Vhonani maluvha na mitshelo yo vhibvaho zwi khou melaho kha ulu lubaḓa lwa Aroni. Maluvha aya na mitshelo yo vhibvaho zwo mela khalwo nga vhusiku vhuthihi fhedzi! Kha ri vhone uri ndi ngani.

Zwino Vhaisiraele vho vha vho no ḓi tshimbila tshifhinganyana sogani. Vhaṅwe vhathu vho vha vha sa humbuli uri Mushe u fanela u vha murangaphanḓa, kana uri Aroni u fanela u vha tshifhe muhulu. Kora o humbula ngauralo, na Dathani, Abiramu na vharangaphanḓa vha 250 vha vhathu. Avha vhoṱhe vha ḓa vha ri kha Mushe: ‘Ndi ngani ni tshi ḓivhea vhahulwane kha riṋe?’

Mushe a vhudza Kora na vhatevheli vhawe: ‘Matshelo nga matsheloni ni dzhie zwa u fara mulilo na zwioro khazwo. Ni ḓe denndeni ya Yehova. Ri ḓo vhona uri Yehova u ḓo nanga nnyi.’

Nga ḓuvha ḽi tevhelaho Kora na vhatevheli vhawe vha 250 vha ḓa denndeni ya mulanga. Vhaṅwe vhanzhi vha ḓa u imelela avha vhanna. Yehova a sinyuwa zwihulu. Mushe a ri: Ibvani dzidenndeni dza avha vhanna vhavhi. Ni songo kwama zwithu zwavho.’ Vhathu vha bva denndeni dza Kora, Dathani na Abiramu.

Zwino Mushe a ri: ‘Ni ḓo ḓivha nga zwenezwi uri Yehova o nanga nnyi. Fhasi hu ḓo vulea ha mila avha vhanna vhavhi.’

Mushe a tshi tou litsha u amba, fhasi ha mbo ḓi vulea. Dennde ya Kora na thundu na Dathani na Abiramu na vha re navho vha dzhena fhasi, mavu a vha tiba. Musi vhathu vha tshi pfa zwililo zwa vhe vha vha vha tshi khou wela mavuni, vha huwelela: ‘Shavhani! Ḽifhasi ḽi nga ni mila na vhoinwi!’

Kora na vhatevheli vhawe vha 250 vho vha vha tshee tsini na dennde ya mulanga. Yehova a rumela mulilo, nahone vhoṱhe vha swa. Zwino Yehova a vhudza murwa wa Aroni, Eleasara uri a dzhie zwa u fara mulilo zwa vhanna vho faho a mometshedze ngazwo aletare. Zwo vha zwi tshi ḓo sumbedza Vhaisiraele uri a hu na ane a fanela u shuma sa tshifhe wa Yehova nga nnḓa ha Aroni na vharwa vhawe.

Fhedzi Yehova u ṱoḓa uri zwi vhonalese uri ndi Aroni na vharwa vhawe vhe a vha nanga uri vha vhe vhotshifhe. A vhudza Mushe: ‘Vhudza vharangaphanḓa vha tshaka dzoṱhe dza Isiraele uri vha ḓise mbaḓa dzavho. Kha lushaka lwa Levi, hu ḓise Aroni. U dzi vhee denndeni ya mulanga phanḓa ha mbulungelo ya mulanga. Lubaḓa lwa we nda mu nanga uri a vhe tshifhe lu ḓo mela maluvha.’

Musi Mushe a tshi sedza nga matsheloni a tevhelaho, a wana lubaḓa lwa Aroni lwo mela aya maluvha na mitshelo yo vhibvaho! Ni a zwi vhonaha zwino uri ndi ngani Yehova o ita uri lubaḓa lwa Aroni lu mele maluvha?

Numeri 16:1-49; 17:1-11; 26:10.