Hu ṱoḓaho u vha miṅwedzi mivhili vho no bva Egipita, Vhaisiraele vha ḓa Thavhani ya Sinai, ine ya dovha ya vhidzwa Horebe. Afha ndi fhaḽa fhethu he Yehova a amba na Mushe e tshiṱakani tshi swaho. Vhathu vha akha dzidennde henefha vha dzulanyana.

Musi vhathu vho lindela ngeno fhasi, Mushe a gonya thavha. Henengei nṱha ha thavha, Yehova a vhudza Mushe uri U ṱoḓa uri Vhaisiraele vha Mu thetshelese na u vha vhathu Vhawe vho khetheaho. Musi Mushe a tshi tsa, a vhudza Vhaisiraele zwe Yehova a amba. Nahone vhathu vha amba uri vha ḓo thetshelesa Yehova ngauri vho vha vha tshi ṱoḓa u vha vhathu vhawe.

Yehova a ita tshithu tshi mangadzaho. A ita uri nṱha ha thavha hu bve mutsi, a ita mubvumo muhulu. A dovha a amba na vhathu: ‘Ndi nṋe Yehova Mudzimu wau we a u bvisa Egipita.’ A laya: ‘U songo rabela miṅwe midzimu nga nnḓa ha nṋe.’

Mudzimu a fha Vhaisiraele dziṅwe ndaela dza fumi, kana milayo. Vhathu vha ofha zwihulu. Vha vhudza Mushe: ‘Iwe amba na rine, ngauri ri ofha uri Yehova a amba na rine ri nga fa.’

Nga murahu Yehova a vhudza Mushe: ‘Iḓa ha nṋe thavhani. Ndi ḓo u fha mbaba mbili dza matombo dze nda ṅwala milayo khadzo ine nda ṱoḓa uri vhathu vha i vhulunge.’ Mushe a dovha a gonya thavha. maḓuvha a 40 na vhusiku hao a dzula henengei.

Mudzimu o vha e na milayo minzhi ya vhathu vhawe. Mushe a i ṅwala fhasi. Mudzimu a dovha a fha Mushe mbaba mbili dza matombo. Kha idzo, Mudzimu ene mune o vha o ṅwala milayo ya 10 ye a vhudza vhathu vhoṱhe. I vhidzwa Milayo ya Fumi.

Milayo ya Fumi yo vha i milayo mihulwane. Fhedzi na miṅwe milayo minzhi ye Mudzimu a fha Vhaisiraele yo vha i mihulwane na yone. Muṅwe wa iyo milayo ndi: ‘U fanela u funa Yehova Mudzimu wau nga mbilu yau yoṱhe, ngelelo yau yoṱhe, muya wau woṱhe na maanḓa au oṱhe.’ Nahone muṅwe ndi: ‘U fanela u funa muhura wau samusi u tshi ḓifuna.’ Murwa wa Mudzimu, Yesu Kristo, o ri iyi ndi milayo mihulwanesa ye Mudzimu a fha vhathu vhawe vha Isiraele. Nga murahu ri ḓo guda zwithu zwinzhi nga ha Murwa wa Mudzimu na pfunzo dzawe.

Ekisodo 19:1-25; 20:1-21; 24:12-18; 31:18; Doiteronomio 6:4-6: Levitiko 19:18; Mateo 22:36-40.