“Mafhungo Maḓifha A Muvhuso A Ḓo Ḓivhadzwa”

“Aya mafhungo maḓifha a Muvhuso a ḓo ḓivhadzwa ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.”​—MATEO 24:14.

Zwi Amba Mini?: Luka muṅwali wa Evangeli o ṅwala uri Yesu o “tshimbila a ya miḓini na miḓanani, a tshi khou huwelela na u ḓivhadza mafhungo maḓifha a Muvhuso wa Mudzimu.” (Luka 8:1) Yesu ene muṋe o ri: “Ndi fanela u ya u ḓivhadza mafhungo maḓifha a Muvhuso wa Mudzimu na kha miṅwe miḓi, ngauri ndo rumelwa zwone.” (Luka 4:43) O ruma vhafunziwa vhawe uri vha ye u huwelela mafhungo maḓifha miḓini na miḓanani nahone nga murahu a vha vhudza a ri: “Ni ḓo vha ṱhanzi dzanga . . . u swika magumoni a ḽifhasi.”​—Mishumo 1:8; Luka 10:1.

Vhakriste Vha U Thoma Vho Zwi Ita Hani?: Vhafunziwa vha Yesu vho ṱavhanya u ita zwe Yesu a vha vhudza. Bivhili i ri: “Vha ḓi dzula vha tshi funza thembeleni na nnḓu nga nnḓu ḓuvha ḽiṅwe na ḽiṅwe vha sa litshi na u ḓivhadza mafhungo maḓifha nga ha Kristo Yesu.” (Mishumo 5:42) Vhoṱhe tshivhidzoni vho vha vha tshi funza. Muṅwe muṅwali wa ḓivhazwakale ane a pfi Neander o amba uri: “Celsus muṅwali wa u thoma we a amba zwithu zwi si zwavhuḓi nga ha Vhakriste, o amba a tshi tou sasaladza a ri vhe vha vha vha tshi huwelela mafhungo maḓifha nga u fhisea ndi vhathu vha itaho wuḽu, vha rungaho zwienda, vha sukaho mukumba, vha songo funzeaho na vhathu zwavho.” Muṅwe muṅwali ane a pfi Jean Bernardi o ṅwala zwi tevhelaho kha bugu yawe The Early Centuries of the Church. O ri: “[Vhakriste] vho vha vha tshi tea u ya hoṱhe-hoṱhe vha amba na muṅwe na muṅwe. Vho vha vha tshi tea u funza nḓilani khulwane, dziḓoroboni, fhethu ha vhomuthumunzhi na mahayani. Vha tshi tea u zwi ita u swika magumoni a ḽifhasi . . . Hu sa londwi uri vhathu vha a vha ṱanganedza kana a vha vha ṱanganedzi.”

Ndi Vhafhio Vhane Vha Zwi Ita Ṋamusi? Mufunzi wa kereke ya Anglican ane a pfi David Watson o ṅwala zwi tevhelaho. O ri: “U kundelwa ha kereke u dzhia mushumo wa u ḓivhadza mafhungo ngoho na u funza u wa ndeme, ndi zwone zwo itaho uri vhathu vha si takalele u shumela Mudzimu.” José Luis Pérez Guadalupe kha bugu yawe ine ya pfi Why Are the Catholics Leaving? o ṅwala nga ha mishumo ya vha kereke ya Evangeli, vha Savhatha na vhaṅwe, a amba uri “a vha yi nnḓu nga nnḓu.” Malugana na Ṱhanzi dza Yehova o ṅwala uri: “Vha ya nnḓu nga nnḓu nga nḓila yo dzudzanyeaho.”

Jonathan Turley o amba maipfi a takadzaho ane a wanala kha Cato Supreme Court Review ya 2001-​2002. O ri: “Musi ni tshi bula Ṱhanzi dza Yehova, vhathu vha mbo ḓi ṱavhanya vha humbula vhathu vhane vha ri dalela miḓini yashu ri songo vha lavhelela. U gudisa vhathu ngoho ndi zwa ndeme kha Ṱhanzi dza Yehova.”

[Bogisi]

Naa Ni A Kona U Vhona Vhakriste Vha Vhukuma?

U ya nga zwithu zwo thewaho Maṅwaloni, zwo ambiwaho kha mutevhe wa dzino thero, ndi vhafhio vhane na vhona u nga ndi Vhakriste vha vhukuma? Naho hu na zwigwada zwinzhi-zwinzhi zwa vhurereli vhu ḓivhidzaho Vhakriste, ni songo hangwa zwe Yesu a vhudza vhatevheli vhawe. O ri: “A si vhoṱhe vhane vha amba na nṋe vha ri, ‘Murena, Murena,’ vhane vha ḓo dzhena Muvhusoni wa ṱaḓulu, fhedzi hu ḓo dzhena vhane vha ita zwi funwaho nga Khotsi anga wa ṱaḓulu.” (Mateo 7:21) U ḓivha vhane vha khou ita zwine Khotsi a zwi funa, vhane vha vha na luswayo lwa Vhukriste ha ngoho na u ḓikonanya navho, zwi nga ita uri ni wane phaṱhutshedzo dza lini na lini Muvhusoni wa Mudzimu. Ri humbela uri ni ambe na Ṱhanzi dza Yehova vho ni ṋeaho yeneyi bugu uri vha ni vhudze mafhungo o engedzeaho nga ha Muvhuso wa Mudzimu na phaṱhutshedzo dzine wa ḓo dzi ḓisa.​—Luka 4:43.