Mushe a ṱoḓa u dzhena Kanana na Vhaisiraele. Ngauralo a humbela: ‘Yehova, ntendele ndi wele Mulambo wa Yorodane, ndi vhone shango ḽavhuḓi.’ Fhedzi Yehova a ri: ‘Zwo eḓana! U songo tsha dovha wa zwi amba!’ Ni a ḓivha uri Yehova o zwi ambelani?

Ndi nga mulandu wa zwe zwa itea musi Mushe a tshi rwa tombo. Humbulani, ene na Aroni a vho ngo ṱhonifha Yehova. A vho ngo vhudza vhathu uri o vha e Yehova we a vha a tshi khou bvisa maḓi tomboni. Nga zwenezwo Yehova a ri ha nga vha tendeli u dzhena Kanana.

Nga murahu ha miṅwedzinyana Aroni o no fa, Yehova a vhudza Mushe: ‘Dzhia Yoshua, u mu imise phanḓa ha Eleasara tshifhe na vhathu. Henefho phanḓa ha vhoṱhe, vhudza vhoṱhe uri Yoshua ndi murangaphanḓa muswa.’ Mushe a ita zwe Yehova a amba, samusi ni tshi nga zwi vhona tshifanyisoni.

Zwino Yehova a vhudza Yoshua: ‘U khwaṱhe, nahone u songo ofha. U ḓo dzhenisa Vhaisiraele shangoni ḽa Kanana ḽe nda vha fulufhedzisa, nahone ndi ḓo vha na iwe.’

Nga murahu Yehova a vhudza Mushe uri a gonye nṱha-nṱha ha Thavha ya Nebo shangoni ḽa Moaba. Henengei nṱha Mushe a kona u lavhelesa u wela Mulambo wa Yorodane a vhona shango ḽa u naka ḽa Kanana. Yehova a ri: ‘Iḽi ndi shango ḽe nda fulufhedzisa u fha vhana vha Abrahamu, Isaka na Yakobo. Ndo u tendela wa ḽi vhona, fhedzi thi nga u tendeli u tshi dzhena khalo.’

Henengei Thavhani ya Nebo Mushe a fa. O vha e na miṅwaha ya 120. O vha e kha ḓi vha na maanḓa, a kha ḓi vhona zwavhuḓi. Vhathu vha ṱungufhala zwihulu nahone vha lila ngauri Mushe a fa. Fhedzi vha takalela murangaphanḓa wavho muswa Yoshua.

Numeri 27:12-23; Doiteronomio 3:23-29; 31:1-8, 14-23; 32:45-52; 34:1-12.