Saulo o vha khosi ya Isiraele ya u thoma. Fhedzi Yehova a mu laṱa, nahone Davida a nangiwa u vha khosi vhudzuloni hawe. Ri wana zwinzhi nga ha Davida. Sa muswa, o lwa na munna mulapfu Goliata. Nga murahu a shavha Khosi Saulo wa vivho. Zwenezwo Abigaili o nakaho a mu litshisa u ita tshithu tsha vhutsilu.

Zwi tevhelaho, ri guda zwinzhi nga ha murwa wa Davida, Salomo, we a dzhia vhudzulo ha Davida sa khosi ya Isiraele. Iṅwe na iṅwe ya khosi tharu dza u thoma dza Isiraele yo vhusa miṅwaha ya 40. Nga murahu ha lufu lwa Salomo, Isiraele a fhandekana a vha mivhuso mivhili, muvhuso wa devhula na wa tshipembe.

Muvhuso wa devhula wa tshaka dza 10 wo dzula miṅwaha ya 257 u sa athu u fheliswa nga Vhaasuri. Nga murahu ha miṅwaha ya 133, muvhuso wa tshipembe wa tshaka mbili na wone wa, fheliswa. Nga itshi tshifhinga Vhaisiraele vha iswa vhuthubwani Babele. Ngauralo Tshipiḓa tsha vhuṋa tshi putela miṅwaha ya 510 ya ḓivhazwakale, hune zwiitea zwinzhi zwa itea nga phanḓa hashu.