Vhonani Mushe a tshi khou shavha Egipita. Vhanna vhane vha khou mu pandamedza ni a vha vhona? Ni a ḓivha uri ndi ngani vha tshi ṱoḓou vhulaha Mushe? Kha ri vhone.

Mushe o alutshela nḓuni ya Farao, muvhusi wa Egipita. A vha munna muhulwane na o ṱalifhaho nga maanḓa. Mushe o zwi ḓivha uri vhabebi vhawe vha vhukuma vho vha vhe Vhaisiraele.

Ḽiṅwe ḓuvha, musi e na miṅwaha ya 40, Mushe a humbula u ya u vhona uri vhathu vha hawe vha khou tshila hani. Nḓila ye vha vha vha tshi farwa ngayo yo vha i tshi ofhisa. A vhona Muegipita a tshi khou rwa phuli ya Muisiraele. Mushe a livhalivha, a sa vhoni muthu o sedzaho, a rwa Muegipita a mu vhulaha. Zwenezwo Mushe a dzumba mutumbu wawe muṱavhani.

Ḓuvha ḽi tevhelaho Mushe a dovha a ya u vhona vhathu vha hawe. O humbula uri a nga vha thusa uri vha si tsha vha dziphuli. Fhedzi a vhona vhanna vhavhili vha Vhaisiraele vha tshi khou lwa, ngauralo Mushe a ri kha muṅwe we a vha o khakha: ‘Ndi ngani a tshi rwa murathu wau?’

Munna a ri: ‘Ndi nnyi o u itaho muvhusi washu na muhaṱuli washu? U ṱoḓou mmbulaha u fana na Muegipita?’

Zwino Mushe a ofha. A ḓivha uri vhathu vho zwi wana zwe a vha o ita kha Muegipita. Ndi ra na Farao o pfa nga hazwo, nahone a rumela vhanna uri vha vhulahe Mushe. Ndi nga hone Mushe o fanela u shavha Egipita.

Musi Mushe a tshi ṱuwa Egipita, a ya kule shangoni ḽa Midiani. Henengei a ṱangana na muṱa wa Yetero, a vhinga muṅwe wa vhananyana vhawe a vhidzwaho Tsipora. Mushe a vha mulisa a lisa nngu dza Yetero. A dzula shangoni ḽa Midiani miṅwaha ya 40. Zwino o vha e na miṅwaha ya 80. Zwino ḽiṅwe ḓuvha, musi Mushe a tshi khou lisa nngu dza Yetero, ha itea tshithu tshi mangadzaho tshe tsha shandula vhutshilo ha Mushe hoṱhe. Vulani siatari, ri vhone uri tshithu itshi tshi mangadzaho ndi mini.

Ekisodo 2:11-25; Mishumo 7:22-29.