Nganea 7: Munna A Sa Ofhi
Musi vhathu vha tshi thoma u ḓala kha ḽifhasi, vhanzhi vho ita zwithu zwivhi sa Kaini. Fhedzi munna muthihi o vha o fhambana navho. Ndi hoyu munna a vhidzwaho Henoxe. Henoxe o vha e munna a sa ofhi. Vhathu vhoṱhe vho vha vha tshi ita zwo vhifhaho zwihulu, fhedzi Henoxe a ḓi shumela Mudzimu.
Ni a ḓivha uri ndi ngani vhathu vho ita zwithu zwinzhi zwivhi? Zwino, humbulani, Ndi nnyi we a ita uri Adamu na Eva vha si thetshelese Mudzimu na u ḽa mutshelo we Mudzimu a ri vha songo ḽa? Ee, o vha e muruṅwa muvhi. Bivhili i mu vhidza Sathane. Nahone o vha a tshi khou lingedza u ita uri vhoṱhe vha vhe vhavhi.
Ḽiṅwe ḓuvha Yehova a ri Henoxe a vhudze vhathu tshithu tshe vha si ṱoḓe u tshi pfa. Tsho vha tshi hetshi: ‘Ḽiṅwe ḓuvha Mudzimu u ḓo fhelisa vhathu vhavhi vhoṱhe.’ Khamusi vhathu vho sinyuwa zwihulu vha tshi pfa izwi. Khamusi vho lingedza u mu vhulaha. Ngauralo zwo ṱoḓa uri Henoxe a si ofhe u vhudza vhathu zwine Mudzimu a ḓo ita.
Mudzimu ho ngo tendela Henoxe u tshila tshifhinga tshilapfu vhukati ha avho vhathu vhavhi. Henoxe o tshila miṅwaha ya 365 fhedzi. Ndi ngani ri tshi ri “miṅwaha ya 365 fhedzi”? Ngauri vhathu maḓuvhani ayo vho vha vha tshi tshila tshifhinga tshilapfu. Ngani, Methusala murwa wa Henoxe o tshila miṅwaha ya 969!
Zwino, Henoxe o no fa, vhathu vha tou ṋaṋa. Bivhili i ri ‘zwoṱhe zwe vha humbula zwo vha zwi zwivhi tshifhinga tshoṱhe,’ na uri ‘ḽifhasi ḽa ḓala vhuvemu.’
Ni a ḓivha tshiṅwe tsho itisaho khakhathi kha ḽifhasi maḓuvhani ayo? Ndi ngauri Sathane o vha e na nḓila ntswa ya u ita uri vhathu vha ite zwivhi. Ri ḓo guda nga ha izwi kha a tevhelaho.
Genesi 5:21-24, 27; 6:5; Vhaheberu 11:5; Yuda 14, 15.
Mbudziso
- Henoxe o vha o fhambana hani na vhaṅwe vhathu?
- Ndi ngani vhathu vha misini ya Henoxe vho vha vha tshi ita zwithu zwivhi nga u rali?
- Ndi zwifhio zwenezwo zwithu zwivhi zwe vhathu vha vha vha tshi khou zwi ita? (Sedzani tshifanyiso.)
- Ndi ngani Henoxe o vha a songo fanela u ofha?
- Vhathu vha tshenetsho tshifhinga vho vha vha tshi tshila tshifhinga tshingafhani, fhedzi Henoxe o tshila tshifhinga tshingafhani?
- Nga murahu ha musi Henoxe o no fa ho itea mini?
Mbudziso dzo engedzeaho
- Vhalani Genesi 5:21-24, 27.
Henoxe o vha e na vhushaka-ḓe na Yehova? (Gen. 5:24)
U ya nga Bivhili, munna we a tshila miṅwaha minzhi u fhira vhathu vhoṱhe ndi nnyi, nahone musi a tshi fa o vha e na miṅwaha mingana? (Gen. 5:27)
- Vhalani Genesi 6:5.
Zwiimo zwo vha zwo vhifha nga nḓila-ḓe kha ḽifhasi musi Henoxe o no fa, nahone zwenezwi ri nga zwi vhambedza hani na ṋamusi? (2 Tim. 3:13)
- Vhalani Vha-Heberu 11:5.
Ndi pfaneleo ifhio ya Henoxe ye ya “takadza Mudzimu,” nahone ha vha na mvelelo ifhio? (Gen. 5:22)
- Vhalani Yuda 14, 15.
Ṋamusi Vhakriste vha nga edzisa hani u sa ofha u fana na Henoxe musi vha tshi khou sevha vhathu nga ha nndwa ine ya khou ḓa ya Haramagedo? (2 Tim. 4:2; Vha-Heb. 13:6)
