Nganea 41: Ṋowa ya Tsimbitswuku
Naa iyo i fana na ṋowa ya vhukuma yo pombiwa kha danda? A si ya vhukuma. Ṋowa yo itwa nga tsimbitswuku. Yehova o vhudza Mushe uri a i vhee kha danda uri vhathu vha i sedze vha tshile. Fhedzi dziṅwe ṋowa dzi re fhasi ndi dza vhukuma. Dzo luma vhathu dza vha lwadza. Ni a ḓivha uri ndi ngani?
Ndi ngauri Vhaisiraele vho sema Mudzimu na Mushe. Vha gungula: ‘Wo ri bviselani Egipita uri ri ḓe u fela sogani? A hu na zwiḽiwa kana maḓi fhano. Nahone a ri tsha funa u ḽa mana.’
Fhedzi mana yo vha i zwiḽiwa zwavhuḓi. Yehova o vha fha yone nga vhuṱolo. Nahone o vha fha na maḓi nga vhuṱolo. Fhedzi vhathu vha si livhuhe nḓila ye Mudzimu a vha londa ngayo. Ngauralo Yehova a rumela idzi ṋowa dzi re na vhuṱungu uri a ṱarafe Vhaisiraele. Ṋowa dza vha luma, nahone vhanzhi vha fa.
Mafheleloni, vhathu vha ḓa kha Mushe vha ri: ‘Ro tshinya, ngauri ro gungulela Yehova na iwe. Zwino ri rabelele ha Yehova uri u ṱuwise idzi ṋowa.’
Mushe a rabelela vhathu. Yehova a vhudza Mushe uri a ite ṋowa iyi ya tsimbitswuku. A ri a i vhee kha danda, na uri muthu o lumiwaho u fanela u i sedza. Mushe a ita zwe Mudzimu a amba. Nahone vhathu vhe vha lumiwa vha sedza ṋowa ya tsimbitswuku vha dovha vha fhola.
Hu na ngudo ya u guda kha hezwi. Rine roṱhe, ri fana na avho Vhaisiraele vho lumiwaho nga idzo ṋowa. Roṱhe ri kha maimele a u fa. Sedzani hoṱhe, ni ḓo vhona uri vhathu vha a hula, vha lwala, vha fa. Ndi ngauri vhathu vha u thoma, Adamu na Eva, vho furalela Yehova, nahone roṱhe ri vhana vhavho. Fhedzi Yehova o ita nḓila ya uri ri tshile nga hu sa fheli.
Yehova o rumela Murwa wawe, Yesu Kristo, kha ḽifhasi. Yesu o fhahewa kha danda, ngauri vhanzhi vho humbula uri o vha e muvhi. Fhedzi Yehova o ṋekedza Yesu uri a ri tshidze. Arali ra mu sedza, ra mu tevhela, ri nga vha na vhutshilo vhu sa fheli. Fhedzi ri ḓo guda zwo engedzeaho nga ha izwi nga murahu.
Numeri 21:4-9; Yohane 3:14, 15.
Mbudziso
- Kha tshifanyiso, ndi mini tsho pombiwaho kha danda, nahone ndi ngani Yehova o vhudza Mushe uri a i vhee henefho?
- Vhathu vho sumbedza hani u sa livhuha zwithu zwoṱhe zwe Mudzimu a vha itela zwone?
- Vhathu vho humbela Mushe uri a ite mini nga murahu ha musi Yehova o rumela ṋowa dzi re na vhuṱungu u itela u vha ṱarafa?
- Ndi ngani Yehova o vhudza Mushe uri a ite ṋowa ya tsimbitswuku?
- Ri guda mini kha iyi nganea?
Mbudziso dzo engedzeaho
- Vhalani Numeri 21:4-9.
Ndi tsevho ifhio ine ra i wana kha Vhaisiraele vhe vha gungulela ndugiselelo dza Yehova? (Num. 21:5, 6; Vha-Roma 2:4)
Miṅwahani ya maḓana yo fhiraho, Vhaisiraele vho shumisa hani ṋowa ya tsimbitswuku, nahone ndi vhukando vhufhio he Khosi Hesekiele a vhu dzhia? (Num. 21:9; 2 Dzikh. 18:1-4)
- Vhalani Yohane 3:14, 15.
U vhewa ha ṋowa ya tsimbitswuku kha danda zwi imela hani zwavhuḓi u ombelwa ha Yesu Kristo? (Vha-Gal. 3:13; 1 Pet. 2:24)
