Nganea 14: Mudzimu U Linga Abrahamu
Ni a vhona zwine Abrahamu a khou ita afha? U na lufhanga, nahone zwi nga u khou ṱoḓou vhulaha murwa wawe. Ndi ngani a tshi nga zwi ita? Kha ri thome u vhona uri Abrahamu na Sara vho wana hani murwa wavho.
Humbulani, Mudzimu o vha fulufhedzisa uri vha ḓo vha na murwa. Fhedzi hezwo zwo vhonala zwi sa konadzei, ngauri Abrahamu na Sara vho vha vhe vhahulwane. Naho zwo ralo, Abrahamu a tenda uri Mudzimu a nga ita zwe zwa vhonala zwi sa konadzei. Ngauralo ha itea mini?
Ha ri Mudzimu o no ita fulufhedziso ḽawe, ṅwaha woṱhe wa fhira. Zwenezwo, musi Abrahamu e na miṅwaha ya 100 na Sara a na ya 90, vha vha na ṅwana wa mutukana a no pfi Isaka. Mudzimu o vha o vhulunga fulufhedziso ḽawe!
Fhedzi musi Isaka o no aluwa, Yehova a linga lutendo lwa Abrahamu. A ri: ‘Dzhia murwa wau Isaka u ye thavhani ine nda ḓo u sumbedza. Henengei u vhulahe murwa wau u mu ṋekedze sa tshiṱhavhelo.’
Eneo maipfi a fanela u vha o ṱungufhadza Abrahamu, nga ṅwambo wa uri Abrahamu o vha a tshi funa nga maanḓa murwa wawe. Nahone humbulani, Mudzimu o vha o fulufhedzisa uri vhana vha Abrahamu vho vha vha tshi ḓo dzula shangoni ḽa Kanana. Izwo zwo vha zwi tshi nga itea hani arali Isaka o fa? Abrahamu a si zwi pfesese, fhedzi a ḓi thetshelesa Mudzimu.
Musi a tshi swika thavhani, Abrahamu a vhofha Isaka a mu vhea kha aletare ye a fhaṱa. Nga murahu ha zwenezwo a dzhia lufhanga u itela u vhulaha murwa wawe. Fhedzi nga tshenetsho tshifhinga muruṅwa wa Mudzimu a vhidzelela a ri: ‘Abrahamu, Abrahamu!’ Nahone Abrahamu a fhindula a ri: ‘Ndi fhano.’
Mudzimu a ri: ‘Abrahamu, a songo huvhadza mutukana kana u ita tshithu khae. Zwino ndi a zwi ḓivha uri u na lutendo kha nṋe, ngauri a wo ngo nnzima murwa wau muthihi fhedzi.’
Abrahamu o vha e na lutendo lungafhani kha Mudzimu! O tenda uri a hu na tshi sa konadzei kha Yehova, na uri Yehova a nga ita na u vusa Isaka vhafuni. Fhedzi lwo vha lu si lufuno lwa Mudzimu uri Abrahamu a vhulahe Isaka. Mudzimu a ita uri nngu i fashwe tshiṱakani tsha tsini, a vhudza Abrahamu u ita ngayo tshiṱhavhelo nṱhani ha murwa wawe.
Genesi 21:1-7; 22:1-18.
Mbudziso
- Mudzimu o fulufhedzisa Abrahamu mini, nahone Mudzimu o ita hani zwe a zwi fulufhedzisa?
- Samusi zwo sumbedzwa kha tshifanyiso, Mudzimu o linga hani lutendo lwa Abrahamu?
- Abrahamu o ita mini, naho a songo pfesesa tshiitisi tsha ndaela ya Mudzimu?
- Ho itea mini musi Abrahamu a tshi bvisa lufhanga u itela uri a vhulahe murwa wawe?
- Lutendo lwa Abrahamu lwo vha lwo khwaṱha lungafhani?
- Mudzimu o ṋea Abrahamu mini uri ite tshiṱhavhelo, nahone nga nḓila-ḓe?
Mbudziso dzo engedzeaho
- Vhalani Genesi 21:1-7.
Ndi ngani Abrahamu o rubisa murwa wawe nga ḓuvha ḽa vhumalo? (Gen. 17:10-12; 21:4)
- Vhalani Genesi 22:1-18.
Isaka o sumbedza hani u ḓiṱukufhadza kha khotsi awe, Abrahamu, nahone zwenezwi zwo vha zwi tshi imela tshiitea tshifhio tshihulwane tsha tshifhingani tshi ḓaho? (Gen. 22:7-9; 1 Vha-Kor. 5:7; Vha-Fil. 2:8, 9)