Bivhilini ni ḓo wana bugu i vhidzwaho Ruthe. Ndi mafhungo nga ha muṱa we wa tshila vhukatini ha musi Vhaisiraele vhe na vhahaṱuli. Ruthe o vha e musadzi muswa wa shangoni ḽa Moaba; a si wa lushaka lwa Yehova lwa Isiraele. Fhedzi musi Ruthe a tshi guda nga ha Mudzimu wa ngoho Yehova, a mu funa. Naomi o vha e musadzi muhulwane we a thusa Ruthe u guda nga ha Yehova.

Naomi o vha e Muisiraele. Ene na munna wawe na vharwa vhavhili vha pfulutshela Moaba musi hu na zwiḽiwa zwiṱuku Isiraele. Zwino ḽiṅwe ḓuvha munna wa Naomi a fa. Nga murahu vharwa vha Naomi vha vhinga vhasidzana vhavhili vha Vhamoaba vha vhidzwaho Ruthe na Arepa. Nga murahu ha miṅwaha ya 10, vharwa vha Naomi vha fa. Naomi o vha a tshi ḓo ita mini zwino?

Ḽiṅwe ḓuvha Naomi a humbula a fara lwendo lwa u vhuelela hayani ha vhathu vha hawe. Ruthe na Arepa vha ṱoḓa u dzula nae, ngauralo vha ṱuwa nae. Fhedzi vho no tshimbila tshifhinganyana nḓilani, Naomi a rembulutshela kha vhasadzi vhaswa a ri: ‘Vhuelelani hayani ni dzule na vhomme aṋu.’

Naomi a khisa vhasadzi vhaswa a vha onesa. Zwenezwo vha thoma u lila, ngauri vho vha vha tshi funesa Naomi. Vha ri: ‘Hai! Ri ḓo ṱuwa na iwe kha vhathu vha hau.’ Fhedzi Naomi a fhindula: ‘Ni fanela u huma, vhananga. Zwi ḓo vha khwine ni hayani.’ Arepa a vhuelela hayani. Fhedzi Ruthe a si hume.

Naomi a ri khae: ‘Arepa o ṱuwa. Na iwe iya hayani nae.’ Fhedzi Ruthe a fhindula: ‘U songo lingedza u ita uri ndi u sie! Nnditshe ndi ṱuwe na iwe. Hune wa ya ndi ḓo ya hone, hune wa dzula na nṋe ndi ḓo dzula hone. Vhathu vhau vha ḓo vha vhathu vhanga, Mudzimu wau u ḓo vha Mudzimu wanga. Hune wa fela hone na nṋe ndi ḓo fela hone, nahone ndi hune nda ḓo vhulungwa hone.’ Musi Naomi a tshi pfa izwi, a si tsha ri a ye hayani.

Vhasadzi vhavhili vha vhuya vha swika Isiraele. Vha dzula henefho. Ruthe a mbo ḓi thoma u shuma masimuni, ngauri tsho vha tshi tshifhinga tsha u kuvhanganya mavhele. Munna a no pfi Boasi a mu tendela a kuvhanganya mavhele masimuni awe. Ni a ḓivha uri mme a Boasi o vha e nnyi? O vha e Rahaba wa Yeriko.

Ḽiṅwe ḓuvha Boasi a vhudza Ruthe: ‘Ndo pfa zwoṱhe nga ha iwe, na uri wo vha na vhulenda hani kha Naomi. Ndi a zwi ḓivha na uri wo sia hani khotsi au na mme au na shango ḽa hau na uri wo ḓa hani u dzula vhukati ha vhathu vhe wa vha u sa vha ḓivhi. U nga ri Yehova a nga vha wavhuḓi kha iwe!’

Ruthe a fhindula: ‘U na vhulenda nga maanḓa kha nṋe. Wo nnyita uri ndi pfe ndi khwine nga nḓila ye wa amba na nṋe zwavhuḓi.’ Boasi a funesa Ruthe, nahone zwi si dzhie tshifhinga tshilapfu vha sa athu u vhingana. Izwi zwa takadza hani Naomi! Fhedzi Naomi a takala u fhirisa musi Ruthe na Boasi vha tshi vha na murwa wavho wa tanzhe, a no pfi Obede. Nga murahu Obede a vha makhulu wa Davida, ane ra ḓo guda zwinzhi nga ha ene.

Bugu ya Bivhili