Nganea 4: Vho Xelelwa nga Haya Havho
Vhonani uri hu khou itea mini zwino. Adamu na Eva vha khou bviswa tsimuni ya u naka ya Edeni. Ni a ḓivha uri ndi ngani?
Ndi ngauri vho ita tshithu tshivhi nga maanḓa. Nahone Yehova u khou vha ṱarafa. Ni a ḓivha zwe Adamu na Eva vha ita?
Vho ita tshithu tshe Mudzimu a vha vhudza uri vha songo ita. Mudzimu o vha vhudza uri vha nga ḽa mirini ya tsimu. Fhedzi murini muthihi a ri vha songo ḽa, vha sa ḓo fa. Muri uyo a u ita uri u vhe wawe. Nahone ri a ḓivha uri zwo khakhea u dzhia tshithu tsha muṅwe, a si zwone? Zwino, ha itea mini?
Ḽiṅwe ḓuvha musi Eva e eṱhe tsimuni, ṋowa ya amba nae. Edzanu humbula! Ya vhudza Eva uri a ḽe mutshelo wa muri we Mudzimu a vha vhudza uri vha songo ḽa. Zwino, musi Yehova a tshi ita dziṋowa ho ngo dzi ita uri dzi kone u amba. Ngauralo izwi zwi nga amba uri muṅwe muthu o vha a tshi khou ita uri ṋowa i ambe. O vha e nnyi?
O vha a si Adamu. Ngauralo ho fanela ho vha muṅwe wa vhathu vhe Yehova a vha o vha ita a sa athu u ita ḽifhasi. Vhathu avho ndi vharuṅwa, nahone a ri koni u vha vhona. Muruṅwa uyu muthihi o vha o ḓikukumusa. A thoma a humbula uri u fanela u vha muvhusi sa Mudzimu. A ṱoḓa uri vhathu vha mu thetshelese nṱhani ha Yehova. O vha e ene muruṅwa we a ita uri ṋowa i ambe.
Muruṅwa uyu o kona u fhura Eva. Musi a tshi mu vhudza uri u ḓo fana na Mudzimu arali a ḽa mutshelo, Eva a tenda. Ngauralo Eva a ḽa, na Adamu a ḽa-vho. Adamu na Eva vha si thetshelese Mudzimu, nahone ndi nga hone vho xelelwa nga haya havho ha u naka.
Fhedzi ḽiṅwe ḓuvha Mudzimu u ḓo ita uri ḽifhasi ḽoṱhe ḽi nake sa tsimu ya Edeni. Nga murahu ri ḓo guda uri ni nga ṱanganela hani kha u ita uri ḽi tou ralo. Fhedzi zwino, kha ri wane uri ho itea mini kha Adamu na Eva.
Genesi 2:16, 17; 3:1-13, 24; Ndzumbululo 12:9.
Mbudziso
- Kha itshi tshifanyiso, hu khou itea mini kha Adamu na Eva?
- Ndi ngani Yehova o vha ṱarafa?
- Ṋowa yo vhudza Eva mini?
- Ndi nnyi o itaho uri ṋowa i ambe na Eva?
- Ndi ngani Adamu na Eva vho xelelwa nga haya havho ha Paradiso?
Mbudziso dzo engedzeaho
- Vhalani Genesi 2:16, 17 na 3:1-13, 24.
Mbudziso ye ṋowa ya i vhudzisa Eva yo ita uri Yehova a vhonale e muthu muvhi nga nḓila-ḓe? (Gen. 3:1-5; 1 Yoh. 5:3)
Eva ndi tsumbo i sevhaho kha riṋe nga nḓila-ḓe? (Vha-Fil. 4:8; Yak. 1:14, 15; 1 Yoh. 2:16)
Adamu na Eva vho kundelwa hani u ṱanganedza vhuḓifhinduleli ha zwiito zwavho? (Gen. 3:12, 13)
Vhakerube vhe vha vhewa tsimuni ya Edeni thungo ya vhubvaḓuvha vho tikedza hani vhuvhusahoṱhe ha Yehova? (Gen. 3:24)
- Vhalani Ndzumbululo 12:9.
Sathane o bvelela hani kha u ita uri vhathu vha shandukele vhuvhusi ha Mudzimu? (1 Yoh. 5:19)