Ha fhira miṅwaha minzhi. Vharwa vha Noaxe vha vha na vhana vhanzhi. Na vhana vhavho vha aluwa vha vha na vhana vho engedzeaho. Nga u ṱavhanya ha vha na vhathu vhanzhi kha ḽifhasi.

Muṅwe wa avha vhathu o vha e muḓuhulu wa Noaxe a vhidzwaho Nimirodo. O vha e munna muvhi we a zwima na u vhulaha zwipuka na vhathu. Nimirodo o ḓiita na khosi ya u vhusa vhaṅwe vhathu. Mudzimu ho ngo funa Nimirodo.

Vhathu vhoṱhe itsho tshifhinga vho vha vha tshi amba luambo luthihi. Nimirodo o ṱoḓa u vha vhea fhethu huthihi uri a kone u vha vhusa. A vhudza vhathu uri vha fhaṱe muḓi na mutsheṱo muhulu khawo. Vha vhoneni tshifanyisoni vha tshi khou ita zwidina.

Yehova Mudzimu ho ngo takadzwa nga hetshi tshifhaṱo. Mudzimu o ṱoḓa uri vhathu vha ṱuwe vha dzule hoṱhe kha ḽifhasi. Fhedzi vhathu vha ri: Ìḓani! Kha ri fhaṱe muḓi na mutsheṱo mulapfu lune ṱhodzi yawo ya guma makoleni. Ngauralo ri ḓo vha vhahulwane!’ Vhathu vho ḓiṱoḓela vhuhulwane, hu si Mudzimu.

Ngauralo Mudzimu a ita uri vhathu vha litshe u fhaṱa mutsheṱo. Ni a ḓivha uri o zwi itisa hani? Nga u ṱavhanya a ita uri vhathu vha ambe nyambo dzo fhambanaho, nṱhani ha luthihi fhedzi. Vhafhaṱi vha si tsha pfesesana. Ndi nga hone muḓi wavho wo vhidzwa Babele, zwine zwa amba “Phiringano.”

Zwino vhathu vha thoma u ṱuwa Babele. Zwigwada zwa vhathu vhe vha amba luambo luthihi zwa ṱuwa zwa dzula zwoṱhe kha zwiṅwe zwipiḓa zwa ḽifhasi.

Genesi 10:1, 8-10; 11:1-9.