Nganea 56: Khosi ya Isiraele ya u Thoma
Vhonani Samuele a tshi khou shela mapfura kha ṱhoho ya munna. Ndi zwe vha vha vha tshi ita kha muthu u sumbedza uri o khethwa sa khosi. Yehova o vhudza Samuele uri a shele mapfura kha ṱhoho ya Saulo. Ndi mapfura o khetheaho a nukhelelaho.
Saulo o vha a sa humbuli uri o vha e wavhuḓi u vha khosi. A vhudza Samuele: ‘Ndi wa lushaka lwa Benyamini, luṱuku kha Isiraele, ndi ngani a tshi ri ndi ḓo vha khosi?’ Yehova o funa Saulo ngauri o vha a sa ḓiitisi u vha muthu muhulwane na a ḓivhaleaho. Ndi nga hone O mu nanga u vha khosi.
Fhedzi Saulo o vha e si munna a shayaho kana muṱuku. O vha a tshi bva muṱani wo pfumaho, nahone o vha e munna o nakaho zwihulu, o lapfa u fhira vhoṱhe Isiraele nga ṱhoho na mahaḓa! Saulo o vha a tshi gidima vhukuma, nahone e munna a re na maanḓa. Vhathu vha takala nge Yehova a nanga Saulo a vha khosi. Vhoṱhe vha thoma u huwelela: ‘Khosi nga i lalame!’
Maswina a Isiraele o vha e na maanḓa mahulusa. O vha a kha ḓi itela Vhaisiraele khombo. Nga u ṱavhanya Saulo o no itwa khosi, Vhaamoni vha ḓa u lwa navho. Fhedzi Saulo a kuvhanganya mmbi khulu, nahone a kunda Vhaamoni. Izwi zwa ita uri vhathu vha takale nge Saulo a vha khosi.
Miṅwaha i tshi ḓi ya, Saulo a ranga phanda Vhaisiraele kha magundo manzhi nṱha ha maswina avho. Saulo o vha e na murwa a sa ofhi a no pfi Yonathani, we a thusa Isiraele u kunda nndwa nnzhi. Vhafilisita vho vha vha kha ḓi vha swina ḽa Isiraele. Ḽiṅwe ḓuvha vha ḓa vhe vhanzhi u lwa na Vhaisiraele.
Samuele a vhudza Saulo uri a lindele u swikela a tshi ḓa u ita tshiṱhavhelo, kana tshifhiwa kha Yehova. Fhedzi Samuele a lenga u ḓa. Saulo a ofha uri Vhafilisita vha ḓo thoma nndwa, ngauralo a ḓiitela tshiṱhavhelo ene muṋe. Samuele a tshi ḓa, a vhudza Saulo uri ho ngo thetshelesa. Samuele a ri: ‘Yehova u ḓo nanga muṅwe muthu uri a vhe khosi kha Isiraele.’
Nga murahu Saulo a dovha u sa thetshelesa. Samuele a mu vhudza: ‘Ndi khwine u thetshelesa Yehova u fhira u mu itela tshifhiwa tsha nngu yavhuḓi. Ngauri a wo ngo thetshelesa Yehova, ha nga ḓo u litsha u khosi ya Isiraele.’
Ri nga guda ngudo yavhuḓi kha hezwi. Zwi ri sumbedza uri ndi zwihulwane hani u dzula ri tshi thetshelesa Yehova. Hafhu, zwi sumbedza uri muthu wavhuḓi, sa Saulo u thomani, a nga shanduka a vha muvhi. A ri ṱoḓi u vha vhavhi, ri a zwi ṱoḓa?
1 Samuele dzindima 9 u ya kha 11; 13:5-14; 14:47-52; 15:1-35; 2 Samuele 1:23.
Mbudziso
- Kha tshifanyiso, Samuele u khou ita mini, nahone ndi ngani?
- Ndi ngani Yehova a tshi funa Saulo, nahone o vha e muthu-ḓe?
- Murwa wa Saulo o vhe e nnyi, nahone murwa wawe o ita mini?
- Ndi ngani Saulo o ṋekedza tshiṱhavhelo nṱhani ha u lindela Samuele a tshi swika?
- Ndi ngudo ifhio ine ra i guda kha mafhungo a Saulo?
Mbudziso dzo engedzeaho
- Vhalani 1 Samuele 9:15-21 na 10:17-27.
U ḓiṱukufhadza ha Saulo ho mu thusa hani u iledza u dzhia vhukando nga u ṱavhanya musi vhaṅwe vhanna vha tshi mu amba nga nḓila i si yavhuḓi? (1 Sam. 9:21; 10:21, 22, 27; Mir. 17:27)
- Vhalani 1 Samuele 13:5-14.
Ndi tshivhi tshifhio tshe Saulo a tshi ita ngei Giligala? (1 Sam. 10:8; 13:8, 9, 13)
- Vhalani 1 Samuele 15:1-35.
Ndi tshivhi tshifhio tshihulwane tshe Saulo a tshi ita malugana na Agaga, khosi ya Vhaamaleke? (1 Sam. 15:2, 3, 8, 9, 22)
Saulo o lingedza hani u vhuyafhedza zwiito zwawe nahone a vhona vhaṅwe mulandu? (1 Sam. 15:24)
Ndi tsevho ifhio ine ra fanela u i thetshelesa ṋamusi musi ri tshi ṋewa nyeletshedzo? (1 Sam. 15:19-21; Ps. 141:5; Mir. 9:8, 9; 11:2)
