Nganea 2: Tsimu Ya u Naka
Vhonani ḽifhasi afha! Zwoṱhe zwo naka hani! Vhonani hatsi na miri, maluvha na zwipuka zwoṱhe. Ni nga sumba nḓou na dzindau?
Tsimu iyi ya u naka yo vha hone hani? Zwino, kha ri vhone uri Mudzimu o ri lugisela hani ḽifhasi.
Tsha u thoma, Mudzimu o ita hatsi uri vhu fukedze shango. A ita na tshaka dzoṱhe dza zwimela zwiṱuku na maḓaka na miri. Izwi zwithu zwi melaho zwi thusa u nakisa ḽifhasi. Fhedzi vhunzhi hazwo zwi ri fha na zwiḽiwa zwi ḓifhaho vhukuma.
Mudzimu a kona u ita khovhe uri dzi tale maḓini na zwiṋoni uri zwi fhufhe lutomboni. A ita zwipuka zwihulwane na zwiṱuku. Ndi zwifhio zwipuka zwi dzulaho tsini na haya haṋu? Naa a ro ngo fanela u takala nge Mudzimu a ri itela izwi zwithu zwoṱhe?
Mafheleloni, Mudzimu a ita uri tshipiḓa tshithihi tsha ḽifhasi tshi vhe fhethu ho khetheaho zwihulu. Fhethu afha a hu vhidza tsimu ya Edeni. Yo vha yo fhelela. Zwoṱhe khayo zwo vha zwo naka. Nahone Mudzimu o ṱoḓa uri ḽifhasi ḽoṱhe ḽi fane na iyi tsimu ya u naka ye a vha o i ita.
Fhedzi dovhani ni sedze tshifanyiso tsha iyi tsimu. Ni a ḓivha uri Mudzimu o vhona uri ho vha hu tshi khou ṱahela mini? Kha ri vhone.
Genesi 1:11-25; 2:8, 9.
Mbudziso
- Mudzimu o lugiselela hani ḽifhasi uri ḽi vhe haya hashu?
- Ṱalusani phukha dzo fhamba-fhambanaho dze Mudzimu a dzi ita. (Sedzani tshifanyiso.)
- Ndi ngani tsimu ya Edeni yo vha yo khethea?
- Mudzimu o vha a tshi ṱoḓa uri ḽifhasi ḽoṱhe ḽi fane na mini?
Mbudziso dzo engedzeaho
- Vhalani Genesi 1:11-25.
Mudzimu o sika mini nga ḓuvha ḽa vhuraru? (Gen. 1:12)
Ho itea mini nga ḓuvha ḽa vhuṋa ḽa tsiko? (Gen. 1:16)
Ndi zwipuka zwa mufuda-ḓe zwe Mudzimu a zwi ita nga ḓuvha ḽa vhuṱanu na ḽa vhurathi? (Gen. 1:20, 21, 25)
- Vhalani Genesi 2:8, 9.
Ndi miri ifhio mivhili yo khetheaho ye Mudzimu a i vhea tsimuni, nahone yo vha i tshi imela mini?
