Vhonani zwine uyu munna a khou bwela denndeni yawe! Nguvho ya u naka, na baphathi ḽa musuku na maseṱha. O zwi dzhia muḓini wa Yeriko. Fhedzi ho vha ho fanela u vha ho itwani nga zwithu zwa Yeriko? Ni a zwi humbula?

Zwo vha zwo fanela u vha zwo fheliswa, nahone musuku na maseṱha zwo vha zwo fanela u vha zwo iswa mbulungeloni ya dennde ya Yehova. Ngauralo avha vhathu a vho ngo pfa Mudzimu. Vho tswa zwa Mudzimu. Dzina ḽa munna ndi Akani, vhane a vha navho ndi vha muṱa wawe. Kha ri vhone uri ho itea mini.

Akani o no tswa izwi zwithu, Yoshua a ruma vhanna uri vha ye u lwa na muḓi wa Ai. Fhedzi vha kundwa nndwani. Vhaṅwe vha vhulawa, nahone vhaṅwe vha shavha. Yoshua a ṱungufhala zwihulu. A wa nga tshifhaṱuwo a rabela Yehova: ‘Ndi ngani wo tendela izwi zwi tshi itea kha rine?’

Yehova a fhindula: ‘Vuwa! Isiraele o tshinya. Vho dzhia zwiṅwe zwa zwithu zwe zwa fanela u vha zwo fheliswa kana zwo fhiwa dennde ya Yehova. Vho tswa nguvho ya u naka vha i dzumba. Thi nga ni fhaṱutshedzi u swikela ni tshi zwi fhelisa, na muthu we a zwi dzhia.’ Yehova a ri u ḓo sumbedza Yoshua uri munna muvhi o vha e nnyi.

Yoshua a kuvhanganya vhathu vhoṱhe, nahone Yehova a sumba munna muvhi Akani. Akani a ri: ‘Ndo tshinya. Ndo vhona nguvho ya u naka, na baphathi ḽa musuku na maseṱha. Ndo zwi funesa lwe nda zwi dzhia. Ni ḓo zwi wana zwo bwelwa denndeni yanga.’

Musi zwithu izwi zwo wanala zwi tshi ḓiswa ha Yoshua, a ri kha Akani: ‘Ndi ngani wo ri ḓisela khombo? Zwino Yehova u ḓo ḓisa khombo kha iwe!’ Zwenezwo vhathu vhoṱhe vha kanda Akani na vha muṱa wawe nga matombo vha fa. Naa izwo a zwi sumbedzi uri ri songo vhuya ra dzhia zwithu zwine zwi si vhe zwashu?

Nga murahu Isiraele a dovha a ya u lwa na Ai. Zwino Yehova a thusa vhathu vhawe, vha kunda nndwani.

Yoshua 7:1-26; 8:1-29.