe kha bulayo ḽe ḽa vha hone ngei Rwanda nga 1994, nga nnḓa ha Ṱhanzi dza Yehova fhedzi.

Muṅwe mudededzi we a vha a tshi khou amba nga ha vhuvemu he ha itwa nga Vhanazi, o amba uri “madzangano oṱhe o vha a tshi ima na mazwifhi, u fara vhathu nga tshiṱuhu na zwithu zwoṱhe zwi si zwavhuḓi zwe Vhanazi vha vha vha tshi khou zwi ita.” Fhedzi musi o no ita ṱhoḓisiso, o ṅwala a ri: “Phindulo ndo i wana.” O guda uri Ṱhanzi dza Yehova vha ima vho khwaṱha kha zwine vha zwi tenda hu sa londwi u farwa nga nḓila i si yavhuḓi.

Hu pfi mini nga nḓila ine vha ḓifara ngayo? Muṅwe magazini une wa pfi U.S. Catholic wo ri: “Vhunzhi ha vhathu vha kereke ya Katolika, a vha tendelani na mafhungo ane kereke ya a funza malugana na vhathu vhavhili vha songo vhinganaho, vhane vha dzula vhoṱhe na vhathu vhane vha ita zwa vhudzekani vha songo vhingana.” Wonoyo magazini wo dovha wa amba zwe mufunzi wa kereke ya Katolika a zwi amba. O ri: “Ndi vhona vhathu vhanzhi vhane vha vhingana vho thoma vha dzula vhoṱhe.” The New Encyclopædia Britannica yo amba uri Ṱhanzi dza Yehova “vha tevhedza zwine Bivhili ya zwi amba nga ha vhudzekani na mbingano.”