Khosi Nebukadanetsara a dzhia Vhaisiraele vhoṱhe vho funzeaho zwavhuḓi a vha isa Babele. Nga murahu khosi ya nanga khavho vhaṱhannga vho nakesaho na vho thanyesaho. Vhaṋa vha avha ndi vhatukana vhane na vha vhona afha. Muṅwe ndi Daniele, vhaṅwe vhararu Vhababele vho vha vhidza Sadaraka, Mesaka na Abedenego.

Nebukadanetsara a humbula u gudisa vhaṱhannga vha u shuma pfamoni yawe. Nga murahu ha miṅwaha miraru o vha a tshi ḓo nanga fhedzi vho thanyesaho uri vha mu thuse u piringulula vhuleme. Khosi ya ṱoḓa uri vhatukana vha vhe na maanḓa na u vha na mutakalo musi vha tshi gudiswa. A laya vhaḓinḓa vhawe uri vha fhe vhoṱhe zwiḽiwa zwavhuḓi na veine zwe ene na vha muṱa wawe vha vha vha tshi zwi wana.

Vhonani Daniele muṱuku. Ni a ḓivha uri u khou ri mini kha Asipenasi muḓinda muhulwane wa Nebukadanetsara? Daniele u khou mu vhudza uri ha ṱoḓi u ḽa zwithu zwavhuḓi zwa ṱafulani ya khosi. Fhedzi Asipenasi a vhilaela. A ri: ‘Khosi yo humbula uri ni fanela u ḽa na nwa. Arali ni sa sedzei no takala sa vhaṅwe vhaṱhannga, a nga mmbulaha.’

Ngauralo Daniele a ya kha mukoma we Asipenasi a mu vhea muhulwane wa ene na khonani dzawe tharu. A ri: ‘Nga khumbelo ri linge maḓuvha a 10. U ri fhe miroho ya u ḽa na maḓi a u nwa. Zwenezwo a ri vhambedze na vhaṅwe vhaṱhannga vha ḽaho zwiḽiwa zwa khosi, u vhone vhane vha vha khwine.’

Mukoma a tenda u ita izwi. Musi maḓuvha a 10 o fhela, Daniele na khonani dzawe tharu vho vha vha tshi fhira vhaṅwe vhaṱhannga nga mutakalo. Ngauralo mukoma a vha tendela u bvela phanḓa vha tshi ḽa miroho nṱhani ha zwe khosi a vha fha.

Vhufheloni ha miṅwaha miraru vhaṱhannga vhoṱhe vha iswa ha Nebukadanetsara. O no amba navho vhoṱhe, khosi a wana Daniele na khonani dzawe tharu vhe vho thanyesaho. Ngauralo a vha vhea uri vha mu thuse pfamoni yawe. Hafhu naho hu lini khosi i tshi vhudzisa Daniele, Sadaraka, Mesaka na Abedenego dzimbudziso kana i tshi vha fha vhuleme vhu konḓaho, vho vha vha tshi ḓivha ka-10 u fhira vhotshifhe vhawe kana vhaṱali.

Daniele 1:1-21.