No no vhuya na pfa hu tshi pfi mbongola yo vhuya ya amba? Ni nga ri: ‘Hai, zwipuka a zwi koni u amba.’ Fhedzi Bivhili i amba nga ha mbongola ye ya vhuya ya amba. Kha ri vhone.

Vhaisiraele vho vha vho lugela u dzhena Kanana. Balaka, khosi ya Moaba, o vha a tshi ofha Vhaisiraele. Ngauralo a vhidza munna o thanyaho a no pfi Biliamu uri a ḓe a seme Vhaisiraele. Balaka a fulufhedzisa u fha Biliamu tshelede nnzhi, ngauralo Biliamu a dzhia mbongola yawe a ya u vhona Balaka.

Yehova o vha a sa funi Biliamu a tshi sema vhathu Vhawe. A ruma muruṅwa e na banga ḽilapfu uri a ime nḓilani a imise Biliamu. Biliamu o vha a sa vhoni muruṅwa, fhedzi mbongola yawe ya mu vhona. Ngauralo mbongola ya lingedza u furalela muruṅwa, nahone ya fheleledza nga u lala fhasi nḓilani. Biliamu a sinyuwa zwihulu, nahone a rwa mbongola yawe nga lubaḓa.

Yehova a ita uri Biliamu a pfe mbongola yawe i tshi amba nae. Mbongola ya vhudzisa: ‘Ndo u ita mini u tshi nthwa?’

Biliamu a ri: ‘Wo nnyita uri ndi nge tsilu. Arali ndi vhe ndi na banga ndo vha ndi tshi ḓo u vhulaha!’

Mbongola ya vhudzisa: ‘Ndo no vhuya nda u ita ngaurali?’

Biliamu a fhindula: ‘Hai.’

Zwenezwo Yehova a ita uri Biliamu a vhone muruṅwa a re na banga we a vha o ima nḓilani. Muruṅwa a ri: ‘Ndi ngani wo rwa mbongola yau? Ndo ḓa u u thivhela nḓila, ngauri a wo ngo fanela u ya u sema Isiraele. Arali mbongola yau i si mpfuralele, ndo vha ndi tshi ḓo vha ndo u vhulaha, fhedzi ndo vha ndi tshi ḓo vha ndi songo huvhadza mbongola yau.’

Biliamu a ri: ‘Ndo tshinya. Tho ngo zwi ḓivha uri wo vha wo ima nḓilani.’ Muruṅwa a litsha Biliamu a ṱuwa, nahone Biliamu a ya u vhona Balaka. O vha a kha ḓi lingedza u sema Isiraele, fhedzi, Yehova a ita uri a fhaṱutshedze Isiraele luraru.

Numeri 21:21-35; 22:1-40; 23:1-30; 24:1-25.