Ni nga amba uri vhathu vha khou doba mini fhasi? Zwi nga mahaḓa. Ndi zwitshena, nahone ndi zwisekene zwi nga mapulo. Fhedzi a si mahaḓa; ndi zwithu zwa u ḽa.

Ho vha ho no fhela ṅwedzi tshee Vhaisiraele vha ṱuwa Egipita. Vho vha vhe sogani. Hafha hu mela zwiḽiwa zwiṱuku, nahone ngauralo vhathu vha gungula, vha ri: ‘Ngavhe Yehova a ri vhulahele Egipita. Henengei ro vha ri tshi wana zwiḽiwa.’

Ngauralo Yehova a ri: ‘Ndi ḓo ita uri zwiḽiwa zwi ne zwi tshi bva lutomboni.’ Yehova a ita ngauralo. Ḽi tshi tsha musi Vhaisiraele vha tshi vhona izwi zwithu zwitshena zwo waho, vha vhudzisana: ‘Ndi mini izwi?’

Mushe a ri: ‘izwi ndi zwiḽiwa zwe Yehova a ni fha uri ni ḽe.’ Vhathu vha zwi vhidza MANA. Yo vha i tshi ḓifha sa makhekhe masekene o itwaho nga mutoli wa ṋotshi.

Mushe a vhudza vhathu: ‘Muṅwe na muṅwe a dobedze zwine zwa nga mu eḓana.’ Matsheloni maṅwe na maṅwe vha ita ngauralo. Musi ḓuvha li tshi fhisa, mana yo salaho fhasi ya ṋoka.

Mushe a ri: ‘Hu songo vha na ane a vhea mana u swikela nga ḓuvha ḽi tevhelaho.’ Fhedzi vhaṅwe vha si thetshelese. Ni a ḓivha uri ha itea mini? Nga matsheloni a tevhelaho mana ye vha vhea yo vha yo ḓala zwivhungu, ya thoma u nukha!

Naho zwo ralo nga ḓuvha ḽa vhurathi Yehova a ita uri vhathu vha kuvhanganye mana nnzhi. Yehova a ri iṅwe i vhulungwe u swikela nga ḓuvha ḽi tevhelaho, ngauri o vha a sa nga iti uri i ne nga ḓuvha ḽa vhusumbe. Musi vha tshi sia mana u swikela nga ḓuvha ḽa vhusumbe, ya si ḓale zwivhungu nahone i si nukhe! Ho vha vhu vhuṅwe vhuṱolo!

Miṅwaha yoṱhe ye Vhaisiraele vha vha vhe sogani Yehova o vha a tshi vha fusha nga mana.

Ekisodo 16:1-36; Numeri 11:7-9; Yoshua 5:10-12.