Yosefa a si kone u fara u ḓipfa hawe. A vhudza vhaḓinḓa vhawe uri vha bve nḓuni. Musi a eṱhe na vhakomana vhawe, Yosefa. a thoma u lila. Ri nga tou humbulela uri vhakomana vhawe vho mangala hani, ngauri vho vha vha sa ḓivhi uri u lilelani. Mafheleloni a ri: ‘Ndi nṋe Yosefa. Khotsi anga u kha ḓi tshila?’

Vhakomana vhawe vha mangala lwe vha si kone u amba. Vha ofha. Fhedzi Yosefa a ri: ‘Sendelani tsini.’ Vha tshi sendela a ri: ‘Ndi murathu wa vhoinwi we na mu rengisela Egipita.’

Yosefa a bvela phanḓa a amba nga vhulenda: ‘Ni songo dinalea nge na nthengisela fhano. O vha e Mudzimu we a nthumela Egipita uri ndi tshidze vhathu. Farao o nnyita muvhusi wa shango ḽoṱhe. Zwino ṱavhanyani ni vhuyelele ha khotsi anga ni mu vhudze izwi. Ni mu vhudze uri a ḓe a dzule fhano.’

Zwino Yosefa a vhea zwanḓa zwawe kha vhakomana vhawe, a vha kuvhatedza a vha khisa vhoṱhe. Musi Farao a tshi pfa uri vhakomana vha Yosefa vho ḓa, a vhudza Yosefa: ‘Kha vha dzhie dzigoloi vha ye u dzhia khotsi avho na miṱa yavho vha vhuye fhano. Ndi ḓo vha fha shango ḽavhuḓi kha Egipita ḽoṱhe.’

Vha ita ngauralo. Afha ni nga vhona Yosefa a tshi khou ṱanganedza khotsi awe a tshi ḓa Egipita na muṱa wawe woṱhe.

Muṱa wa Yakobo wo vha wo no vha muhulu. Vhoṱhe vho vha vhe 70 musi vha tshi pfulutshela Egipita, ri tshi vhalela Yakobo na vhana vhawe na vhaḓuhulu. Fhedzi ho vha hu na vhasadzi, khamusi na vhaḓinḓa vhanzhi. Vhoṱhe avha vha dzula Egipita. Vho vha vha tshi vhidzwa Vhaisiraele, ngauri Mudzimu o vha o shandula dzina ḽa Yakobo ḽa vha Isiraele. Vhaisiraele vha vha vhathu vho khetheaho kha Mudzimu, samusi ri tshi ḓo vhona nga murahu.

Genesi 45:1-28; 46:1-27.