Avha vhanna vhane Yakobo a khou amba navho ni a vha ḓivha? Nga murahu ha u tshimbila maḓuvha manzhi, Yakobo o ṱangana navho tshisimani vha tshi lisa nngu dzavho. A vhudzisa: ‘Ni bvafhi?’

Vha ri, ‘Harani.’

Yakobo a vhudzisa: ‘Labani ni a mu ḓivha?’

Vha fhindula: ‘Ee, vhona, ṅwananyana wawe Rahele ngoyu a tshi khou ḓa na sambi ḽawe ḽa nngu.’ Ni a mu vhona Rahele fhaḽa a tshi khou ḓa e kule?

Musi Yakobo a tshi vhona Rahele na nngu dza malume awe Labani, a ya a bvisa tombo tshisimani uri nngu dzi kone u nwa. Zwenezwo Yakobo a khisa Rahele a mu vhudza uri ndi ene nnyi. Rahele a takala zwihulu, a ya hayani a vhudza khotsi awe Labani.

Labani a takala zwihulu a dzula na Yakobo. Musi Yakobo a tshi humbela u vhinga Rahele, Labani a takala. Naho zwo ralo, a humbela Yakobo u shuma tsimuni yawe miṅwaha ya sumbe u itela Rahele. Yakobo a zwi ita. Fhedzi musi hu tshi ḓa tshifhinga tsha mbingano, ni a ḓivha uri ho itea mini?

Labani o fha Yakobo ṅwananyana wawe muhulwane Lea nṱhani ha Rahele. Musi Yakobo o tenda u shumela Labani miṅwaha ya sumbe yo engedzeaho, Labani a mu fha na Rahele sa musadzi wawe. Nga izwo zwifhinga Mudzimu o vha o tendela vhanna u vha na vhasadzi vha fhiraho muthihi. Fhedzi zwino, Bivhili i sumbedza uri munna u fanela u vha na musadzi muthihi fhedzi.

Genesi 29:1-30.