Nganea 11: Musingavhadzimu Wa u Thoma
Ni a ḓivha tshithu tsha u thoma tshe Noaxe a ita musi ene na muṱa wawe vha tshi bva gungwani? O itela Mudzimu tshiṱhavhelo kana tshifhiwa. Ni nga mu vhona a tshi khou ita izwi tshifanyisoni afho fhasi. Noaxe o ṋekedza tshifhiwa itshi tsha zwipuka u livhuha Mudzimu nge a tshidza muṱa wawe maḓini mahulu.
Naa ni humbula uri Yehova o takadzwa nga tshifhiwa? Ee, tsho mu takadza. Nahone a fulufhedzisa Noaxe uri ha tsha ḓo dovha a fhelisa shango nga maḓi mahulu.
Nga u ṱavhanya shango ḽa oma ḽoṱhe, nahone Noaxe na muṱa wawe vha thoma vhutshilo vhuswa nnḓa ha gungwa. Mudzimu a vha fhaṱutshedza a vha vhudza: ‘Ni fanela u vha na vhana vhanzhi. Ni fanela u ḓala u swikela vhathu vha tshi dzula ḽifhasini ḽoṱhe.’
Fhedzi nga murahu, vhathu vho vha vha tshi nga ofha uri maḓi mahulu a ngaho ayo a ḓo dovha a itea. Ngauralo Mudzimu a ṋekedza tshithu tshine tsha ḓo humbudza vhathu nga ha fulufhedziso ḽawe ḽa uri ha tsha ḓo dovha a ḓadza ḽifhasi nga maḓi. Ni a ḓivha uri tshithu itshi tsho vha tshi mini? Musingavhadzimu.
Musingavhadzimu u anza u vhonala lutomboni musi ḓuvha ḽi tshi penya musi mvula yo na. U nga vha na mivhala minzhi. Naa no no vhuya na u vhona? Ni a u vhona u re tshifanyisoni?
Mudzimu o fulufhedzisa: ‘Vhathu vhoṱhe na zwipuka a zwi tsha ḓo fheliswa nga maḓi mahulu. Ndi khou vhea musingavhadzimu wanga makoleni. Nahone musi musingavhadzimu u tshi bvelela, ndi ḓo u vhona nda humbula fulufhedziso ḽanga.’
Ngauralo musi ni tshi vhona musingavhadzimu, u fanela u ni humbudza mini? Ee, fulufhedziso ḽa Mudzimu ḽa uri ha tsha ḓo dovha a fhelisa shango nga maḓi mahulu.
Genesi 8:18-22; 9:9-17.
Mbudziso
- Samusi zwo sumbedzwa kha tshifanyiso, ndi tshithu tshifhio tsha u thoma tshe Noaxe a tshi ita musi a tshi bva gungwani?
- Nga murahu ha Maḓi Mahulu Mudzimu o ṋea Noaxe na muṱa wawe ndaela ifhio?
- Ndi fulufhedziso ḽifhio ḽe Mudzimu a ḽi ita?
- Musi ri tshi vhona musingavhadzimu, u fanela u ri humbudza mini?
Mbudziso dzo engedzeaho
- Vhalani Genesi 8:18-22.
Ṋamusi ri nga ṋea hani Yehova ‘munukho wavhuḓi’? (Gen. 8:21; Vha-Heb. 13:15, 16)
Yehova o vhona mini nga ha vhuimo ha mbilu ya muthu, nahone ri fanela u fhaṱutshela mini? (Gen. 8:21; Mat. 15:18, 19)
- Vhalani Genesi 9:9-17.
Ndi mulanga ufhio we Yehova a u vhofha na zwivhumbiwa zwoṱhe zwi tshilaho kha ḽifhasi? (Gen. 9:10, 11)
Mulanga wa musingavhadzimu wo vha u tshi ḓo vha hone u swika lini? (Gen. 9:16)