Samusi Yesu o vha e si na tshivhi, o vha e si na vhunzhi ha thaidzo dzine riṋe ra vha nadzo. Naho zwo ralo, o vha a tshi kwamea vhukuma nga u shengela ha vhathu. O vha o ḓiimisela u vha thusa na u vha itela zwithu zwe vha vha vha songo zwi lavhelela. U pfela vhuṱungu zwo ita uri a ṱoḓe u vha thusa.

Vhathu vhoṱhe, vhaṱuku na vhahulwane vho vha vha tshi kona u amba na Yesu ngauri ho ngo ita uri vha vhone u nga u wa ndeme kana u na mishumo minzhi lune a nga si kone u vha thetshelesa. Musi vhathu vha tshi vhona uri Yesu u na ndavha navho, zwo ita uri vha vhofholowe musi vhe nae.

Yesu o vha a tshi rabela Khotsi awe tshifhinga tshoṱhe, musi e eṱhe na musi e na vhaṅwe vhashumeli vha Mudzimu. O vha a tshi lunzhi, hu si musi a tshi ḽa fhedzi. O vha a tshi rabela u itela u livhuwa Khotsi awe, u mu renda na u ṱoḓa u livhiswa ngae a sa athu ita phetho.

Na musi Yesu o neta, o vha o ḓiimisela u thusa vhaṅwe. Vhaṅwe vhathu vho vha vhe vha ndeme u fhira ene muṋe. Na kha zwenezwi o ri vhetshela tsumbo yavhuḓi ine ra nga i edzisa.

Yesu ho ngo sokou funza nga ha u hangwela fhedzi, o zwi sumbedza nga nḓila ye a vha a tshi shumisana na vhafunziwa vhawe ngayo na vhaṅwe.

Zwo vha zwo dzula zwo porofitiwa uri Vhayuda vhanzhi vho vha vha sa ḓo ṱanganedza Messia na uri maswina awe o vha a tshi ḓo mu vhulaya. Zwenezwi zwo vha zwi tshi nga ita uri Yesu a sa ḓiimisela u thusa vhathu nga vhuḓalo. Nṱhani hazwo, o funza mafhungo ngoho nga u fhisea. O vhetshela tsumbo ya u fhisea vhatevheli vhawe vhane vha sa farwe zwavhuḓi kana vhane vha tovholwa.

Yesu u fhira vhathu vha songo fhelelaho nga zwithu zwinzhi. Sa tsumbo u na nḓivho na vhuṱali u fhira riṋe vhathu. O vha e na mutakalo wavhuḓi nahone o ṱalifha u fhira vhathu vhoṱhe vhe vha vha vhe tsini nae. Fhedzi o shumela vhaṅwe nga u ḓiṱukufhadza.

Yesu o vha a sa fheleli mbilu vhaapostola vhawe na vhaṅwe musi vha tshi kundelwa u tevhela tsumbo yawe kana u ita zwine a vha vhudza. O vha a tshi dovholola zwe a vha gudisa zwine zwa ḓo vha thusa u sendela tsini na Mudzimu a sa vha fheleli mbilu.