Nganea 52: Gideoni na Vhanna vha 300
Ni a vhona uri hu khou itea mini afha? Avha ndi vhanna vha u lwa vha Isiraele. Vhanna vho kotamaho vha khou nwa maḓi. Muhaṱuli Gideoni ndi o imaho tsini havho. U khou sedza uri vha nwa hani maḓi.
Sedzesani uri vhanna vha khou nwa hani maḓi. Vhaṅwe vha tou dzhenisa zwifhaṱuwo zwavho ngomu maḓini. Fhedzi muthihi u tou isa maḓi mulomoni nga zwanḓa, uri a vhone zwi iteaho tsini hawe. Hezwi zwo vha zwi zwihulwane, ngauri Yehova o vhudza Gideoni uri a nange fhedzi vhanna vha sedzaho musi vha tshi nwa. Vhaṅwe, Mudzimu a ri vha iswe hayani. Kha ri vhone uri ndi ngani.
Vhaisiraele vho vha vhe khomboni hafhu. Ndi ngauri vha si thetshelese Yehova. Vhamidiani vho vha vha tshi khou vha vhaisa. Ngauralo Vhaisiraele vha lilela Yehova u itela thuso, nahone Yehova a thetshelesa zwililo zwavho.
Yehova a vhudza Gideoni u dzhia mmbi, Gideoni a kuvhanganya vhanna vha u lwa vha 32 000. Fhedzi ho vha hu na mmbi ya vhanna vha 135 000 i lwaho na Isiraele. Naho zwo ralo Yehova a vhudza Gideoni: ‘U na vhanna vhanzhisa.’ Yehova o zwi ambelani?
Ndi ngauri arali Isiraele a kunde nndwani, vho vha vha tshi nga humbula uri vho kunda nga vhone vhane. Vho vha vha tshi nga humbula uri a vho ngo ṱoḓa thuso ya Yehova uri vha kunde. Yehova a ri kha Gideoni: ‘Vhudza vhoṱhe vha ofhaho uri vha humele hayani.’ Vhanna vha u lwa vha 22 000 vha ya hayani. Izwo zwa mu siela vhanna vha 10 000 vha u lwa na maswole oṱhe a 135 000.
Fhedzi, Yehova a ri: ‘U kha ḓi vha na vhanna vhanzhisa.’ A vhudza Gideoni uri a ite uri vhanna vha nwe maḓi mulamboni uyu nahone zwenezwo a ise hayani vhoṱhe vha dzhenisaho zwifhaṱuwo maḓini vha tshi nwa. Yehova a fulufhedzisa: ‘Ndi ḓo u fha gundo nga vhanna vha 300 vhe vha dzula vho sedza musi vha tshi nwa.’
Ha ḓa tshifhinga tsha nndwa. Gideoni a vhea vhanna vhawe nga zwigwada zwiraru. A fha muṅwe na muṅwe phalaphala, na khali i re na luvhone ngomu hayo. Vhukati ha vhusiku, vhoṱhe vha tanga dennde dza maswole a maswina. Nga tshifhinga tshithihi, vhoṱhe vha lidza phalaphala dzavho vha pwasha khali dzavho, vha ṱavha mukosi: ‘Pfumo ḽa Yehova na ḽa Gideoni!’ Musi maswina a tshi vuwa, a hanganea na u ofha. Oṱhe a thoma u shavha, Vhaisiraele vha kunda nndwa.
Vhahaṱuli dzindima 6 u ya kha 8.
Mbudziso
- Zwo ḓa hani uri Vhaisiraele vha dzhene khakhathini nngafha nahone ndi ngani?
- Ndi ngani Yehova o vhudza Gideoni uri u na vhanna vhanzhi vhukuma kha mmbi yawe?
- Ho sala vhanna vhangana musi Gideoni a tshi vhudza vhanna vha ofhaho uri vha humele hayani?
- Ni tshi sedza afha kha tshifanyiso, ṱalutshedzani nḓila ye Yehova a fhungudza ngayo tshivhalo tsha mmbi ya Gideoni ya sala i na vhanna vha 300 fhedzi.
- Gideoni o dzudzanya hani vhanna vhawe vha 300, nahone Vhaisiraele vho kunda hani nndwani?
Mbudziso dzo engedzeaho
- Vhalani Vhahaṱuli 6:36-40.
Gideoni o khwaṱhisedza hani uri hu itwe zwine Yehova a zwi funa?
Ṋamusi ri ḓivha hani zwine Yehova a zwi funa? (Mir. 2:3-6; Mat. 7:7-11; 2 Tim. 3:16, 17)
- Vhalani Vhahaṱuli 7:1-25.
Ri guda mini kha vhanna vha 300 vhe vha dzula vho fhaṱuwa na vhe vha sa londe? (Vhahaṱ. 7:3, 6; Vha-Roma 13:11, 12; Vha-Ef. 5:15-17)
Samusi vhanna vha 300 vho guda nga u sedza Gideoni, ri guda hani nga u sedza Gideoni Muhulwane, Yesu Kristo? (Vhahaṱ. 7:17; Mat. 11:29, 30; 28:19, 20; 1 Pet. 2:21)
Vhahaṱuli 7:21 i ri thusa hani uri ri fushee nga u shuma naho hu ngafhi ndanguloni ya Yehova? (1 Vha-Kor. 4:2; 12:14-18; Yak. 4:10)
- Vhalani Vhahaṱuli 8:1-3.
Musi zwi tshi ḓa kha u piringulula dziphambano na vhahashu vha tshinnani na vha tshisadzini, ri guda mini kha nḓila ye Gideoni a piringulula ngayo dziphambano na Vhaefuraimi? (Mir. 15:1; Mat. 5:23, 24; Luka 9:48)
