Nganea 36: Ṋamana ya Musuku
Tshukhwi! Vhathu vha khou itani zwino? Vha khou rabela ṋamana! Ndi ngani vha tshi khou ita izwi?
Musi Mushe a tshi dzula thavhani tshifhinga tshilapfu, vhathu vha ri: ‘A ri ḓivhi uri ho itea mini kha Mushe. Ngauralo kha ri ite mudzimu wa u ri bvisa shangoni iḽi.’
Aroni mukomana wa Mushe a ri: ‘Zwo luga, bvulani zwiṅina zwa vhoinwi zwa musuku, ni zwi ḓise kha nṋe.’ Aroni a zwi ṋokisa a ita ṋamana ya musuku. Vhathu vha ri: Ùyu ndi Mudzimu washu, we a ri bvisa Egipita!’ Vhaisiraele vha vha na tshimima tshihulu, nahone vha rabela ṋamana ya musuku.
Musi Yehova a tshi zwi vhona, a sinyuwa zwihulu. A ri kha Mushe: ‘Ṱavhanya u tse. Vhathu vha khou tshinya. Vho hangwa milayo yanga nahone vha khou gwadamela ṋamana ya musuku.’
Mushe a ṱavhanya a tsa thavhani. Musi a tshi swika tsini, a vhona zwenezwi. Vhathu vho vha vha tshi khou imba na u tshina vha tshi mona ṋamana ya musuku! Mushe a sinyuwa lwe a posa mbaba mbili dza matombo fhasi dze dza vha dzi na milayo, dza pwashekana dza vha zwipiḓa zwinzhi-zwinzhi. Zwenezwo a dzhia ṋamana ya musuku a i ṋokisa. A i kuya ya vha luvhanda.
Vhathu vho vha vho ita tshithu tshivhi. Ngauralo Mushe a vhudza vhaṅwe vha vhanna uri vha dzhie mabanga avho. Mushe a ri: ‘Vhathu vhavhi vhe vha rabela ṋamana ya musuku vha fanela u fa.’ Vhanna vha vhulaha vhathu vha 3 000! Naa a zwi sumbedzi uri ri rabele Yehova fhedzi, hu si miṅwe midzimu?
Ekisodo 32:1-35.
Mbudziso
- Kha tshifanyiso, vhathu vha khou ita mini, nahone ndi ngani?
- Ndi ngani Yehova o sinyuwa, nahone Mushe o ita mini musi a tshi vhona zwine vhathu vha khou ita?
- Mushe o vhudza vhaṅwe vhanna uri vha ite mini?
- Iyi nganea i fanela u ri funza mini?
Mbudziso dzo engedzeaho
- Vhalani Ekisodo 32:1-35.
Enea mafhungo a ri sumbedza hani mavhonele a Yehova a u vanganya vhurereli ha mazwifhi na vhurabeli ha ngoho? (Ek. 32:4-6, 10; 1 Vha-Kor. 10:7, 11)
Vhakriste vha fanela u ṱhogomela mini musi zwi tshi ḓa kha u khetha zwithu zwa u ḓimvumvusa, zwi ngaho u imba na u tshina? (Ek. 32:18, 19; Vha-Ef. 5:15, 16; 1 Yoh. 2:15-17)
Vha lushaka lwa Levi vho vhea hani tsumbo yavhuḓi ya u ita zwithu zwo lugaho? (Ek. 32:25-28; Ps. 18:25)