Davida o no vhulaha Goliata, Abinere muhulwane wa mmbi ya Isiraele a mu ḓisa ha Saulo. Saulo a takalela Davida zwihulu. A mu ita muhulwane mmbini yawe a mu dzhia a dzula nḓuni ya khosi.

Nga murahu, musi mmbi i tshi vhuya u lwa na Vhafilisita, vhasadzi vha imba: ‘Saulo o vhulaha vha zwigidi, fhedzi Davida o vhulaha zwigidi zwinzhi.’ Izwi zwa ita uri Saulo a vhe na vivho, ngauri Davida o vha a tshi khou fhiwa ṱhonifho khulwane u fhira Saulo. Fhedzi Yonathani murwa wa Saulo o vha a si na vivho. Ene na Davida vho vha vha tshi funana zwihulu. Ngauralo vhavhili vha fulufhedzisana uri vha ḓo ḓi vha dzikhonani.

Davida o vha e mulidzi wavhuḓi wa mbila, nahone Saulo o vha a tshi funa muzika we a lidza. Fhedzi ḽiṅwe ḓuvha vivho ḽa Saulo ḽa mu ita uri a ite zwo vhifhaho. Musi Davida a tshi khou lidza mbila, Saulo a dzhia pfumo a ḽi posa, a tshi ri: ‘Ndi ḓo mu baḓakanya na luvhondo!’ Fhedzi Davida a tinya, pfumo ḽa hupa. Nga murahu Saulo a dovha a hupa Davida nga pfumo ḽawe. Ngauralo Davida a zwi ḓivha uri u fanela u londa zwihulu.

Ni a ḽi humbula fulufhedziso ḽe Saulo a ḽi ita? O ri o vha a tshi ḓo fha munna we a vhulaha Goliata ṅwananyana wawe uri a vhe musadzi wawe. Saulo a vhudza Davida uri a nga dzhia ṅwananyana wawe Mihali, fhedzi o vha o fanela u thoma u vhulaha Vhafilisita vha 100 vha maswina. Edzanu humbula! Vhukuma Saulo o fulufhela uri Vhafilisita vho vha vha tshi ḓo vhulaha Davida. Fhedzi vha si mu vhulahe, ngauralo a mu fha ṅwananyana wawe.

Ḽiṅwe ḓuvha Saulo a vhudza Yonathani na vhaḓinḓa vhawe vhoṱhe uri o vha a tshi ṱoḓa u vhulaha Davida. Fhedzi Yonathani a ri kha khotsi awe: ‘U songo vhaisa Davida. Ho ngo vhuya a u khakhela. Zwoṱhe zwe a ita zwo u thusa. O vhea vhutshilo hawe khomboni a tshi vhulaha Goliata, nahone zwa u takadza.’

Saulo a thetshelesa murwa wawe, nahone a fulufhedzisa u sa vhaisa Davida. Davida a vhuiswa, a dovha a shumela Saulo nḓuni yawe u fana na u thomani. Naho zwo ralo, ḽiṅwe ḓuvha, Davida a tshi khou lidza muzika, Saulo a dovha a posa Davida nga pfumo ḽawe. Davida a tinya, pfumo ḽa rwa luvhondo. Ndi lwa vhuraru zwino! Davida zwino a ḓivha uri u fanela u shavha!

Vhusiku honoho Davida a ya nḓuni yawe. Fhedzi Saulo a ruma vhanna uri vha vhulahe Davida. Mihali a ḓivha zwe khotsi awe a vha a tshi ṱoḓou ita. Ngauralo a vhudza munna wawe: ‘Wa sa shavha vhusiku, matshelo u ḓo vha wo fa.’ Vhusiku honoho Mihali a thusa Davida a ponyoka nga fasitere. Miṅwaha ya sumbe Davida a fanela u dzumbama uri Saulo a si mu wane.

1 Samuele 18:1-30; 19:1-18.