Davida o no thoma u vhusa Yerusalema, Yehova a fha mmbi yawe magundo manzhi kha maswina avho. Yehova o vha o fulufhedzisa u fha Vhaisiraele shango ḽa Kanana. Nahone zwenezwo, nga thuso ya Yehova, shango ḽoṱhe ḽe vha fulufhedziswa ḽone ḽa vhuya ḽa vha ḽavho.

Davida o vha e muvhusi wavhuḓi. O vha a tshi funa Yehova. Ngauralo tshiṅwe tsha zwithu zwa u thoma zwe a ita o no thuba Yerusalema ho vha u ḓisa mbulungelo ya Yehova ya mulanga henefho. O ṱoḓa na u fhaṱa thembele ya u i vhea khayo.

Musi Davida a tshi hula, a ita khakho mmbi. Davida o vha a tshi zwi ḓivha uri ndi u khakha u dzhia tshithu tsha muṅwe. Fhedzi maṅwe madekwana, musi a kha thanga ya pfamo yawe, a tshi sedza fhasi a vhona musadzi wa u naka. Dzina ḽawe ḽo vha ḽi Batseba, munna wawe o vha e muṅwe wa maswole awe a no pfi Uria.

Davida a ṱoḓa Batseba lwe a ri a ḓiswe pfamoni yawe. Munna wawe o vha o ya nndwani. Zwenezwo, Davida a ita lufuno khae nahone Batseba nga murahu a wana uri u ḓo vha na ṅwana. Davida a vhilaela zwihulu a rumela ipfi kha muhulwane wa mmbi yawe Yoaba uri a vhee Uria phanḓa nndwani he a vha a tshi ḓo vhulawa. Musi Uria o fa, Davida a vhinga Batseba.

Yehova a sinyutshela Davida zwihulu. Ngauralo a rumela muḓinḓa wawe Nathani u mu vhudza nga ha zwivhi zwawe. Ni nga vhona Nathani afho a tshi khou amba na Davida. Davida a ḓisola zwihulu, ngauralo Yehova a si mu vhulahe. Fhedzi Yehova a ri: ‘Ngauri wo ita izwi zwithu zwivhi. u ḓo vha na khombo nnzhi nḓuni yau.’ Davida a vha na khombo nngafhani!

Tsha u thoma, murwa wa Batseba a fa. Zwo ralo murwa wa Davida wa tanzhe Aminoni a wana khaladzi awe Thamara a eṱhe a kombetshedza lufuno lwawe khae. Murwa wa Davida, Abesalomo a sinyuwa nga ha izwo lwe a vhulaha Aminoni. Nga murahu,Abesalomo a funwa nga vhathu, nahone a ita uri a itwe khosi. Mafheleloni, Abesalomo a kundwa nndwani a fa, a tshi lwa na Davida.

Vhukatini ha izwi zwoṱhe, Batseba a beba murwa a no pfi Salomo. Musi Davida o kalaha a tshi khou lwala, murwa wawe Adonia a lingedza u ḓiita khosi. Zwenezwo Davida a ri tshifhe Tsadoko a shele mapfura kha ṱhoho ya Salomo a sumbedza uri o vha a tshi ḓo vha khosi. Nga murahu Davida a fa e na miṅwaha ya 70. O vha o vhusa miṅwaha ya 40, Salomo a vha khosi ya Isiraele.

2 Samuele 6:1-15; 11:1-27; 1 Dzikhosi 1:1-48.