Zwino vhunzhi ha miḓi ya Kanana ya ḓilugisela u lwa na Isiraele. Yo humbula uri yo vha i tshi nga kunda. Fhedzi vhathu vha muḓi wa tsini wa Gibeoni a vho ngo humbula ngauralo. Vho tenda uri Mudzimu o vha a tshi khou thusa Vhaisiraele, nahone vho vha vha sa ṱoḓi u lwa na Mudzimu. Ni a ḓivha uri Vhagibeoni vho ita mini?

Vha humbula u ita uri zwi nge vho vha vha tshi dzula kule-kule. Ngauralo vhaṅwe vha vhanna vha ambara zwiambaro zwa madzanganda na thovho dzo ṱahalaho. Vha hwesa mbongola dzavho masaga o ṱahalaho, vha dzhia vhurotho ha kale ho omaho. Vha ya kha Yoshua vha ri: ‘Ri bva shangoni ḽa kule, ngauri ro pfa nga ha Mudzimu wa vhoinwi muhulwane, Yehova. Ro pfa zwoṱhe zwe a ni itela Egipita. Ngauralo vharangaphanḓa vhashu vho ri vhudza uri ri lugise zwiḽiwa zwa lwendo ri ye ri ri kha vhoinwi: “Ri vhalanda vhaṋu. Ri fulufhedziseni uri a ni nga lwi na rine.” Ni nga zwi vhona uri zwiambaro zwashu zwo ṱahala nga lwendo lulapfu na uri vhurotho hashu ho vha ha kale ha oma.’

Yoshua na vhaṅwe vharangaphanḓa vha tenda Vhagibeoni. Vha vha fulufhedzisa uri a vha nga lwi navho. Fhedzi murahu ha ma ḓuvha mararu vha zwi pfa uri Vhagibeoni vha dzula tsini vhukuma.

Yoshua a vhudzisa: ‘Ndi ngani ni tshi ri vhudza uri ni bva shangoni ḽa kule?’

Vhagibeoni vha fhindula: ‘Ro zwi ita ngauri ro vha ro vhudzwa uri Mudzimu waṋu Yehova o fulufhedzisa u ni fha iḽi shango ḽa Kanana ḽoṱhe. Ngauralo ra ofha uri ni ḓo ri vhulaha.’ Fhedzi Vhaisiraele vha vhulunga fulufhedziso ḽavho, vha si vhulahe Vhagibeoni. Vha tou vha ita vhalanda vhavho.

Khosi ya Yerusalema ya sinyuwa nge Vhagibeoni vha ita mulalo na Isiraele. Ya ri kha dziṅwe khosi nṋa: Iḓani ni nthuse u lwa na Vhagibeoni.’ Idzo khosi ṱhanu dza ita ngauralo. Naa Vhagibeoni vho vha vho thanya nga u ita mulalo na Isiraele, zwe zwa ita uri idzi khosi dzi vha lwise? Ri ḓo zwi vhona.

Yoshua 7:1-26; 8:1-29.