VHAKRISTE vhanzhi a vha pembeleli Khirisimusi. Vha ḓipfa hani nga ha zwenezwo? Naa vha vhona u nga vha khou xelelwa nga zwiṅwe zwithu? Naa vhana vhavho vha pfa u nga vha khou dzimiwa zwiṅwe zwithu? Ipfani zwe Ṱhanzi dza Yehova u mona na ḽifhasi ḽoṱhe vha zwi amba nga ha enea mafhungo.

U humbula Yesu Kristo: “Ndo vha ndi sa anzeli u ya kerekeni musi ndi sa athu vha Ṱhanzi ya Yehova. Ndo vha ndi tshi ya nga Khirisimusi kana nga Good Friday fhedzi. Naho zwo ralo, ndo vha ndi sa humbuli nga ha Yesu Kristo. A thi tsha pembelela Khirisimusi, fhedzi ndi ya miṱanganoni ya Ṱhanzi dza Yehova luvhili nga vhege na u funza vhaṅwe zwine Bivhili ya zwi amba nga ha Yesu.”​—EVE wa AUSTRALIA.

Dakalo ḽine ḽa ḓiswa nga u ṋea: “Ndi a takala musi vhathu vha tshi nṋea zwifhiwa ndi songo zwi lavhelela. Ndi dovha nda takalela u itela vhaṅwe khadi na u vha olela zwifanyiso ngauri zwi ita uri vha takale, na nṋe nda takala-vho.”​—REUBEN wa NORTHERN IRELAND.

U thusa vhaṅwe: “Ri a zwi takalela u bikela vhane vha khou lwala. Tshiṅwe tshifhinga ri vha isela maluvha, khekhe kana tshifhiwa u itela uri vha takale. Zwenezwi ri a zwi takalela ngauri ri kona u vha dalela tshifhinga tshiṅwe na tshiṅwe.”​—EMILY wa AUSTRALIA.

U vha roṱhe sa muṱa: “Musi muṱa woṱhe wo kuvhangana, vhana vhashu vha kona u ḓivha khwine mashaka oṱhe, ho takaliwa. Samusi ri tshi kona u ita zwenezwi tshifhinga tshiṅwe na tshiṅwe, a ri vhi na mutsiko nahone mashaka ashu a a zwi ḓivha uri ri a a dalela ngauri ri a a funa.”​—WENDY wa CAYMAN ISLANDS.

Mulalo: “Nga Khirisimusi vhathu vha vha vho farakanea vhukuma lune vha hangwa nga ha u vha na mulalo. Ndo guda zwe Mudzimu a ri fhulufhedzisa zwone nahone zwi ita uri ndi takale. Ndi a zwi pfesesa uri vhana vhanga vha ḓo ḓiphina tshifhingani tshi ḓaho.”​—SANDRA wa SPAIN.