Zwithu zwavhuḓi zwoṱhe zwi bva ha Mudzimu. O ita ḓuvha uri ḽi ri fhe tshedza masiari, na ṅwedzi na dziṋaledzi uri ri vhe na tshedza vhusiku. Mudzimu o ri itela ḽifhasi uri ri dzule khaḽo.

Fhedzi Mudzimu ho ngo thoma a ita ḓuvha, ṅwedzi na dziṋaledzi na ḽifhasi. Mudzimu o thoma a ita vhathu vha ngaho ene. Havha vhathu a ri vha vhoni, samusi ri sa koni u vhona Mudzimu. Bivhilini havha vhathu vha vhidzwa vharuṅwa. Mudzimu o ita vharuṅwa uri vha dzule nae ṱaḓulu.

Muruṅwa we Mudzimu a thoma u mu ita o vha o khethea zwihulu. O vha e Murwa wa u thoma wa Mudzimu we a shuma na Khotsi awe. O thusa Mudzimu u ita zwiṅwe zwithu zwoṱhe. O thusa Mudzimu u ita ḓuvha, ṅwedzi, dziṋaledzi na ḽifhasi ḽashu.

Ḽifhasi ḽo vha ḽo tou ita hani zwenezwo? U thomani ho vha hu si na we a vha a tshi nga tshila kha ḽifhasi. Ho vha hu tshi sokou vha lwanzhe luthihi lwa maḓi. Ngauralo Mudzimu a thoma u ri lugisela zwithu. A ita mini?

Zwino, tsha u thoma ḽifhasi ḽo ṱoḓa tshedza. Ngauralo Mudzimu a ita uri tshedza tsha ḓuvha tshi penye kha ḽifhasi. A tshi ita uri hu vhe na vhusiku na masiari. Nga murahu Mudzimu a ita uri shango ḽi bve maḓini a lwanzhe.

U thomani ho vha hu si na tshithu kha shango. Ḽo vha ḽi tshi fana na tshifanyiso tshine na tshi vhona afha. Ho vha hu si na maluvha kana miri kana zwipuka. Ho vha hu si na na khovhe malwanzheni. Mudzimu o vha e na mushumo munzhi wa u ita uri ḽifhasi ḽi nake u itela uri zwipuka na vhathu zwi dzule khaḽo.

Yeremia 10:12; Vhakolosa 1:15-17; Genesi 1:1-10.