Arali muṅwe muthu a tshi khou ḓa hune na vha hone nahone o lapfa u swika kha ṱhanga ya nnḓu ya haṋu, ni nga humbula mini? Muthu uyo u ḓo vha e mulapfu! Ho vhuya ha vha na vhanna vhalapfu nangoho kha ḽifhasi. Bivhili i sumbedza uri vhokhotsi avho vho vha vhe vharuṅwa vha ṱaḓulu. Fhedzi izwo zwi nga itea hani?

Humbulani, muruṅwa muvhi Sathane o vha a tshi khou ḓi ita khakhathi. O vha a tshi khou ita na uri vharuṅwa vha Mudzimu vha vhe vhavhi. Mafheleloni, vhaṅwe vha avha vharuṅwa vha thetshelesa Sathane. Vha litsha u shumela Mudzimu ṱaḓulu. Vha ḓa kha ḽifhasi vha ḓiitela mivhili ya vhathu. Ni a ḓivha uri ndi ngani?

Bivhili i ri ndi ngauri vharwa avha vha Mudzimu vho vhona vhasadzi vha u naka kha ḽifhasi nahone vha ṱoḓa u dzula navho. Ngauralo vha ḓa kha ḽifhasi vha vha vhinga. Bivhili i ri izwi zwo khakhea, ngauri vharuṅwa vho itelwa u dzula ṱaḓulu.

Musi vharuṅwa na vhasadzi vhavho vha tshi vha na vhana, vhana avha vho vha vho fhambana na vhaṅwe. Khamusi u thomani zwo vha zwi sa vhonalesi. Fhedzi vha ḓi hula vha hula, vha ḓi vha na maanḓa vha tshi ya, u swikela vha tshi vha vhalapfu.

Avha vhanna vhalapfu vho vha vhe vhavhi. Ngauri vho vha vhe vhahulu vhe na maanḓa, vho vha vha tshi huvhadza vhathu. Vho lingedza u kombetshedza vhathu vhoṱhe uri vha vhe vhavhi sa vhone.

Henoxe o vha o no fa, fhedzi zwino ho vha hu na munna muthihi kha ḽifhasi we a vha e wavhuḓi. O vha a tshi pfi Noaxe. O vha a tshi ita zwe Mudzimu a vha a tshi ṱoḓa uri a zwi ite.

Ḽiṅwe ḓuvha Mudzimu a vhudza Noaxe uri tshifhinga tsho vha tsho swika tsha uri A fhelise vhathu vhavhi vhoṱhe. Fhedzi o vha a tshi ḓo tshidza Noaxe, muṱa wawe na zwipuka zwinzhi. Kha ri vhone uri Mudzimu o zwi itisa hani.

Genesi 6:1-8; Yuda 6.