Nganea 9: Noaxe U Fhaṱa Gungwa
Noaxe o vha e na musadzi na vharwa vhararu vho vha vha vhe Semu, Hamu na Yafete. Vharwa vhoṱhe vho vha vhe na vhasadzi. Ngauralo ho vha hu na vhathu vha malo muṱani wa Noaxe.
Zwino Mudzimu a ita uri Noaxe a ite tshithu tshi mangadzaho. A mu vhudza uri a fhaṱe gungwa ḽihulu sa tshikepe, fhedzi ḽo vha ḽi tshi fana na bogisi ḽihulu, ḽilapfu. Mudzimu a ri: ‘Ḽi ite zwipiḓa zwiraru zwo ṋamelanaho, a ite dzikamara khaḽo.’ Kamara dzo vha dzi dza Noaxe na muṱa wawe, zwipuka na zwiḽiwa.
Mudzimu o vhudza Noaxe na uri a thivhe gungwa uri hu si vhe na maḓi a dzhenaho. A ri: ‘Ndi ḓo rumela maḓi mahulu nda fhelisa shango ḽoṱhe. Vhane vha si vhe gungwani vha ḓo fa.’
Noaxe na vharwa vhawe vha thetshelesa Yehova vha thoma u fhaṱa. Fhedzi vhaṅwe vhathu vha sokou sea. Ha si vhe na we a tenda musi Noaxe a tshi vha vhudza zwe Mudzimu a vha a tshi ḓo ita.
Zwo dzhia tshifhinga u fhaṱa gungwa ngauri ḽo vha ḽi ḽihulwane. Nga murahu ha miṅwaha minzhi ḽa fhela. Zwino Mudzimu a vhudza Noaxe uri a ḓise zwipuka gungwani. A ri a ḓise zwivhili zwa dziṅwe tshaka dza zwipuka, tshiduna na tshisadzi. Fhedzi zwa dziṅwe tshaka dza zwipuka, Mudzimu a vhudza Noaxe uri a ḓise zwa sumbe. Mudzimu a vhudza Noaxe uri a ḓise na tshaka dzoṱhe dza zwiṋoni. Noaxe a ita zwenezwo zwe Mudzimu a amba.
Nga murahu, Noaxe na muṱa wawe na vhone vha dzhena gungwani. Zwenezwo Mudzimu a vala muṋango. Noaxe na muṱa wawe vha lindela ngomu. Edzanu humbula ni henefho gungwani navho, ni tshi khou lindela. Naa vhukuma ho vha hu tshi ḓo vha na maḓi mahulu samusi Yehova o amba?
Genesi 6:9-22; 7:1-9.
Mbudziso
- Ho vha hu na vhathu vhangana muṱani wa Noaxe, nahone vharwa vhawe vhararu ndi vhonnyi?
- Ndi tshithu tshifhio tshi songo ḓoweleaho tshe Mudzimu a humbela uri Noaxe a tshi ite, nahone ndi ngani?
- Vhathu vha misini ya Noaxe vho aravha hani musi a tshi vha vhudza nga ha gungwa?
- Mudzimu o vhudza Noaxe uri a ite mini nga zwipuka?
- Nga murahu ha musi Mudzimu o vala muṋango wa gungwa, Noaxe na muṱa wawe vho vha vha tshi fanela u ita mini?
Mbudziso dzo engedzeaho
- Vhalani Genesi 6:9-22.
Ndi mini zwe zwa ita uri Noaxe a vhe mugwadameli wavhuḓi wa Mudzimu wa ngoho? (Gen. 6:9, 22)
Yehova u ḓipfa hani nga ha vhuvemu, nahone zwenezwi zwi fanela u kwama hani u ḓimvumvusa hune ra hu khetha? (Gen. 6:11, 12; Ps. 11:5)
Ri nga edzisa hani Noaxe musi ri tshi wana vhulivhisi vhu bvaho ndanguloni ya Yehova? (Gen. 6:22; 1 Yoh. 5:3)
- Vhalani Genesi 7:1-9.
Mbuno ya uri Yehova o dzhia vhathu vha songo fhelelaho u fana na Noaxe sa vho lugaho i ri khuthadza hani ṋamusi? (Gen. 7:1; Mir. 10:16; Yes. 26:7)
