Nganea 6: Murwa Wavhuḓi, na Muvhi
Vhonani Kaini na Abele zwino. Vhoṱhe vho no aluwa. Kaini o vha mulimi. O vha a tshi lima dzithoro na mitshelo na miroho.
![Kaini na Abele vha khou ṋea Mudzimu zwiṱhavhelo](https://assetsnffrgf-a.akamaihd.net/assets/l/my/my_VE/06.jpg)
Abele a vha mulisa wa dzinngu. O vha a tshi funa u londola ngwana ṱhukhu. Dza aluwa dza vha nngu khulwane, nahone nga u ṱavhanya Abele a vha na sambi ḽoṱhe ḽa nngu dza u lisa.
Ḽiṅwe ḓuvha Kaini na Abele vha ḓisela Yehova tshifhiwa. Kaini a ḓisa zwiḽiwa zwe a lima. Abele a ḓisa nngu yavhuḓi ye a vha e nayo. Yehova a takadzwa nga Abele na tshifhiwa tshawe. Fhedzi a si takadzwe nga Kaini na tshifhiwa tshawe. Ni a ḓivha uri ndi ngani?
A si uri tshifhiwa tsha Abele tsho vha tshi khwine kha tsha Kaini. Ndi ngauri Abele o vha a tshi funa Yehova na mukomana wawe. Fhedzi Kaini o vha e muvhi; a sa funi murathu wawe.
Ngauralo Mudzimu a vhudza Kaini uri u fanela u litsha nḓila dzawe. Fhedzi Kaini a si thetshelese. A sinyuwa zwihulu nge Mudzimu a funa Abele. Ngauralo Kaini a ri kha Abele, ‘Kha ri ye tsimuni.’ Musi vhe vhoṱhe henengei, Kaini a rwa murathu wawe Abele a mu vhulaha. Naa itsho tsho vha tshi si tshithu tshi ofhisaho uri Kaini a tshi ite?
![Kaini u khou shavha nga murahu ha u vhulaha Abele](https://assetsnffrgf-a.akamaihd.net/assets/l/my/my_VE/06a.jpg)
Naho Abele o fa, Mudzimu u kha ḓi mu humbula. Abele o vha e wavhuḓi, nahone Yehova ha hangwi muthu o raloho. Ngauralo ḽiṅwe ḓuvha Yehova Mudzimu u ḓo humisela Abele vhutshiloni hune a sa tsha ḓo fa. U ḓo kona u tshila fhano ḽifhasini nga hu sa fheli. Naa a zwi nga vhi zwavhuḓi u ḓivha vhathu vha ngaho Abele?
Mudzimu ha takadzwi nga vhathu vha ngaho Kaini. Musi Kaini o vhulaha murathu wawe, Mudzimu a mu pandela muṱani woṱhe. Musi Kaini a tshi ṱuwa uri a yo dzula huṅwe kha ḽifhasi, a dzhia muṅwe wa khaladzi dzawe, a vha musadzi wawe.
Tshifhinga tshi tshi ya Kaini na musadzi wawe vha thoma u vha na vhana. Vhaṅwe vharwa na vhananyana vha Adamu na Eva vha vhingana, na vhone-vho vha vha na vhana. Nga u ṱavhanya ha vha na vhathu vhanzhi kha ḽifhasi. Kha ri gude nga ha vhaṅwe vhavho.
Genesi 4:2-26; 1 Yohane 3:11, 12; Yohane 11:25.
Mbudziso
- Kaini na Abele vho vha vha tshi shuma u ita mini?
- Ndi zwifhiwa zwifhio zwe Kaini na Abele vha zwi ṋea Yehova?
- Ndi ngani Yehova o takalela tshifhiwa tsha Abele, nahone ndi ngani a songo takalela tsha Kaini?
- Kaini ndi muthu-ḓe, nahone Yehova o lingedza hani u mu khakhulula?
- Kaini o ita mini musi e na murathu wawe tsimuni?
- Ṱalutshedzani zwe zwa itea kha Kaini nga murahu ha u vhulaha murathu wawe.
Mbudziso dzo engedzeaho
- Vhalani Genesi 4:2-26.
Yehova o ṱalusa hani vhuimo vhu re na khombo he Kaini a vha e khaho? (Gen. 4:7)
Kaini o sumbedza hani zwe zwa vha zwi mbiluni yawe? (Gen. 4:9)
Mavhonele a Yehova ndi afhio malugana na u shulula malofha a si na mulandu? (Gen. 4:10; Yes. 26:21)
- Vhalani 1 Yohane 3:11, 12.
Ndi ngani Kaini o sinyuwa, nahone zwenezwi zwi ri sevha hani ṋamusi? (Gen. 4:4, 5; Mir. 14:30; 28:22)
Bivhili i sumbedza hani uri naho miraḓo yoṱhe ya muṱa washu i tshi nga pikisa Yehova, ri nga dzula ri tshi fulufhedzea? (Ps. 27:10; Mat. 10:21, 22)
- Vhalani Yohane 11:25.
Ndi khwaṱhisedzo ifhio ine Yehova a i ṋea vhoṱhe vhane vha fela u luga? (Yoh. 5:24)